Yelemia 44:1-30
44 Kinenwa kyaiya kudi Yelemia pa mwanda wa Bayuda bonso badi bashikete mu ntanda ya Edipito,+ boba badi bashikete mu Mikedole,+ Tapanese,+ Nofe,*+ ne mu ntanda ya Patalose,+ amba:
2 “Yehova wa bibumbo, Leza wa Isalela, wanena namino amba, ‘Mubamone byamalwa byonso byonaleta pa Yelusalema+ ne pa bibundi byonso bya Yuda, kadi dyalelo dino’di bidi mu masala, mwampikwa mwikadi.+
3 I pa mwanda wa bintu bibi byobalongele mwanda wa kunsanshija pa kwenda kebalambula bitapwa+ ne kwingidila baleza bakwabo bokebadipo bayukile abo, ne banwe ne bakulutuba benu bene.+
4 Nadi nemutumina’nka kwimutumina bengidi bami bonso bapolofeto, nebatuma kyaba ne kyaba* amba: “Nemwisāshila kemwakilongai kino kintu kya munyanji kyonshikilwe.”+
5 Ino abo kebaivwenepo nansha kuta kutwi kwabo amba bavundamine bibi byabo, baleke kulambula bitapwa ku baleza bakwabo.+
6 Penepo bukalabale bwami ne bulobo bwami bwapunguluka ne kwaka mu bibundi bya Yuda ne mu bipito bya Yelusalema, byaikala ke masala ne mu ntanda mutuputupu, na mobikadile dyalelo.’+
7 “Pano Yehova, Leza wa bibumbo, Leza wa Isalela wanena namino amba, ‘Le i kika kyomwiletelela* kyamalwa kikatampe, amba mwana-mulume ense ne mwana-mukaji, ne mwana ne mwana mutyetye, akafwe mu Yuda, kwampikwa nansha umo ushala’ko?
8 Mwanda waka munsanshija na mingilo ya makasa enu, kemulambula bitapwa ku baleza bakwabo mu ntanda ya Edipito momwaenda kukashikata? Musa kufwa kadi musa kwikala kintu kya mafingo ne mutonko mu mizo yonso ya pano pa ntanda.+
9 Le mubailwa bilongwa bibi bya bakulutuba benu, ne bilongwa bibi bya balopwe ba Yuda,+ ne bilongwa bibi bya babo bakaji,+ ne bilongwa byenu bibi ne bilongwa bibi bya benu bakaji,+ byalongelwe mu ntanda ya Yuda ne mu bipito bya Yelusalema?
10 Kufika ne dyalelo kebetyepejepo,* kebakwetwepo moyo,+ kadi kebanangilangapo mu bijila ne bitungo byami byonatūdile ku meso enu ne a bakulutuba benu.’+
11 “Shi ke pano Yehova wa bibumbo, Leza wa Isalela wanena namino amba, ‘Ami ne musumininwe kwimuletela kyamalwa, konakanya Yuda ense.
12 Kadi nkasela bashele’ko ba Yuda badi basumininwe kwenda kukashikata ku ntanda ya Edipito, bonso bakafwa mu ntanda ya Edipito.+ Bakapona ku kipete ne kufwa ku kipupo kya nzala; bakafwa ku kipete ne ku kipupo kya nzala, kushilwila ku mutyetye bininge kutūla ne ku mukatampe bininge. Bakekala ke mafingo, kintu kya nzuba, kafutululo ne mutonko.+
13 Nkapa boba bekele mu ntanda ya Edipito mfuto monka monapedile’yo Yelusalema, na kipete, ne kipupo kya nzala, ne kipupo kya misongo.*+
14 Kadi bashele’ko ba Yuda baendele kukashikata mu ntanda ya Edipito, kebakapandepo nansha kwikala bōmi amba bajokele mu ntanda ya Yuda. Bakabila bininge* kujoka ne kwikala’mo, ino kebakajokapo, poso batyetye’tu bakapanda.’”
15 Bana-balume bonso badi bayukile amba babo bakaji balambwile bitapwa ku baleza bakwabo ne bakaji bonso badi bemene kwine’kwa, balongele kibumbo kikatampe, ne bantu bonso badi bashikata mu ntanda ya Edipito,+ mu Patalose,+ balondolola Yelemia amba:
16 “Ketusapo kwivwana kinenwa kyowetulombola mu dijina dya Yehova.
17 Ino tusa kufikidija kinenwa kyonso kyotwesambile mu byakanwa byetu, kya kulambula bitapwa kudi Mulopwe Mukaji wa Mūlu* ne kumupungulwila byamulambu bya bitomibwa,+ monka motwalongele batwe, ne bakulutuba betu, ne balopwe betu, ne bamfumu betu mu bibundi bya Yuda ne mu bipito bya Yelusalema potwadi twikuta mikate twikele biyampe, poketwadipo tumona kyamalwa nansha kimo.
18 Tamba kitatyi kyotwalekele kulambula bitapwa kudi Mulopwe Mukaji wa Mūlu* ne kumupungulwila byamulambu bya bitomibwa, twi babulwe bintu byonso kadi tubakube ku kipete ne ku kipupo kya nzala.”
19 Bana-bakaji babweja’ko amba: “Potwadi tulambula bitapwa kudi Mulopwe Mukaji wa Mūlu* ne kumupungulwila byamulambu bya bitomibwa, mwene betu balume baitabije twele bitapwa bya mikate itobala imwifwene ne kumupungulwila byamulambu bya bitomibwa?”
20 Penepo Yelemia wanena bantu bonso, bana-balume ne babo bakaji ne bantu bonso badi besamba nandi amba:
21 “Bitapwa byomwalambwile banwe, ne bakulutuba benu, ne balopwe benu, ne bamfumu benu, ne bantu ba ntanda’ya mu bibundi bya Yuda ne mu bipito bya Yelusalema+—Yehova wadi wibivuluka kadi byadi bimwiya ku mutyima!
22 Ku mfulo Yehova kabwenyepo kadi monka kutyumwina mu manwi bilongwa byenu bibi ne bintu bya munyanji byomwalongele, kadi ntanda yenu yaalamukile ke kifuko kisalwe, kintu kya nzuba ne mafingo, mwampikwa mwikadi nansha umo, na mobikadile dyalelo.+
23 I pa mwanda mubalambula bino bitapwa kadi mubalubila Yehova, mubaleka kukōkela diwi dya Yehova ne kulonda bijila byandi, ne bitungo byandi, ne bivulujo byandi, o mwanda kino kyamalwa kibemufikila, na mobikadile dyalelo.”+
24 Yelemia walombola monka bantu bonso ne bana-bakaji bonso amba: “Banwe bantu bonso ba Yuda badi mu ntanda ya Edipito, ivwanai kinenwa kya Yehova.
25 Yehova wa bibumbo, Leza wa Isalela, wanena namino amba, ‘Byomwanena banwe ne benu bakaji na byakanwa byenu, mubebifikidija na maboko enu, mwanda mwanenene amba: “Bine, tukafikidija mpiko yetu ya kulambula bitapwa kudi Mulopwe Mukaji wa Mūlu* ne kumupungulwila byamulambu bya bitomibwa.”+ Banwe bana-bakaji musa kufikidija mpiko yenu ne kuvuija mpiko yenu bya binebine.’
26 “O mwanda ivwanai kinenwa kya Yehova, banwe bantu bonso ba Yuda bashikete mu ntanda ya Edipito: ‘“Natyipe pa dijina dyami dikatampe,” i Yehova unena, “amba muntu ense wa Yuda+ udi mu ntanda yonso ya Edipito unena’mba ‘Bine ne Mfumu Mwinē Lupusa Lonso Yehova byadi’ko mūmi!’ kakatelapo monka dijina dyami mu mutyipo.+
27 Pano nebatalanga mwanda wa kwibaletela kyamalwa, ke kintupo kiyampe;+ bantu bonso ba Yuda badi mu ntanda ya Edipito bakafwa ku kipete ne ku kipupo kya nzala, kufika ne byobatukila tukituki.+
28 I batyetye kete bakapanda ku kipete, bakatamba ku ntanda ya Edipito ne kujokela ku ntanda ya Yuda.+ Penepo bashele’ko bonso ba Yuda baile kushikata ku ntanda ya Edipito bakayuka shi kinenwa kya bine i kya ani, shi i kyami shi i kyabo!”’”
29 “‘Kadi kino kyo kiyukeno komudi,’ i Yehova unena, ‘kilombola’mba nkemupa mfuto mu kino kifuko, mwanda wa muyuke amba binenwa byami byemulaile kyamalwa bikafikidila binebine.
30 Yehova wanena namino amba: “Felo Hofela mulopwe wa Edipito, nsa kumupāna mu kuboko kwa balwana nandi ne boba bakimba kuyata būmi bwandi,* pamo’nka na monapānine Zedekia mulopwe wa Yuda mu kuboko kwa Nebukaneza* mulopwe wa Babiloni, walwana nandi kadi wadi ukimba kuyata būmi bwandi.”’”*+
Kunshi kwa Dyani
^ Nansha’mba “Memfise.”
^ Kishima pa kishima i, “nanguka lubanga futwi nebatuma.”
^ Nansha’mba “kyomuletela myuya yenu.”
^ Nansha’mba “kebevwenepo mutyima kusonsakanibwa.”
^ Nansha’mba “misongo.”
^ Nansha’mba “Bakatulula muya wabo.”
^ Kitenta kya leza mukaji wadi utōtwa na bene Isalela batupondo; pakwabo i leza mukaji wa bumeni.
^ Kitenta kya leza mukaji wadi utōtwa na bene Isalela batupondo; pakwabo i leza mukaji wa bumeni.
^ Kitenta kya leza mukaji wadi utōtwa na bene Isalela batupondo; pakwabo i leza mukaji wa bumeni.
^ Kitenta kya leza mukaji wadi utōtwa na bene Isalela batupondo; pakwabo i leza mukaji wa bumeni.
^ Nansha’mba “bakimba muya wandi.”
^ Kishima pa kishima i, “Nebukadeleza,” mulembelo mukwabo wa dino dijina.
^ Nansha’mba “wadi ukimba muya wandi.”
