Yelemia 28:1-17
-
Yelemia na mupolofeto wa bubela Hanania (1-17)
28 Mu mwaka umo onka, ku ngalwilo kwa bulopwe bwa Zedekia+ mulopwe wa Yuda, mu mwaka wa buná, mu kweji wa butano, mupolofeto Hanania mwanā Azula wa ku Ngibeone+ waunena mu njibo ya Yehova ku meso a babitobo ne a bantu bonso amba:
2 “Yehova wa bibumbo, Leza wa Isalela wanena namino amba, ‘Nkatyumuna lupungu lwa mulopwe wa Babiloni.+
3 Mu myaka* ibidi nsa kujokeja mu kino kifuko bipungwa byonso bya njibo ya Yehova byaselele Nebukaneza mulopwe wa Babiloni mu kino kifuko waenda nabyo ku Babiloni.’”+
4 “‘Kadi nkajokeja mu kino kifuko Yekonia+ mwanā Yehoyakimi,+ mulopwe wa Yuda, ne misungi yonso ya Yuda yaendele ku Babiloni,’+ i Yehova unena, ‘mwanda nkatyumuna lupungu lwa mulopwe wa Babiloni.’”
5 Penepo mupolofeto Yelemia wanena mupolofeto Hanania ku meso a babitobo ne a bantu bonso badi bemene mu njibo ya Yehova.
6 Mupolofeto Yelemia wanena’mba: “Amena!* Yehova alonge’kyo! Yehova afikidije binenwa byobe byowanena, ajokeje ku kino kifuko bipungwa bya njibo ya Yehova ne bantu bonso misungi kutamba ku Babiloni!
7 Inoko, nakwisāshila, ivwana uno musapu onesamba mu matwi obe ne mu matwi a bantu bonso.
8 Tamba kala bapolofeto bambadikidile ami ne bakubadikidile abe badi banena bupolofeto pa matanda mangi ne malopwe makatampe, pa mwanda wa divita, kyamalwa ne kipupo kya misongo.*
9 Shi mupolofeto wanena bupolofeto bwa ndoe, kadi kinenwa kya mupolofeto’wa kibafikidila, nabya kikayukana’mba bine Yehova watumine mupolofeto’wa.”
10 Ponkapo mupolofeto Hanania wayata mukabo wa lupungu mu nshingo ya mupolofeto Yelemia weutyumuna.+
11 Penepo Hanania wanena ku meso a bantu bonso amba: “Yehova wanena namino amba, ‘Enka namino’u e monkatyumwina lupungu lwa Nebukaneza mulopwe wa Babiloni mu nshingo ya mizo yonso mu myaka ibidi.’”+ Ebiya mupolofeto Yelemia waenda.
12 Mupolofeto Hanania pa kupwa kutyumuna mukabo wa lupungu mu nshingo ya mupolofeto Yelemia, uno musapu wa Yehova waiya kudi Yelemia amba:
13 “Enda kasapwile Hanania amba, ‘Yehova wanena namino amba: “Ubatyumuna mikabo ya lupungu ya mutyi,+ ino pa kyaba kyayo ukalonga’po mitembo ya lupungu ya kyuma.”
14 Mwanda Yehova wa bibumbo, Leza wa Isalela wanena namino amba: “Nkatūla mukabo wa lupungu wa kyuma mu nshingo ya ino mizo yonso, amba bengidile Nebukaneza mulopwe wa Babiloni, kadi bafwaninwe kumwingidila.+ Enka ne banyema ba ntanda nkamupa’bo.”’”+
15 Penepo mupolofeto Yelemia wanena mupolofeto Hanania amba: “A Hanania,+ nakwisāshila teja! Yehova kakutuminepo, ino abe ubakulupija bano bantu bya bubela.+
16 O mwanda Yehova wanena namino amba, ‘Tala! Nsa kukufundula pano pa nshi. Usa kufwa uno mwaka, mwanda ubakankamika bantu batombokele Yehova.’”+
17 Penepo mupolofeto Hanania wafwa enka mu mwine mwaka’wa, mu kweji wa busamba-bubidi.
Kunshi kwa Dyani
^ Kishima pa kishima i, “myaka ya mafuku.”
^ Nansha’mba “Mo monka!”
^ Nansha’mba “misongo.”
