Yelemia 33:1-26
33 Kinenwa kya Yehova kyaiya kudi Yelemia musunsa wa bubidi, aye papo ukidi mushityilwe mu Kipango kya Balami,+ amba:
2 “Yehova Mulongi wa ntanda, Yehova mwine weipungile ne kwiikomeja pototo; dijina dyandi i Yehova, wanena namino amba,
3 ‘Ngite, nami nkakwitaba ne kukulombola bukidi bonka bintu bikatakata kadi kebivwanikwapo byokuyukilepo.’”+
4 “Mwanda Yehova Leza wa Isalela wanena pa mwanda wa mobo a kino kibundi ne mobo a balopwe ba Yuda apomonwa pa mwanda wa mabunda a kasāla ne kipete,+
5 ne pa mwanda wa boba bāya kulwa na bene Kaladea, bayuja bino bifuko na imbidi mifwe ya boba bonaipaile na bulobo ne bukalabale, bantu ba bubi bwaunengeja mfye kino kibundi mpala yami, namino amba:
6 ‘Nsa kumujokejeja bukomo ne kumubelula,+ kadi nsa kwibondapa ne kwibasokwela bungibungi bwa ndoe ne bubine.+
7 Kadi nkajokeja misungi ya Yuda ne misungi ya Isalela,+ nkebobaka enka monebobakile kungalwilo.+
8 Nkebatōkeja ku mambo onso a bubi bwabo bobandubile,+ kadi nkebalekela mambo onso a bubi bwabo ne kujilula kobanjilwidile.+
9 Kadi aye ukekala kondi ke dijina dya kusepelela, mitendelo, ne buya ku meso a mizo yonso ya pa ntanda ikevwana buyampe bonso bonebapele.+ Kadi bakakwatwa moyo ne kuzakala+ pa mwanda wa buyampe bonso ne ndoe yonkamupa.’”+
10 “Yehova wanena namino amba: ‘Mu kino kifuko momukanena’mba i mu ntanda mutuputupu, mwampikwa muntu nansha bimunanwa, mu bibundi bya Yuda ne mu bipito bya Yelusalema bisalwe, mwampikwa muntu nansha mwikadi nansha bimunanwa, mukevwanwa monka
11 lunwa lwa kusepelela ne lunwa lwa nsangaji,+ diwi dya musoñañani ne diwi dya mutundaile, diwi dya boba banena’mba: “Fwijai’ko Yehova wa bibumbo, mwanda Yehova i muyampe;+ buswe bwandi bwa ndamatyidile bulādilanga nyeke!”’+
“‘Bakaleta byamulambu bya kufwija’ko mu njibo ya Yehova,+ mwanda amiwa nkajokeja misungi ya ntanda’ya, pamo bwa ku ngalwilo,’ i Yehova unena.”
12 “Yehova wa bibumbo wanena namino amba: ‘Muno mu ntanda mutuputupu, mwampikwa muntu nansha bimunanwa, ne mu bibundi byayo byonso, mukekala monka madyo mwa kulādika bakumbi luombe lwabo.’+
13 “‘Mu bibundi bya ntanda ya ngulu, ne mu bibundi bya kitabataba, ne mu bibundi bya kunshi, ne mu ntanda ya Benjemani, ne mu bifuko bijokolokele Yelusalema,+ ne mu bibundi bya Yuda,+ luombe lukapita monka munshi mwa maboko a yewa wilubala,’ i Yehova unena.”
14 “‘Tala! Mafuku āyanga,’ i Yehova unena, ‘onkafikidija mulao muyampe onalaile pa njibo ya Isalela ne njibo ya Yuda.+
15 Mu oa mafuku ne mu kyokya kitatyi nkalupwila Davida mutombo* moloke,+ kadi ukafikidija bululame ne boloke pa ntanda.+
16 Mu mene mafuku’a, Yuda ukapanda+ Yelusalema nandi ukekala na mutyima-ntenke.+ Kadi bakamwita namino amba: Yehova I Boloke Bwetu.’”+
17 “Mwanda Yehova wanena namino amba: ‘Kekukabulwepo nansha dimo muntu wa ku musuku wa Davida wa kushikata pa lupona lwa njibo ya Isalela,+
18 kadi ku babitobo bene Levi kekukabulwepo muntu wa kwimana ku meso ami mwanda wa kulambula byamulambu bisōkwe bituntulu, wa kusōka byamulambu bya miseke, ne kulambula bitapwa.’”
19 Kadi kinenwa kya Yehova kyaiya monka kudi Yelemia amba:
20 “Yehova wanena namino amba, ‘Shi banwe mwadi mubwanya kutyiba kipwano kyami kya dyuba ne kipwano kyami kya bufuku, kukankaja dyuba ne bufuku bileke kwiya pa kitatyi kyabyo kifwaninwe,+
21 longa kipwano kyami na mwingidi wami Davida kyadi kya kutyibika,+ amba abulwe mwana wa kubikala bu mulopwe pa lupona lwandi,+ ne kipwano kyami na babitobo bene Levi, bengidi bami.+
22 Monka mokebibwanikilapo kubala kibumbo kya mūlu ne kemubwanikilapo kupima musenga wa dijiba, nami e monkavudijija lutundu* lwa mwingidi wami Davida ne bene Levi bañingidila.’”
23 Kadi kinenwa kya Yehova kyaiya monka kudi Yelemia amba:
24 “Le kwivwenepo binena bano bantu amba, ‘Yehova ukela bisaka bibidi byaatongele’? Kadi bapunikanga bantu bami, kebebamwenepo monka bu muzo.
25 “Yehova wanena namino amba: ‘Bine, monka monatūdile’ko kipwano kyami kya dyuba ne bufuku,+ bijila* bya mūlu ne panshi,+
26 mo monkikelelapo lutundu* lwa Yakoba ne lwa mwingidi wami Davida, amba ndeke kuyata ku lutundu* lwandi balopwe ba kubikala pa bana* ba Abalahama, Izake, ne Yakoba. Mwanda nkajokeja misungi+ yabo ne kwiivwanina lusa.’”+
Kunshi kwa Dyani
^ Nansha’mba “mpyana.”
^ Kishima pa kishima i, “lukunwa.”
^ Nansha’mba “bitungo.”
^ Kishima pa kishima i, “lukunwa.”
^ Kishima pa kishima i, “lukunwa.”
^ Kishima pa kishima i, “lukunwa.”
