Yelemia 41:1-18
41 Mu kweji wa busamba-bubidi, Ishemele+ mwanā Netania mwanā Edishama, wa ku musuku wa bulopwe* kadi mwana-mulume mulēme wa mulopwe, waiya na bana-balume bakwabo dikumi kudi Ngedadia mwanā Ahikama ku Mizipa.+ Pobadi badya byakudya pamo mu Mizipa,
2 Ishemele mwanā Netania ne bana-balume dikumi baadi nabo baimana, baipaya Ngedadia mwanā Ahikama mwanā Shafana na kipete. Enka nenki waipaya yewa watongelwe na mulopwe wa Babiloni kutala ntanda.
3 Ishemele waipaya ne Bayuda bonso badi na Ngedadia mu Mizipa, ne basola bene Kaladea badi’mo.
4 Mu difuku dya bubidi Ngedadia pa kupwa kwipaibwa, kumeso kwa muntu nansha umo kuyuka’o,
5 kwaiya bana-balume 80 batambile ku Shekema,+ ku Shilo,+ ne ku Samadia.+ Myevu yabo mitende, bivwalwa byabo bisanike, beketekete bilonda abo bene,+ kadi badi na byamulambu bya miseke ne ensense itōka+ mu makasa abo bya kuleta ku njibo ya Yehova.
6 Penepo Ishemele mwanā Netania watamba ku Mizipa kukebatundaila, wenda udila. Aye pa kwibasambakana, webanena’mba: “Iyai kudi Ngedadia mwanā Ahikama.”
7 Ino abo pa kutwela mu kibundi, Ishemele mwanā Netania ne bana-balume bandi bebatapa kupwa bebela mu kyumbu.
8 Ino kwadi bana-balume dikumi mu bukata mwabo banenene Ishemele amba: “Koketwipaya, mwanda twi bafye bibīko bya ñano, mebele a buluba, māni, ne būki mu ntanda.” Penepo waleka kwibepaya pamo na banababo.
9 Kupwa Ishemele waela imbidi yonso mifwe ya bana-balume bawaipaile mu kyumbu kikatampe, kyakolele Mulopwe Asa pa mwanda wa Baasha mulopwe wa Isalela.+ Kino’ki kyo kyumbu mwayujije Ishemele mwanā Netania bana-balume batapwe.
10 Ishemele wasela bantu bonso bashele’ko mu Mizipa+ bu misungi, ne bana ba mulopwe bana-bakaji ne bantu bonso bashele mu Mizipa, baelelwe mu buloko bwa Ngedadia+ mwanā Ahikama na Nebuzaladana mukata wa basola balami. Ishemele mwanā Netania webasela bu misungi waabuka nabo bukila bwa bene Amone.+
11 Yohanana+ mwanā Kalea ne bakata bonso ba kibumbo kya divita baadi nabo pa kwivwana bibi byonso byalongele Ishemele mwanā Netania,
12 basela bana-balume bonso baenda kukalwa na Ishemele mwanā Netania, bamutana dya ku mema makatampe* mu Ngibeone.
13 Bantu bonso badi na Ishemele basangala pa kumona Yohanana mwanā Kalea ne bakata bonso ba kibumbo kya divita badi nandi.
14 Penepo bantu bonso bobaselele bu misungi ku Mizipa+ kudi Ishemele baalamuka, bajoka na Yohanana mwanā Kalea.
15 Ino Ishemele mwanā Netania ne bandi bana-balume mwānda, banyema Yohanana baenda kudi bene Amone.
16 Yohanana mwanā Kalea ne bakata bonso ba kibumbo kya divita baadi nabo, basela bantu bashele’ko ba ku Mizipa, boba bobakūdile kwa Ishemele mwanā Netania paapwile kwipaya Ngedadia+ mwanā Ahikama. Basela bana-balume, basola, bana-bakaji, bana, ne bengidi ba bulēme ba mu kipango bebajokeja kutamba ku Ngibeone.
17 Penepo baenda kebashikete mu nkambi ya Kimehame kubwipi na Betelema,+ bakimba kwenda ku Edipito+
18 pa mwanda wa bene Kaladea. Ke-pantu badi bebatyina, mwanda Ishemele mwanā Netania waipaile Ngedadia mwanā Ahikama, watongelwe na mulopwe wa Babiloni kutala ntanda.+
