Yelemia 51:1-64
51 Yehova wanena namino amba:
“Nsa kutetula kivula kya kyonakanyaPa Babiloni+ ne pa bekadi ba Lebe-Kamai.*
2 Nkatuma bapēpi ku Babiloni,Bakamupēpa ne kumwalamuna ke ntanda mutupu kintu;Bakāya kumulwa ku mitamba yonso mu difuku dya kyamalwa.+
3 Yewa wela miketo kakikana* buta bwandi bwa miketo.
Kadi muntu nansha umo kakemana uvwele kotyi wa byuma.
Kemwakifwilai bansongwalume bandi lusa.+
Onakanyai kibumbo kyandi kyonso kya divita.
4 Kadi bakapona batapwe mu ntanda ya bene Kaladea,Basabakanibwe mu bipito byandi.+
5 Mwanda Isalela ne Yuda ke bakajipo ba kishala kudi Leza wabo, kudi Yehova wa bibumbo.+
Ino ntanda* yabo i miyule mambo mungya mumweno wa Mwine Ujila wa Isalela.
6 Nyemai mu bukata mwa Babiloni,Pandijai būmi bwenu.*+
Kemwakyonekai pa mwanda wa kilubo kyandi.
Mwanda i kitatyi kya kinongo kya Yehova.
Umulubwilanga kinongo pa byobya byalongele.+
7 Babiloni i kitomeno kya olo mu kuboko kwa Yehova;Walengeja ntanda yonso ikolwe.
Mizo ibakolwe vinyu yandi;+O mwanda mizo ibabela bulubi.+
8 Babiloni wapone mu kitulumukila kadi watyumuka.+
Yoyokotai miyoa pa mwanda wandi!+
Selai balasome mwanda wa misanshi yandi; padi ubwanya kukoma.”
9 “Twatompele kundapa Babiloni, ino kakomenepo.
Mushiyei twendei, muntu ne muntu ku yandi ntanda.+
Mwanda butyibi bwandi bubafika mūlu;Budi peulu enka ne mu makumbi.+
10 Yehova wetubingija.+
Iyai, twisambei mu Ziona mwingilo wa Yehova Leza wetu.”+
11 “Nonai miketo;+ selai mangabo majokoloke.*
Yehova watununa mushipiditu wa balopwe ba Mede,+Mwanda ukimbanga konakanya Babiloni.
Mwanda kino i kinongo kya Yehova, kinongo kya pa mwanda wa tempelo yandi.
12 Shimikilai mumbu ya Babiloni kiyukeno.*+
Komejai balami, mutūle batulama.
Teakanyai boba bajikīle.
Mwanda Yehova wakale manwa,Kadi ukafikidija byobya byalaile pa bekadi ba Babiloni.”+
13 “A mwana-mukaji ushikete pa mema mangimangi,+Na byabulēme bingibingi,+Mfulo yobe ibafika, mfulo ya* tumweno tobe.+
14 Yehova wa bibumbo watyipe padi aye mwine* amba,‘Nkakudinga bana-balume, bangi pamo bwa njie,Kadi bakakutūta kyungwe kya bushindañani.’+
15 Aye ye Mulongi walongele ntanda na bukomo bwandi,Mwine wakomeje ntanda ipa bipa na tunangu twandi+Kadi watamwine madiulu na ñeni yandi.+
16 Palupulanga diwi dyandi,Mema mūlu atūtanga,Kadi ukandijanga makumbi* tamba ku mafulo a ntanda.
Upenejanga mapeni a* mvula,Kadi utambijanga kivula mu bibīko byandi.+
17 Muntu ense uloñanga bintu kwampikwa kulanga ne kwampikwa kuyuka.
Mwingidi ense ufula byuma ukafwijibwa bumvu pa mwanda wa nkishi musōnge;+Mwanda nkishi wandi wa kyuma* i wa bubela,Kadi munda mwabo i mutupu mushipiditu.*+
18 I ba bubelabubela,*+ mwingilo wa kuzobejibwa.
Shi difuku dyabo dya mfuto dibafika, bakoneka.
19 Kyepelo kya Yakoba, aye kadipo pamo bwa bino bintu,Mwanda aye ye Mwine walongele bintu byonso,Enka ne mukombo wa bupyani bwandi.+
Dijina dyandi i Yehova wa bibumbo.”+
20 “Abe wi umpebwe wami wa divita, kyabulwi kya kulwa nakyo,Mwanda nkavingakanya nobe mizo.
Nkonakanya nobe malopwe.
21 Nkavingakanya nobe kabalwe ne ukandile’po.
Nkavingakanya nobe dikalo dya divita ne ukandile’mo.
22 Nkavingakanya nobe mwana-mulume ne mwana-mukaji.
Nkavingakanya nobe mununu ne mwanuke.
Nkavingakanya nobe nsongwalume ne nsongwakaji.
23 Nkavingakanya nobe mukumbi ne luombe lwandi.
Nkavingakanya nobe kidimye ne kibumbo kyandi kya banyema.
Nkavingakanya nobe bambikavu ne baledi bampingakani.
24 Kadi nkalubwila Babiloni ne bekadi bonso ba Kaladea kinongoPa mwanda wa bibi byonso byobalongele mu Ziona ku meso enu,”+ i Yehova unena.
25 “A lūlu lwa kyonakanya, nsa kulwa nobe,”+ i Yehova unena,“Abe onakanya ntanda yonso.+
Nkōlola kuboko kwami podi ne kukwalañanya pa bimabweKadi nkakwalamuna kodi lūlu lutēme.”
26 “Bantu kebakakuselapo dibwe dya difinko nansha dibwe dya kyalwilo,Mwanda ukekala masala a nyeke,”+ i Yehova unena.
27 “Shimikai kiyukeno* mu ntanda.+
Ilai lusengo mu mizo.
Tongai* mizo ya kulwa nandi.
Mwityilei malopwe a Alalata,+ a Mini, ne a Ashekenaza.+
Mutūdilei mudyavita mulembi.
Kandijai tubalwe pamo bwa njie myana.
28 Tongai* mizo ya kulwa nandi,Balopwe ba Media,+ ne bambikavu bandi ne baledi bandi bonso bampingakaniNe matanda onso obaludika.
29 Kadi ntanda ikatenkana ne kuzakala,Mwanda milangwe ya Yehova pa Babiloni ikafikidilaMwanda wa kwalamuna ntanda ya Babiloni ke kintu kya nzuba, mwampikwa mwikadi.+
30 Bantu ba bulwi ba Babiloni abaleka kulwa.
Abashikata mu bifuko byabo bikomejibwe.
Bukomo bwabo bubatunya.+
Abaikala pamo bwa bana-bakaji.+
Mobo andi abasōkwa mudilo.
Mikabo yandi ibatyumunwa.+
31 Musedi umo wa mikanda unyema kukasambakana musedi mukwabo wa mikanda,Kadi mukendi umo ukasambakana mukendi mukwabo,Mwanda wa kukasapwila mulopwe wa Babiloni amba kibundi kyandi kibakwatwa ku mitamba yonso,+
32 Amba byabu bya lwa ntobwa* bibakwatwa,+Amba mato a mbuba abasōkwa mudilo,Ne amba basola abatuyuka.”
33 Mwanda Yehova wa bibumbo, Leza wa Isalela wanena namino amba:
“Mwanā Babiloni mwana-mukaji udi pamo bwa kipūdilo.
I kitatyi kya kumutyimpila panshi bininge.
Panopano ponka kitatyi kya mwangulo kisa kumufikila.”
34 “Nebukaneza* mulopwe wa Babiloni wansasamuna;+Wangela mu kavutakanya.
Wantūla panshi pamo bwa kipungwa mutupu kintu.
Waumina pamo bwa nyoka mukatampe;+Wadinge bintu byami bilumbuluke mu kifu kyandi.
Wampitula.
35 ‘Bibi byobanongele ami ne ngitu yami bīye pa Babiloni!’ i mwikadi wa Ziona unena.+
‘Kadi mashi ami āye pa bekadi ba Kaladea!’ i Yelusalema unena.”
36 O mwanda Yehova wanena namino amba:
“Nsa kwimunenena mu kisambo,+Kadi nkalubula kinongo pa mwanda wenu.+
Nkomija dijiba dyandi ne kūmija mishimwa yandi.+
37 Babiloni ukekala ke milwi ya mabwe,+Kīkalo kya mizeu,+Kintu kya nzuba kadi kintu kya kwidilwa muluji,Mwampikwa mwikadi.+
38 Abo bonso bakabuluma pamo bwa bantambo bana.*
Bakongoloma pamo bwa bana ba ntambo.”
39 “Pakavula kusakasaka kwabo, nkalongolola masobo abo ne kwibalengeja bakolwe,Amba basepelele;+Kupwa bakalāla tulo twa myaka na myaka,Tokebakalangukapo,”+ i Yehova unena.
40 “Nkebatūkija pamo bwa twana twa mikōko twenda ku kutapwa,Pamo bwa mikōko milume ne bambuji.”
41 “Yō Sheshake* wakwatwa,+Yō Mitendelo ya ntanda yonso ibayatwa!+Yō Babiloni waikala ke kintu kya nzuba mu mizo!
42 Dijiba dibaiya pa Babiloni.
Wapūtwa na mantanki adyo mangimangi.
43 Bibundi byandi bibaikala ke kintu kya nzuba, ntanda yampikwa mema kadi mu ntanda mudi zolē.
Ntanda kemukekalapo muntu nansha umo kadi kemukapitepo muntu.+
44 Nkata Bele+ mutyima mu Babiloni,Kadi nkalupula mu kyakanwa kyandi kyokya kyaminine.+
Mizo keikatūtyikilapo kwadi monka,Kadi lubumbu lwa Babiloni lukapona.+
45 A bantu bami tambai mu bukata mwandi!+
Pandijai būmi bwenu*+ ku bulobo budyendyemuka bwa Yehova!+
46 Kemwakizozejai mityima nansha kukwatwa moyo pa myanda yomusa kwivwana mu ntanda.
Myanda ikāya mu mwaka umo,Kadi mu mwaka mukwabo myanda mikwabo,Ya lūma mu ntanda ne ya mulopwe utamba mulopwe mukwabo.
47 O mwanda talai! mafuku āyangaOnkata mutyima bankishi basōnge ba Babiloni.
Ntanda yandi yonso ikafwa bumvu,Kadi bantu bandi bonso batapwe bakapona mu bukata mwandi.+
48 Madiulu ne ntanda ne bintu byonso bidi’moBikela nsadi ya tusepo pa Babiloni,+Mwanda boba ba kumonakanya bakāya kwadi batamba kungala,”+ i Yehova unena.
49 “Babiloni kaponejepo enka bantu batapwe ba Isalela+Ino kadi bantu batapwe ba ntanda yonso baponene ku Babiloni.
50 Banwe bapandile ku kipete, endai’nka kwenda, kemukimanai!+
Vulukai Yehova kulampe,Kadi Yelusalema akande mu mityima yenu.”+
51 “Tubafwijibwa bumvu, mwanda tubaivwana kukolomonwa.
Bumvu bubetupūta mu mapala,Mwanda beni abaiya kutamba bifuko bijila bya njibo ya Yehova.”+
52 “O mwanda talai! mafuku āyanga,” i Yehova unena,“Onkata mutyima bankishi bandi basōnge,Kadi boba batapwe bilonda bakabinza mu ntanda yandi yonso.”+
53 “Nansha shi Babiloni akande mūlu,+Nansha shi akomeje bifuko byandi bikomejibwe bipuñame,Ba kumonakanya bakatamba kondi,”+ i Yehova unena.
54 “Tejai! Mu Babiloni mudi kudila,+Mu ntanda ya bene Kaladea mudi lunwa lwa kyamalwa kikatampe,+
55 Mwanda Yehova waonakanya Babiloni,Ukatalaja diwi dyandi dikatampe,Kadi mantanki abo akatūta pamo bwa mema mangi.
Lunwa lwa diwi dyabo lukevwanwa.
56 Mwanda yewa onakanya ukāya pa Babiloni;+Bantu bandi ba bulwi bakakwatwa,+Mata abo a miketo akavingakanibwa,Mwanda Yehova i Leza ufuta mfuto.+
Ukalubula kinongo binebine.+
57 Nkalengeja bamfumu bandi ne bantu bandi ba tunangu bakolwe,+Bambikavu bandi ne baledi bandi bampingakani ne ba bulwi bandi,Kadi bakalāla tulo twa myaka na myaka,Tokebakalangukapo,”+ i Mulopwe, wa dijina dya bu Yehova wa bibumbo unena.
58 Yehova wa bibumbo wanena namino amba:
“Lubumbu lwa Babiloni, nansha byoludi lukatampe, lukapomonwa lonso fututu,+Kadi bibelo byandi, nansha byobidi bilampe, bikasōkwa mudilo.
Bantu bakasusuka na mingilo bya bitupu;Mizo ikakōka mwanda’tu wa kudisha mudilo.”+
59 Bino byo binenwa bya Mupolofeto Yelemia byaasoñenye Selaya mwanā Nedia+ mwanā Maseya pawaendele na Zedekia mulopwe wa Yuda ku Babiloni mu mwaka wa buná wa bulopwe bwandi; Selaya wadi kapita wa nkambi.
60 Yelemia walembele mu mukanda umo byamalwa byonso byadi bya kwiya pa Babiloni, bino binenwa byonso byalembēlwe Babiloni.
61 Ne kadi, Yelemia wanena Selaya amba: “Shi ubaiya ku Babiloni kadi ubamumone, ukatanga bino binenwa byonso na diwi ditunduke.
62 Kupwa unene amba, ‘A Yehova, ubanena kino kifuko amba kikonakanibwa ne kushala mwampikwa mwikadi, muntu nansha nyema, ne amba kikekala ke masala a nyeke.’+
63 Kadi shi ubapu kutanga uno mukanda, kutyila’ko dibwe, wiwele pa bukata bwa Ufalete.
64 Kupwa unene amba, ‘Mo monka mukashikila Babiloni kuvubuka monka mpika+ pa mwanda wa kyamalwa kyonsa kumuletela; kadi bakakōka bininge.’”+
Binenwa bya Yelemia bibafudila pano.
Kunshi kwa Dyani
^ Uno umweka bu mutelelo mufyame wa Kaladea.
^ Kishima pa kishima i, “kakitonta.”
^ Ko kunena’mba, ntanda ya bene Kaladea.
^ Nansha’mba “muya wenu.”
^ Bibwanika padi i, “yujai vungu.”
^ Nansha’mba “mutyi wa kiyukeno.”
^ Kishima pa kishima i, “kipimo kya.”
^ Nansha’mba “muya wandi.”
^ Nansha’mba “kyungutu.”
^ Bibwanika padi i, “Uloñanga milango ya.”
^ Nansha’mba “nkishi wandi musungululwe.”
^ Nansha’mba “umpuya.”
^ Nansha’mba “ba bituputupu.”
^ Nansha’mba “mutyi wa kiyukeno.”
^ Kishima pa kishima i, “Pandulai.”
^ Kishima pa kishima i, “Pandulai.”
^ Byabukwa lwa nshi.
^ Kishima pa kishima i, “Nebukadeleza,” mulembelo mukwabo wa dino dijina.
^ Nansha’mba “bantambo bana ba manyenze.”
^ Dino dimweka bu dijina dikwabo dya Babele (Babiloni).
^ Nansha’mba “myuya yenu.”
