Yoba 2:1-13
2 Kupwa, difuku dyafikile dyatwelele bana ba Leza* wa bine+ kukemana ku meso a Yehova,+ ne Satana nandi watwela mu bukata mwabo kukemana ku meso a Yehova.+
2 Penepo Yehova wanena Satana amba: “Le kotamba i kwepi?” Satana nandi walondolola Yehova amba: “Nadi mukajokoloke pa ntanda ne kunangakana’po koku ne koku.”+
3 Ebiya Yehova wanena Satana amba: “Le wadi ubamone* mwingidi wami Yoba? I kutupu muntu udi bwa aye pa ntanda. Aye i muntu moloke swā kadi mululame,*+ utyinanga Leza ne kunyema bibi. Ukikwatyije pototo bululame bwandi,+ nansha byotompa kuntonona+ monakanye* pampikwa mwanda.”
4 Ino Satana walondolola Yehova amba: “Kikoba pa kikoba. Muntu ukapāna bintu byonso byadi nabyo mwanda wa būmi bwandi.*
5 Nanshi olola kuboko kobe ukupile mukupa ne ngitu yandi, na bubine ukakufinga ku mpala yobe.”+
6 Penepo Yehova wanena Satana amba: “Tala! Aye udi mu kuboko kobe!* Ino kokayata enka būmi bwandi!”*
7 Ebiya Satana wataluka ku meso* a Yehova wakupila Yoba na bipote* bisansa+ tamba mu kinyantyilo kyandi kutūla ne ku nsongo ya mutwe.
8 Penepo Yoba wayata kibese kya kininga kaekanya, kadi wadi ushikete mu buto.+
9 Ku mfulo wandi mukaji wamunena’mba: “Le ukikwatyije pototo bululame bobe? Finga Leza ufwe!”
10 Ino aye wamulondolola’mba: “Abe wisambanga pamo bwa mwana-mukaji wampikwa ñeni. Lelo twitabije enka biyampe bitamba kudi Leza wa bine ino kwitabija ne bibi bine mpika?”+ Mu bino byonso’bi, Yoba kalongelepo bubi na milomo yandi.+
11 Balunda* na Yoba basatu baivwana byamalwa byamuponēne, umo ne umo watamba ku kifuko kyandi—Edifaza+ mwine Temani, Biledade+ mwine Shuha,+ ne Zofala+ mwine Nama. Beivwana kwitana pamo mwa kwendela kukamona Yoba ne kumusenga.
12 Abo pa kumumwena kulampe, kebamuyukilepo. Bashilula kudila na diwi dikatampe kebasana ne bivwalwa byabo, baela luvumbi mūlu ne ku mitwe yabo.+
13 Penepo bashikata nandi pa nshi mafuku asamba-abidi dyuba ne bufuku. I kutupu nansha umo wamuneneje kintu, mwanda bamwene amba misanshi yandi i mikatampe bininge.+
Kunshi kwa Dyani
^ Uno i muneneno wa mu Kihebelu ufunkila pa bamwikeulu, bana ba Leza.
^ Kishima pa kishima i, “ubate mutyima padi.”
^ Nansha’mba “muntu wampikwa kutopekwa kadi moloke swā.”
^ Kishima pa kishima i, “kumina.”
^ Nansha’mba “muya wandi.”
^ Nansha’mba “mu lupusa lobe.”
^ Nansha’mba “muya wandi.”
^ Kishima pa kishima i, “mpala.”
^ Nansha’mba “na bilonda bilobo.”
^ Nansha’mba “Boba beyukile.”
