Yelemia 40:1-16
40 Kinenwa kya Yehova kyaile kudi Yelemia, pamulekelele Nebuzaladana+ mukata wa basola balami ku Lama.+ Wamuselēle kwine’kwa mukutwe nkano ya ku makasa, kadi wadi mu bukata mwa misungi yonso ya Yelusalema ne ya Yuda yaselēlwe ku Babiloni.
2 Penepo mukata wa basola balami wasela Yelemia kamunena’mba: “Yehova Leza obe walaile kino kyamalwa pa kino kifuko,
3 kadi Yehova walongela monka mwawanenene’kyo, mwanda banwe bantu mwalubīle Yehova kadi kemwakōkelepo diwi dyandi. O mwanda kino’ki kibemufikila.+
4 Pano nakukutulula dyalelo dino’di nkano yadi ku makasa obe. Shi ubamone’mba i biyampe wende nami ku Babiloni, nankyo twaya, nkakulama. Ino shi kusakilepo kwenda nami ku Babiloni, nankyo shala. Tala! Ntanda yonso idi ku meso obe. Enda konso kosaka.”+
5 Yelemia paadi kajokele, Nebuzaladana wamunena’mba: “Jokela kudi Ngedadia+ mwanā Ahikama+ mwanā Shafana+ obatonga kudi mulopwe wa Babiloni kutala bibundi bya Yuda, kashikate nandi mu bantu; nansha kadi enda konso kosaka.”
Penepo mukata wa basola balami wamupa mposo ne kyabuntu, kupwa wamuleka ende.
6 Ebiya Yelemia waenda kudi Ngedadia mwanā Ahikama ku Mizipa,+ kashikete nandi mu bantu bashele mu ntanda’ya.
7 Mwenda mafuku, bakata bonso ba kibumbo kya divita badi mu ntanda ne bana-balume babo baivwana’mba mulopwe wa Babiloni watonge Ngedadia mwanā Ahikama kutala ntanda, ne amba wamutonge kutala bana-balume ne bana-bakaji ne bana ba mu balanda ba ntanda’ya kebaselēlwepo ku Babiloni.+
8 Penepo baiya kudi Ngedadia ku Mizipa.+ I ba Ishemele+ mwanā Netania, Yohanana+ ne Yonafane bana ba Kalea, Selaya mwanā Tanehumete, bana ba Efai mwine Netofa, ne Yezania+ mwanā mwine Makati pamo ne bana-balume babo.
9 Ngedadia mwanā Ahikama mwanā Shafana webatyipila mutyipo abo ne bana-balume babo amba: “Kemukikwatwai moyo wa kwingidila bene Kaladea. Shikatai mu ino ntanda mwingidile mulopwe wa Babiloni, nabya bikemwikadila biyampe.+
10 Ino ami nkashikata mu Mizipa mwanda wa kwimunenena kudi* bene Kaladea bāya kotudi. Inoko mufwaninwe kukongakanya vinyu, ne bipa bya ku dikumbi, ne māni mwibyele mu bibīko byenu, mushikate mu bibundi byomwayata.”+
11 Kadi Bayuda bonso badi mu Moabu, ne mu Amone, ne mu Edoma, ne boba badi mu matanda makwabo onso, nabo baivwana’mba mulopwe wa Babiloni waleka bashele’ko bashikate mu Yuda ne amba watonge Ngedadia mwanā Ahikama mwanā Shafana kwibatala.
12 Penepo Bayuda bonso bashilula kujoka ku bifuko byonso kobadi bapalakenine, baiya ku ntanda ya Yuda kudi Ngedadia ku Mizipa. Bakongakanya vinyu ne bipa bya ku dikumbi bingibingi.
13 Yohanana mwanā Kalea ne bakata bonso ba kibumbo kya divita badi mu ntanda, baiya kudi Ngedadia ku Mizipa.
14 Bamunena’mba: “Kuyukilepo amba Badise, mulopwe wa bene Amone+ watume Ishemele mwanā Netania kukwipaya?”*+ Ino Ngedadia mwanā Ahikama kebetabijepo.
15 Penepo Yohanana mwanā Kalea wasapwila Ngedadia mu Mizipa kufula’mba: “Nsaka ñende nkepaye Ishemele mwanā Netania, i kutupu muntu usa kuyuka. Le kyasaka kukwipaila* i kika, ne i kika kisa kupalakena bantu bonso ba Yuda bebungile kodi, ne kine kisa kwipailwa bashele’ko ba Yuda?”
16 Ino Ngedadia+ mwanā Ahikama wanena Yohanana mwanā Kalea amba: “Kokalonga byabyo, mwanda ubabepela Ishemele bubela.”
Kunshi kwa Dyani
^ Kishima pa kishima i, “kwimana ku meso a.”
^ Nansha’mba “kukupila muya obe?”
^ Nansha’mba “kukupidila muya obe.”
