Yoba 15:1-35
15 Edifaza+ mwine Temani walondolola kanena’mba:
2 “Le muntu wa tunangu ukalondolola na binenwa bya bituputupu,*Nansha le ukayuja difu dyandi na kivula kya kutunduka?
3 Kudingila na binenwa byonkabyonka i kwa bitupu,Kadi mīsambo yonka keidipo na kamweno.
4 Mwanda ubapēleka moyo wa kutyina Leza,Kadi ubatyepeja kuta mutyima kudi Leza.
5 Mwanda kilubo kyobe kyo kiludika byonena’byo,*Kadi ubatonge muneneno wa bukosoke.
6 Kyakanwa kyobe kyo kikuponeja, ke amipo;Milomo yobe yo ileta bukamoni podi.+
7 Lelo abe ye muntu mubajinji kubutulwa,Nansha abe ye wabutwilwe kumeso kwa mikuna?
8 Le wivwananga mīsambo mifyame ya Leza’ni,Nansha abe kete ye wa tunangu?
9 Le i bika byoyukile byoketuyukilepo?+Le i bika byoivwananga byoketwivwanangapo?
10 Ne wa mvwi ne mutame bonso badi mu bukata mwetu,+Bantu bakudile shobe kulampe.
11 Le busengi bwa Leza kebukubwenepo,Nansha binenwa biyampe bikunenwa?
12 Mwanda waka mutyima obe ukuselela kungi,Kadi mwanda waka meso obe adyendyemuka bulobo?
13 Mwanda ubalobela* Leza mwine,Kadi ubaleka bino binenwa bitambe mu kyakanwa kyobe.
14 Le muntu wa kufwa i ani amba ekale utōka,Nansha muntu mubutulwe na mwana-mukaji amba ekale moloke?+
15 Tala! Aye kakulupilepo bajila bandi,Kadi nansha ke madiulu mene keatōkangapo ku meso andi.+
16 Lelo muntu wa munyanji kadi moneke papo ke pepi,+Muntu utoma bukondame pamo bwa mema!
17 Nsa kukusapwila, abe nteje!
Nsa kukubangila byonamwene,
18 Byabangile bantu ba tunangu byebalombwele bashabo,+Bintu byokebafilepo.
19 Ntanda yebapelwe’nka abo kete,Kadi i kutupu mweni wapityile mu bukata mwabo.
20 Mubi umonanga malwa mafuku andi onso,Mu bula bwa myaka yonso ibikīlwe yewa ususulañana.
21 Mawi alenga moyo adi mu matwi andi;+Mu kitatyi kya ndoe, bañonaona bamutamba.
22 Kakulupilepo amba ukanyema fukutu;+I mubīkilwe kipete.
23 Ulumbakananga ukimba byakudya*—le bidi kwepi?
Uyukile biyampe amba difuku dya fukutu didi pabwipi.
24 Tusua ne malwa bimutuyulanga nyeke;Bimutādilanga pamo bwa mulopwe mwilongolole kukatambañana bulwi.
25 Mwanda ōlolanga kuboko kwandi padi Leza mwineKadi utompanga kupunika* Mwinē Bukomo Bonso;
26 Umutalukilanga lubilo na kibengo,Na ngabo yandi mikomo ya mutyika;*
27 Mpala yandi i mipūte māni,Kadi kifuka kyandi i kiyule māni;
28 Ushikatanga mu bibundi bikasalwa,Mu mobo kemukekalapo muntu nansha umo,Mene akekala ke milwi ya mabwe.
29 Kakapetapo, kadi bupeta bwandi kebukavulapo,Nansha bintu byandi kusambakana pa ntanda.
30 Kakanyemapo fukutu;Lubimbi lukōmija musambo* wandi,Kadi ukapita na umpuya wa kyakanwa kya Leza.*+
31 Kakasāsukapo ne kukulupila mu kintu kya bitupu,Mwanda kyokya kyamwena’mo kikekala kya bitupu;
32 Kikalongeka kumeso kwa difuku dyandi,Kadi misambo yandi keikavwambilapo.+
33 Ukekala pamo bwa muñanza utenkenya mañanza mabishi,Ne pamo bwa umpafu ukūkula maluba ao.
34 Mwanda kitango kya bantu bampikwa Leza* kekilupulangapo kintu,+Kadi mudilo ukaloteja mapema a betabija kutyiba milomo.
35 Bemitanga makambakano ne kubutula byobya bibi,Kadi ndá yabo ilupulanga bongojani.”
Kunshi kwa Dyani
^ Nansha’mba “na buyuki bwa kwianya.”
^ Nansha’mba “kilubo kyobe kifundijanga kyakanwa kyobe.”
^ Kishima pa kishima i, “ubaalamuna mushipiditu obe padi.”
^ Kishima pa kishima i, “mukate.”
^ Nansha’mba “utompanga kunekenya.”
^ Kishima pa kishima i, “tuongo twa ngabo twa mutyika.”
^ Ko kunena’mba, lukulupilo lo-lonso lwa kupanda.
^ Kishima pa kishima i, “kyandi.”
^ Nansha’mba “kya batupondo.”
