Yelemia 38:1-28
38 Penepo Shefatia mwanā Matane, ne Ngedadia mwanā Pashula, ne Yukale+ mwanā Shelemia, ne Pashula+ mwanā Malekiya baivwana binenwa byobanenene bantu bonso kudi Yelemia amba:
2 “Yehova wanena namino amba, ‘Yewa ense ukashala mu kino kibundi ukafwa ku kipete, ku kipupo kya nzala, ne ku kipupo kya misongo.*+ Ino yewa ense uketūla* ku bene Kaladea ukashala mūmi kadi ukekala na būmi bwandi* bu kikwatwa* ne kwikala mūmi.’+
3 Yehova wanena namino amba, ‘Bine kino kibundi kikapebwa kibumbo kya divita kya mulopwe wa Babiloni, nandi ukekikwata.’”+
4 Bamfumu banena mulopwe amba: “Tubakwisāshila ipaya uno muntu,+ mwanda uzozejanga mityima* ya basola bashele mu kino kibundi, ne ya bantu bonso, pa kwibalombola binenwa bya uno muswelo. Mwanda uno muntu ukimbilanga bano bantu kyamalwa, ke ndoepo.”
5 Mulopwe Zedekia walondolola’mba: “Talai! Aye udi mu makasa enu, mwanda mulopwe kabwanyapo kulonga kintu nansha kimo kya kwimukankaja.”
6 Penepo basela Yelemia bakamwela mu kyumbu kya Malekiya mwanā mulopwe, kyadi mu Kipango kya Balami.+ Batūkijija’mo Yelemia na myonji. Ino mu kyumbu kemwadipo mema, mwadi’nka bitoto, ebiya Yelemia washilula kutwela mu bitoto.
7 Ebede-Meleke+ mwine Efiopya, ntungu* wa mu njibo* ya mulopwe waivwana’mba abaela Yelemia mu kyumbu. Mulopwe wadi ushikete mu Kibelo kya Benjemani,+
8 penepo Ebede-Meleke watamba mu njibo* ya mulopwe kanena mulopwe amba:
9 “A mfumwami mulopwe, bano bantu abalonga Yelemia bibi! Abamwela mu kyumbu, kadi usa kufwa’mo nzala, mwanda mu kibundi kemushelepo mikate.”+
10 Penepo mulopwe wasoñanya Ebede-Meleke mwine Efiopya amba: “Sela muno’mu bana-balume 30, mukabulei mupolofeto Yelemia mu kyumbu pakafwile’pa.”
11 Ebiya Ebede-Meleke wasela bana-balume, baenda mu njibo* ya mulopwe munshi mwa kibīko kya byabulēme,+ basela’mo bisasa ne bipēta bya bisandi, batūkijija’byo Yelemia mu kyumbu na myonji.
12 Penepo Ebede-Meleke mwine Efiopya wanena Yelemia amba: “Nakwisāshila patyika bisasa ne bipēta bya bisandi pa bukata bwa mapa obe ne myonji.” Yelemia nandi walongela monka,
13 penepo bakoka Yelemia na myonji, bamwabula mu kyumbu. Ebiya Yelemia waikala mu Kipango kya Balami.+
14 Mulopwe Zedekia waityija mupolofeto Yelemia āye kwadi pa kibelo kya busatu, kya mu njibo ya Yehova, mulopwe wanena Yelemia amba: “Kudi kintu kyonsaka kukwipangula. Kokamfinda kintu nansha kimo.”
15 Penepo Yelemia wanena Zedekia amba: “Shi nkulombole’kyo, bine usa kungipaya. Kadi shi nkudingile kusapo kungivwana.”
16 Ebiya Mulopwe Zedekia watyipila Yelemia kufula’mba: “Bine ne Yehova byadi’ko mūmi, mwine witupele buno būmi,* nkisapo kukwipaya, kadi nkisapo kukupāna ku bano bantu bakimba kuyata būmi bobe.”*
17 Penepo Yelemia wanena Zedekia amba: “Yehova, Leza wa bibumbo, Leza wa Isalela wanena namino amba, ‘Shi uketūle* ku bamfumu ba mulopwe wa Babiloni, būmi bobe bukapanda,* kino kibundi kekikasōkwapo mudilo, kadi abe ne ba mu njibo yobe mukapanda.+
18 Ino shi kuketūdilepo* ku bamfumu ba mulopwe wa Babiloni, kino kibundi kikapānwa ku bene Kaladea, nabo bakekisōka mudilo,+ kadi kukapandepo ku makasa abo.’”+
19 Penepo mulopwe Zedekia wanena Yelemia amba: “Ngivwene moyo wa Bayuda banyemēne ku bene Kaladea, mwanda shi mpānwe kobadi, bakanonga bibi.”
20 Ino Yelemia wanena’mba: “Kukapānwapo kobadi. Nakwisāshila, kōkela diwi dya Yehova mu byonkulombola, nabya bikakwendekela biyampe, kadi ukekala* mūmi.
21 Ino shi upele kuketūla, Yehova waunsokwela namino amba:
22 Tala! Bana-bakaji bonso bashele mu njibo* ya mulopwe wa Yuda abaselelwa ku bamfumu ba mulopwe wa Babiloni,+ kebanena’mba,‘Bana-balume bowadi wikulupile* abakongola kadi abakunekenya.+
Abatweja maulu obe mu bitoto.
Pano abajoka.’
23 Abaselela bobe bakaji ne bobe bana bonso ku bene Kaladea, kadi kukapandepo ku kuboko kwabo, ino ukakwatwa na mulopwe wa Babiloni,+ kadi kino kibundi kikasōkwa mudilo pa mwanda obe.”+
24 Penepo Zedekia wanena Yelemia amba: “Kokalombola muntu nansha umo bino bintu, kutyina’mba wakafwa.
25 Shi bamfumu abaivwana’mba nesambenga nobe kadi abaiya kebakunena’mba, ‘Tubakwisāshila, witulombole byowesambanga na mulopwe. Koketufinda kintu nansha kimo, ketusapo kukwipaya.+ Le mulopwe wakulombolanga bika?’
26 ukebalondolola’mba, ‘Nadi nomba mulopwe aleke kunjokeja ku njibo ya Yehonafane nkafwile’ko.’”+
27 Mwenda mafuku, bamfumu baiya kudi Yelemia kebamwipangula. Nandi webalombola bintu byonso byamusoñenye mulopwe kunena. Nabo kebakimunenenepo kintu, mwanda i kutupu muntu nansha umo waivwene mīsambo yabo.
28 Yelemia wadi wikele’nka mu Kipango kya Balami+ kufika ne difuku dyakwetwe Yelusalema; wadi’nka mwine’mwa kitatyi kyakwetwe Yelusalema.+
Kunshi kwa Dyani
^ Nansha’mba “misongo.”
^ Kishima pa kishima i, “ukatambila.”
^ Nansha’mba “muya wandi.”
^ Nansha’mba “ukapanda na būmi bwandi.”
^ Kishima pa kishima i, “maboko.”
^ Nansha’mba “mwingidi wa bulēme wa mu kipango.”
^ Nansha’mba “njibo mikatakata.”
^ Nansha’mba “njibo mikatakata.”
^ Nansha’mba “njibo mikatakata.”
^ Nansha’mba “witulongēle uno muya.”
^ Nansha’mba “bakimba muya obe.”
^ Kishima pa kishima i, “ukatambile.”
^ Nansha’mba “muya obe ukekala mūmi.”
^ Kishima pa kishima i, “kukatambilepo.”
^ Nansha’mba “muya obe ukekala.”
^ Nansha’mba “njibo mikatakata.”
^ Kishima pa kishima i, “Bana-balume ba ndoe yobe.”
