Yelemia 39:1-18
39 Mu mwaka wa kitema wa Zedekia mulopwe wa Yuda, mu kweji wa dikumi, Nebukaneza* mulopwe wa Babiloni waiya ku Yelusalema na kibumbo kyandi kyonso kya divita, bamutēkela kasāla.+
2 Mu mwaka wa 11 wa Zedekia, mu kweji wa buná, mu difuku dya kitema dya kweji, batubula lubumbu lwa kibundi.+
3 Penepo bamfumu bonso ba mulopwe wa Babiloni batwela, bashikata mu Kibelo kya pa Bukata,+ ko kunena’mba, ba Nekale-Shaleze Shameka, ne Nebo-Salesekimi Labasadise,* ne Nekale-Shaleze Labamaka,* ne bamfumu bakwabo bonso ba mulopwe wa Babiloni.
4 Zedekia mulopwe wa Yuda ne basola bonso pa kwibamona, banyema,+ batamba mu kibundi bufuku mu dishinda dya ku budimi bwa mulopwe, batambila pa kibelo kidi pa bukata bwa mumbu ibidi, baenda mu dishinda dya ku Alaba.+
5 Ino kibumbo kya divita kya bene Kaladea kyebalonda lubilo, kyapeta Zedekia mu malungu adi zolē a Yediko.+ Bamukwata, bakanda nandi kudi Nebukaneza* mulopwe wa Babiloni ku Dibēla+ mu ntanda ya Hamata,+ kwine kwaamutyibīle nsambu.
6 Mulopwe wa Babiloni waipaya bana ba Zedekia mu meso andi ku Dibēla, kadi mulopwe wa Babiloni waipaya ba bulēme bonso ba Yuda.+
7 Ebiya wasaba Zedekia meso, kupwa wamukuta nkano ya mukuba mwa kumuselela ku Babiloni.+
8 Penepo bene Kaladea basōka njibo* ya mulopwe ne mobo a bantu,+ babundula ne mumbu ya Yelusalema.+
9 Nebuzaladana+ mukata wa basola balami wakwata bantu bakwabo bashele mu kibundi, ne boba banyemene baketūla kwadi, ne muntu ense wadi ushele, webaselela ku Babiloni bu misungi.
10 Ino Nebuzaladana mukata wa basola balami washiya mu ntanda ya Yuda bantu bamo balanda bininge, boba kebadipo na kintu. Mu dine difuku’dya webapa bengile* mu madimi a mañanza ne mu madimi.+
11 Penepo Nebukaneza* mulopwe wa Babiloni wasoñanya Nebuzaladana mukata wa basola balami pa mwanda wa Yelemia amba:
12 “Musele umulame; kokamulonga kibi, kadi mupe kyonso kyakulomba.”+
13 Ebiya Nebuzaladana mukata wa basola balami, ne Nebushazebane Labasadise,* ne Nekale-Shaleze Labamaka,* ne bana-balume bonso balēme ba mulopwe wa Babiloni batumanya
14 bakatambije Yelemia mu Kipango kya Balami+ bakamutūle kudi Ngedadia+ mwanā Ahikama+ mwanā Shafana+ amba amuselele ku yandi njibo. Ebiya waikala mu bantu.
15 Yelemia paadi mushityilwe mu Kipango kya Balami,+ kinenwa kya Yehova kyaiya kwadi amba:
16 “Enda ukasapwile Ebede-Meleke+ mwine Efiopya amba, ‘Yehova wa bibumbo, Leza wa Isalela wanena namino amba: “Nsa kufikidija pa kino kibundi binenwa byami bya kyamalwa ke bya biyampepo mhm, kadi mu dine difuku’dya ukekimona kilongeka.”’
17 “‘Ino nkakukūla mu dyodya difuku,’ i Yehova unena, ‘kadi kukapānwapo ku bantu botyina’bo.’
18 “‘Mwanda bine nkakupandija, kadi kukaponepo ku kipete. Ukekala na būmi bobe* bu kikwatwa,*+ mwanda wakulupile mondi,’+ i Yehova unena.”
Kunshi kwa Dyani
^ Kishima pa kishima i, “Nebukadeleza,” mulembelo mukwabo wa dino dijina.
^ Mu mutelelo mukwabo wa bilembwa bya Kihebelu i, “Nekale-Shaleze, ne Shameka-Nebo, Salesekimi, Labasadise.”
^ Nansha’mba “mukata wa ba maleñanya (ubuka na ñenyenye).”
^ Kishima pa kishima i, “Nebukadeleza,” mulembelo mukwabo wa dino dijina.
^ Nansha’mba “njibo mikatakata.”
^ Bibwanika padi i, “mingilo ya kuningilwa.”
^ Kishima pa kishima i, “Nebukadeleza,” mulembelo mukwabo wa dino dijina.
^ Nansha’mba “mukata wa bengidi ba bulēme ba mu kipango.”
^ Nansha’mba “mukata wa ba maleñanya (ubuka na ñenyenye).”
^ Nansha’mba “muya obe.”
^ Nansha’mba “Ukapanda na būmi bobe.”
