Yelemia 42:1-22
42 Penepo bakata bonso ba kibumbo kya divita, ne Yohanana+ mwanā Kalea, ne Yezania mwanā Hoshaia, ne bantu bonso, kushilwila ku mutyetye bininge kutūla ne ku mukatampe bininge, bafwena
2 kebanena mupolofeto Yelemia amba: “Tubakwisāshila, ivwana kulomba kotukulomba kutōkelwa mutyima, witulombelele’ko kudi Yehova Leza obe, ulombelele’ko ne bano bonso bashele’ko,+ mwanda twadi bavule ino tubashala’tu batyetye, enka momwenine’kyo’mu.
3 Yehova Leza obe etulombole dishinda dyotufwaninwe kwenda ne byotufwaninwe kulonga.”
4 Mupolofeto Yelemia webalondolola’mba: “Nemwivwana, nsa kulombela kudi Yehova Leza wenu mungya kulomba kwenu; kadi kinenwa kyonso kikemulondolola Yehova, nkemulombola’kyo. Nkikemufindapo kinenwa nansha kimo.”
5 Nabo balondolola Yelemia amba: “Yehova ekale kamoni wa bine ne wa binebine kotudi shi ketulongelepo monka musa kwitulombwela Yehova Leza obe kupityila kudi abe.
6 Kikale kiyampe nansha kibi, tukakōkela diwi dya Yehova Leza wetu kotwakutuma, amba bitwikadile biyampe mwanda tubakōkela diwi dya Yehova Leza wetu.”
7 Ebiya mafuku dikumi pa kupita’po, kinenwa kya Yehova kyaiya kudi Yelemia.
8 Penepo waita Yohanana mwanā Kalea ne bakata bonso ba kibumbo kya divita baadi nabo ne bantu bonso, kushilwila ku mutyetye bininge kutūla ne ku mukatampe bininge.+
9 Webanena amba: “Yehova Leza wa Isalela, komwantumine kukemulombela emutōkelwe mutyima, wanena namino amba:
10 ‘Bine shi mwikale mu ino ntanda, nabya nkemūbaka, nkikemupomonapo, kadi nkemukuna, ino nkikemutukunapo, mwanda nkealakanya* pa kyamalwa kyonemuletela.+
11 Kemwakikwatwai moyo pa mwanda wa mulopwe wa Babiloni omutyina’ye.’+
“‘Kemwakamutyinai,’ i Yehova unena, ‘mwanda ami ngidi nenu mwanda wa kwimupandija ne kwimukūla ku kuboko kwandi.
12 Kadi nkemukwatyilwa lusa,+ nandi ukemwivwanina lusa ne kwimujokeja ku yenu ntanda.
13 “‘Ino shi munene amba, “Aa, ketusapo kwikala mu ino ntanda!” kadi muleke kukōkela diwi dya Yehova Leza wenu
14 kemunena’mba, “Aa, tusa kwenda’nka mu ntanda ya Edipito,+ moketukamonepo divita nansha kwivwana kuvuma kwa lusengo nansha kwivwana nzala ya mukate; momwa ye motukekala,”
15 ino, a bashele’ko ba Yuda, ivwanai kinenwa kya Yehova. Yehova wa bibumbo, Leza wa Isalela wanena namino amba: “Shi musumininwe’nka kwenda ku Edipito kadi mwende mukekale’ko,*
16 nabya kipete kyomutyina’kyo kikemupeta mu ntanda ya Edipito, kadi kipupo kya nzala kyomutyina kikemulonda mu Edipito, mukafwila’mo.+
17 Kadi bantu bonso basumininwe kwenda mu Edipito kukashikata’mo, bakafwila’mo ku kipete, ku kipupo kya nzala, ne ku kipupo kya misongo.* I kutupu nansha umo ukashala mūmi nansha kupanda ku kyamalwa kyonkebaletela.”’
18 “Mwanda Yehova wa bibumbo, Leza wa Isalela wanena namino amba: ‘Monka mwapungulukile bulobo bwami ne bukalabale bwami pa bekadi ba Yelusalema,+ mo mukapungulukila bukalabale bwami pomudi shi mwende mu Edipito, kadi banwe mukekalanga mafingo, ne kintu kya nzuba, ne kafutululo ne mutonko,+ kadi kemukamonepo monka kino kifuko.’
19 “A bashele’ko ba Yuda, Yehova wesambe pa mwanda wenu. Kemwakyendai mu Edipito. Mufwaninwe kuyuka na bubine amba nemudyumuna dyalelo dino’di
20 amba mukafuta būmi bwenu* pa kilubo kyenu. Mwanda mwauntumine kudi Yehova Leza wenu amba, ‘Witulombelele’ko kudi Yehova Leza wetu, kupwa witusapwile kintu kyonso kikanena Yehova Leza wetu, netu tukekilonga.’+
21 Nemusapwila dyalelo dino’di, inoko kemusapo kukōkela diwi dya Yehova Leza wenu nansha kulonga kintu kyaantuma kwimulombola.+
22 O mwanda, yukai na bubine amba mukafwa ku kipete, ku kipupo kya nzala, ne ku kipupo kya misongo mu kifuko komusaka kwenda mukashikate’ko.”+
Kunshi kwa Dyani
^ Nansha’mba “nkevwana njia.”
^ Nansha’mba “mukekale’ko kitatyi kityetye.”
^ Nansha’mba “misongo.”
^ Nansha’mba “myuya yenu.”
