Yelemia 24:1-10
-
Bikuyu biyampe ne bikuyu bibi (1-10)
24 Penepo Yehova waunombola bilala bibidi bya bikuyu bitūlwe kumeso kwa tempelo ya Yehova, papo Nebukaneza* mulopwe wa Babiloni ke musele kala Yekonia*+ mwanā Yehoyakimi,+ mulopwe wa Yuda, bu musungi, pamo ne bamfumu ba Yuda, ne basendwe, ne bengidi bafulanga byuma;* webaselele ku Yelusalema waenda nabo ku Babiloni.+
2 Mu kilala kimo mwadi bikuyu biyampe bininge, pamo bwa bikuyu bibajinji, ino mu kilala kikwabo mwadi bikuyu bibi bininge, bibi kutabuka kebibwanyapo kudibwa.
3 Penepo Yehova wangipangula’mba: “A Yelemia, le ubamone bika?” Nami namulondolola amba: “Namone bikuyu; bikuyu biyampe i biyampe bininge, ino bikuyu bibi i bibi bininge, bibi kutabuka kebibwanyapo kudibwa.”+
4 Penepo kinenwa kya Yehova kyaiya kondi amba:
5 “Yehova Leza wa Isalela wanena namino amba, ‘Enka mwikadile bino bikuyu biyampe, nami nkamona biyampe misungi ya Yuda, yoya yonapangile mu kino kifuko yaenda ku ntanda ya bene Kaladea.
6 Diso dyami dikekala pobadi mwanda wa bekale biyampe, kadi nkebajokeja mu ino ntanda.+ Nkebobaka, ino nkikapomonapo; nkebakuna, ino nkikatukunapo.+
7 Kadi nkebapa mutyima wa kundyuka, amba ami ne Yehova.+ Bakekalanga bantu bami, nami nkekalanga Leza wabo,+ mwanda bakajokela kondi na mutyima wabo onso.+
8 “‘Ino pa mwanda utala bikuyu bibi, bibi bininge kebibwanyapo kudibwa,+ Yehova wanena namino amba: “E monkamwena Zedekia+ mulopwe wa Yuda, ne bamfumu bandi, ne bashele’ko ba Yelusalema bashele mu ino ntanda, ne boba bashikete mu ntanda ya Edipito.+
9 Nkebalamuna ke kintu kya nzuba ne kyamalwa ku malopwe onso a ntanda,+ ke mutonko, lukindi, kintu kya kufutululwa, ne mafingo+ mu bifuko byonso monebapalakenya.+
10 Kadi nkebatumina kipete,+ ne kipupo kya nzala, ne kipupo kya misongo,*+ kufika ne byoboneka mu ntanda yonebapele abo ne bakulutuba babo.”’”
Kunshi kwa Dyani
^ Kishima pa kishima i, “Nebukadeleza,” mulembelo mukwabo wa dino dijina.
^ Witwa ne bu Yehoyakini ne bu Konia.
^ Bibwanika padi i, “bōbaki ba mansakwa.”
^ Nansha’mba “misongo.”
