Yelemia 8:1-22
8 “Mu kine kitatyi’kya,” i Yehova unena, “mikupa ya balopwe ba Yuda, ne mikupa ya bamfumu bandi, ne mikupa ya babitobo, ne mikupa ya bapolofeto, ne mikupa ya bekadi ba Yelusalema ikalupulwa mu bibundu byabo.
2 Ikanikwa ku dyuba ne ku kweji ne ku bibumbo byonso bya mūlu byobadi basenswe, bebingidila, bebilonda, bebikimba ne kwivukwila’ko.+ Kebakabungwepo pamo, nansha kujīkwa kwine. Bakekala pamo bwa mboleo pa nshi.”+
3 “Kadi bashele’ko ba ku kino kisaka kibi bakapanda, bakatonga lufu pa kyaba kya būmi mu bifuko byonso monebapalankenya,” i Yehova wa bibumbo unena.
4 “Kadi ufwaninwe kwibanena’mba, ‘Yehova wanena namino amba:
“Le bakapona ne kulanguka monka mpika?
Shi umo ajoke, le mukwabo nandi kakajokapo?
5 Mwanda waka bano bantu, Yelusalema, abaleka kukōkela na kubulwa kikōkeji kwa nyeke?
Balamete ku bongojani;Bapela kujoka.+
6 Natele mutyima ne kwivwana, ino muneneno wabo kewadipo moloke.
I kutupu muntu nansha umo wesāshile bubi bwandi nansha waipangwile amba, ‘Le kyonalonga i kika?’+
Ense ujokelanga ku dishinda dya bantu bavule, pamo bwa kabalwe kenda lubilo mu bulwi.
7 Enka ne kakumbi ka mūlu kayukile bitatyi* byako;Kakutyikutyi ne kamimbi ne kamvila,* tulamanga kitatyi kyato kya kujoka.*
Ino bantu bami kebayukilepo butyibi bwa Yehova.”’+
8 Le mubwanya kunena namani amba: “Tudi na tunangu, kadi tudi na kijila kya* Yehova”?
Mwanda na bubine, ka kulemba nako*+ ka bubela ka basonekeji* kengidijibwanga enka ku bintu bya bubela.
9 Ba tunangu abafwijibwa bumvu.+
Abazakala kadi bakakwatwa.
Talai! Abapele kinenwa kya Yehova,Le i tunangu’ka tobadi nato?
10 O mwanda nkapāna babo bakaji ku bantu bakwabo,Madimi abo nao ku bantu bangi;+Mwanda kushilwila ku mutyetye bininge kutūla ne ku mukatampe bininge, ense umwenanga mu bya budimbidimbi;+Kushilwila ku mupolofeto kutūla ku kitobo, ense uloñanga bya manyengenyenge.+
11 Kadi batompanga kundapa bityetye* mwanā bantu bami mwana-mukaji mutyumuke, kebanena’mba,“Kudi ndoe! Kudi ndoe!”
Ako papo kutupu ndoe.+
12 Le bevwananga bumvu bwa bintu bya munyanji byobalonga?
Kebevwanangapo bumvu nansha dimo!
Kebayukilepo ne mwa kufwila bumvu mwine!+
O mwanda bakapona mu bukata mwa boba bapone.
Bakakukala ponkebapa mfuto,’+ i Yehova unena.
13 ‘Ponkebabunga, nkebafudija,’ i Yehova unena.
‘Kekukashalapo mañanza ku muñanza, nansha bikuyu ku kikuyu, kadi mani akafumba.
Kadi byobya byonebapele bikebajimina.’”
14 “Le i kika kyotushikatyile pano?
Twibungei, tutwele mu bibundi bikomejibwe+ tukafwile’mo.
Mwanda Yehova Leza wetu uketwipaya,Kadi wetupe mema a bulembe a kutoma,+Mwanda tubapi Yehova mambo.
15 Kwadi lukulupilo lwa ndoe, ino i kutupu kiyampe kiile’ko,Kwadi lukulupilo lwa kitatyi kya kundapwa, ino kudi luzakalo!+
16 Ku Dani kubaivwanwa kupemba kwa tubalwe twandi.
Pa kwivwana diwi dya kudila kwa tubalwe twandi tulume,Ntanda yonso ibatenkana.
Abaiya kadi abasasamuna ntanda ne bintu byonso bidi’mo,Kibundi ne bekadi bakyo.”
17 “Mwanda nsa kutuma banyoka mu bukata mwenu,Banyoka ba bulembe kebabwanyapo kutalajibwa,Kadi bine bakemusuma,” i Yehova unena.
18 Njia yami keibwanyapo kubeluka;Mutyima wami ubela.
19 Babijanga tamba ku ntanda ya kulampeKudi mwanā bantu bami mwana-mukaji amba:
“Le Yehova kadipo mu Ziona?
Le mulopwe wandi kadipo mwadi?”
“Mwanda waka abaunsanshija na bankishi babo basōnge,Na baleza babo ba bitupu ba kungi?”
20 “Mwangulo ubapite, bushipo bubapu,Ino batwe ketupandilepo!”
21 Navingakana pa kutyumuka kwa mwanā bantu bami mwana-mukaji;+Nakalala.
Nzuba ibankwata.
22 Le mu Ngileade kemudipo balasome?*+
Le kemudipo muñanga?*+
Mwanda waka mwanā bantu bami mwana-mukaji kakomenepo?+
Kunshi kwa Dyani
^ Nansha’mba “bitatyi bitungwe.”
^ Bibwanika padi i, “kalongominda.”
^ Nansha’mba “kuviluka.”
^ Nansha’mba “bulombodi bwa.”
^ Nansha’mba “kalembo.”
^ Nansha’mba “balembi.”
^ Nansha’mba “bya kūlukūlu.”
^ Nansha’mba “māni anunka biya atalaja misanshi?”
^ Nansha’mba “ñanga?”
