Yelemia 35:1-19
-
Bene Lekaba abalombola kikōkeji kya kwiulwa (1-19)
35 Kinenwa kya Yehova kyaiya kudi Yelemia mu mafuku a Yehoyakimi+ mwanā Yoshia, mulopwe wa Yuda amba:
2 “Enda ku njibo ya bene Lekaba+ wisambe nabo, wibatweje mu njibo ya Yehova, mu kyumba kimo kya kudīla’mo;* kupwa wibape vinyu batome.”
3 Penepo nasela Yazania mwanā Yelemia mwanā Habazinia, ne banababo, ne bandi bana bonso, ne njibo yonso ya bene Lekaba
4 nebatweja mu njibo ya Yehova. Nebaselela mu kyumba kya kudīla’mo kya bana ba Hanana mwanā Ikedadia, muntu wa Leza wa bine, kyadi kubwipi na kyumba kya kudīla’mo kya bamfumu, kyadi pangala pa kyumba kya kudīla’mo kya Maaseya mwanā Shalumu kalama wa pa kibelo.
5 Penepo natūla bitomeno ne bikombe biyule vinyu ku meso a bantu ba njibo ya bene Lekaba, nebanena’mba: “Tomai vinyu.”
6 Ino abo banena’mba: “Ketusapo kutoma vinyu, mwanda Yehonadaba*+ mwanā Lekaba, mukulutuba wetu, wetusoñenye amba, ‘Kemufwaninwepo kutoma vinyu, banwe ne benu bana.
7 Kadi kemufwaninwepo kūbaka njibo, nansha kukuna nkunwa, nansha kudima nansha kwikala na budimi bwa mañanza. Ino, mufwaninwe kwikala mafuku onso mu mapema, amba mwikale bōmi kitatyi kilampe mu ntanda momushikete bu beni.’
8 O mwanda tukōkele nyeke diwi dya Yehonadaba mwanā mukulutuba wetu Lekaba mu byonso byaetusoñenye, pa kuleka kutoma vinyu—batwe, betu bakaji, betu bana bana-balume ne betu bana bana-bakaji.
9 Kadi ketūbakangapo mobo mwa kwikala, nansha kwikala na madimi a mañanza nansha madimi nansha nkunwa.
10 Tushikete nyeke mu mapema ne kukōkela byonso byetusoñenye Yehonadaba* mukulutuba wetu.
11 Ino kitatyi kyakandile Nebukaneza* mulopwe wa Babiloni kulwa na ntanda’ya,+ twanenene amba, ‘Iyai, twende ku Yelusalema amba tupande ku kibumbo kya divita kya bene Kaladea ne bene Shidea,’ pano tushikete mu Yelusalema.”
12 Ebiya kinenwa kya Yehova kyaiya kudi Yelemia amba:
13 “Yehova wa bibumbo, Leza wa Isalela wanena namino amba, ‘Enda kudi bantu ba Yuda ne bekadi ba Yelusalema wibanene amba: “Le kebadipo bemusoñanya nyeke kukōkela kinenwa kyami?”+ i Yehova unena.
14 “Yehonadaba mwanā Lekaba wasoñenye lutundu lwandi luleke kutoma vinyu, kadi balondanga binenwa byandi, kebatomanga’yopo kufika ne dyalelo, bakōkele ku musoñanya wa mukulutuba wabo.+ Inoko, ami nesambe nenu kyaba ne kyaba,* ino banwe kemunkōkelepo.+
15 Kadi nadi nemutumina’nka kwimutumina bengidi bami bonso bapolofeto, nebatuma kyaba ne kyaba,*+ amba, ‘Nemwisāshila, jokai, banwe bonso ku mashinda enu mabi,+ kadi longai byoloke! Kemwakalondai baleza bakwabo ne kwibengidila. Nabya mukashikata mu ntanda yonemupele banwe ne bakulutuba benu.’+ Ino kemwatelepo kutwi kwenu nansha kungivwana kwine.
16 Lutundu lwa Yehonadaba mwanā Lekaba lulondanga musoñanya webasoñenye mukulutuba wabo,+ ino bano bantu abo kebangivwenepo.”’”
17 “O mwanda Yehova, Leza wa bibumbo, Leza wa Isalela wanena namino amba: ‘Nsa kuletela Yuda ne bekadi bonso ba Yelusalema byamalwa byonso byonebadyumwine,+ mwanda nesambe nabo, ino abo kwivwana mpika, kadi nadi nebeta’nka kwibeta ino abo kwitaba mpika.’”+
18 Kadi Yelemia wanena ba mu njibo ya bene Lekaba amba: “Yehova wa bibumbo, Leza wa Isalela wanena namino amba, ‘Byomwakōkela musoñanya wa mukulutuba wenu Yehonadaba kadi mubalama nyeke misoñanya yandi yonso, mubalonga monka mwaemusoñaninye,
19 Yehova wa bibumbo, Leza wa Isalela wanena’mba: “Ku lutundu lwa Yehonadaba* mwanā Lekaba kekukabulwepo wa kuñingidila ku meso ami.”’”
Kunshi kwa Dyani
^ Nansha’mba “kyumba.”
^ Kishima pa kishima i, “Yonadaba,” dijina Yehonadaba mu kīpi.
^ Kishima pa kishima i, “Yonadaba,” dijina Yehonadaba mu kīpi.
^ Kishima pa kishima i, “Nebukadeleza,” mulembelo mukwabo wa dino dijina.
^ Kishima pa kishima i, “nanguka lubanga futwi nesamba.”
^ Kishima pa kishima i, “nanguka lubanga futwi nebatuma.”
^ Kishima pa kishima i, “Yonadaba,” dijina Yehonadaba mu kīpi.
