Yelemia 34:1-22
34 Kinenwa kya Yehova kyaiya kudi Yelemia, kitatyi kyobadi balwa Yelusalema ne bibundi byandi byonso kudi Nebukaneza* mulopwe wa Babiloni pamo ne kibumbo kyandi kyonso kya divita ne malopwe onso a pa ntanda adi mu bufumu bwandi ne bantu bonso+ amba:
2 “Yehova Leza wa Isalela wanena namino amba, ‘Enda ukesambe na Zedekia+ mulopwe wa Yuda umulombole amba: “Yehova wanena namino amba, ‘Nsa kupāna kino kibundi mu kuboko kwa mulopwe wa Babiloni, nandi ukekisōka mudilo.+
3 Ino abe kukapandepo mu kuboko kwandi, mwanda na bubine ukakwatwa ne kupānwa kwadi.+ Ukamona mulopwe wa Babiloni meso kwa meso, nandi ukesamba nobe mpala na mpala, kadi ukenda ku Babiloni.’+
4 Inoko, a Zedekia mulopwe wa Yuda, ivwana kinenwa kya Yehova, ‘Yehova wanena namino pa mwanda obe amba: “Kukafupo ku kipete.
5 Ukafwa mu ndoe,+ kadi bakakwakijija mudilo monka mobaakijije’o bashobe, balopwe ba kala bakubadikidile, kadi bakakudila’mba, ‘Yō, a mfumwetu!’ mwanda ‘nanena kinenwa,’ i Yehova unena.”’”’”
6 Penepo mupolofeto Yelemia walombola Zedekia mulopwe wa Yuda bino binenwa byonso mu Yelusalema,
7 padi palwa bibumbo bya divita bya mulopwe wa Babiloni na Yelusalema ne bibundi byonso bya Yuda byadi bishele’ko,+ ne Lakishi+ ne Azeka;+ mwanda bino byo bibundi bikomejibwe byashele’ko mu bibundi bya Yuda.
8 Kinenwa kya Yehova kyaile kudi Yelemia papwile Mulopwe Zedekia kusamba kipwano na bantu bonso mu Yelusalema kya kwibasapwila bwanapabo,+
9 amba muntu ense ufwaninwe kulekelela bapika bandi Bahebelu, mwana-mulume ne mwana-mukaji, amba kuleke kwikala muntu nansha umo wa kulama mukwabo Muyuda bu umpika wandi.
10 Penepo bamfumu bonso ne bantu bonso bakōkela. Batwela mu kipwano kya amba muntu ense ufwaninwe kulekelela bapika bandi bana-balume ne bana-bakaji kadi kafwaninwepo monka kwibalama bu bapika. Bakōkela, bebaleka bende.
11 Inoko mwenda mafuku bajokeja bapika bana-balume ne bana-bakaji bobalekelele’ba, bebajokeja monka mu bupika ku bukomo.
12 Penepo kinenwa kya Yehova kyaiya kudi Yelemia kitamba kudi Yehova amba:
13 “Yehova Leza wa Isalela wanena namino amba, ‘Nasambile kipwano na bakulutuba+ benu difuku dyonebatambije mu ntanda ya Edipito, mu njibo ya bupika,+ nanena’mba:
14 “Ku mfulo kwa myaka isamba-ibidi, muntu ense ufwaninwe kulekelela mwanabo Muhebelu obakupoteje kadi wakwingidila myaka isamba; ufwaninwe kumulekelela ende.”+ Ino bakulutuba benu kebaivwenepo nansha kuta matwi abo kondi.
15 Kadi kepaijije,* mwaalamukile kemulonga biyampe ku meso ami, mwasapwila bakwenu bwanapabo, kadi mwasambile kipwano ku meso ami mu njibo iselele dijina dyami.
16 Ino kupwa mwaalamuka kemukobakanya dijina dyami+ pa kujokeja bapika benu bana-balume ne bana-bakaji bomwalekelele mwendele kusaka kwabo,* kadi mwebajokeje mu bupika ku bukomo.’
17 “O mwanda Yehova wanena namino amba: ‘Kemunkōkelepo, pa kusapula bwanapabo muntu ne muntu kudi mwanabo ne kudi mukwabo.+ Shi ke pano nsa kwimusapwila bwanapabo,’ i Yehova unena, ‘ku kipete, ku kipupo kya misongo,* ne ku kipupo kya nzala,+ kadi nkemwalamuna kemudi kintu kya nzuba ku malopwe onso a ntanda.+
18 Kadi kino’ki kyo kikafikila bantu bajilwile kipwano kyami pa kuleka kufikidija binenwa bya kipwano kyobasambile ku meso ami pobaladile kyana kya ñombe pabidi, bapita mu bukata bwa mpasu,+
19 ko kunena’mba, bamfumu ba Yuda, bamfumu ba Yelusalema, bengidi ba bulēme ba mu kipango, babitobo ne bantu bonso ba ntanda’ya bapityile mu bukata bwa mpasu ya kyana kya ñombe:
20 Nkebapāna ku balwana nabo ne ku boba bakimba kuyata būmi bwabo,* kadi imbidi yabo mifwe ikekala ke byakudya bya byoni bya mūlu ne bya banyema ba pa ntanda.+
21 Kadi nkapāna Zedekia mulopwe wa Yuda ne bamfumu bandi mu kuboko kwa balwana nabo ne mu kuboko kwa boba bakimba kuyata būmi bwabo* ne mu kuboko kwa bibumbo bya divita bya mulopwe wa Babiloni,+ baleka kulwa nenu.’+
22 “‘Nkasoñanya,’ i Yehova unena, ‘kadi nkebajokejeja ku kino kibundi, nabo bakekilwa, bakekikwata ne kwikisōka mudilo;+ kadi nkalamuna bibundi bya Yuda ke mu ntanda mutuputupu mwampikwa mwikadi.’”+
Kunshi kwa Dyani
^ Kishima pa kishima i, “Nebukadeleza,” mulembelo mukwabo wa dino dijina.
^ Kishima pa kishima i, “dyalelo.”
^ Nansha’mba “muya wabo.”
^ Nansha’mba “misongo.”
^ Nansha’mba “bakimba myuya yabo.”
^ Nansha’mba “bakimba myuya yabo.”
