Yoba 32:1-22
32 Penepo bana-balume basatu’ba baleka’byo kulondolola Yoba, mwanda wadi ukulupile amba i moloke.*+
2 Ino Edihu mwanā Balakele mwine Buza+ wa ku kisaka kya Lame waloba bininge. Bulobo bwandi bwadyendyemukila Yoba mwanda welombwele aye mwine* bu moloke pa kyaba kya Leza.+
3 Kadi walobēle bininge ne balunda ba Yoba basatu mwanda kebabwenyepo kulondolola, ino kebanena’mba Leza i mubi.+
4 Edihu wadi utengele kutentulula Yoba, mwanda abo badi bamukudile.+
5 Edihu pa kumona’mba bantu basatu’ba kebadipo na kya kulondolola, po pene walobela’ko.
6 Penepo Edihu mwanā Balakele mwine Buza washilula kwisamba, kanena’mba:
“Amiwa ne mwanuke*Banwe mwi batame.+
O mwanda nadi nekoka na bulēme,+Kadi nkyasomwenwepo kwimulombola byondyukile.
7 Nadi nanga’mba, ‘Bukulu* bwisambe,Kadi bungi bwa myaka busapule tunangu.’
8 Ino i mushipiditu udi mu bantu,Umpuya wa Mwinē Bukomo Bonso, wibapa ñeni.+
9 Ke bukulupo kete* bwalamunanga muntu ke wa tunangu,Kadi ke banunupo kete bevwanijanga kyokya kyoloke.+
10 O mwanda nanena’mba, ‘Nteje,Nami nsa kukulombola byondyukile.’
11 Talai! Nadi ntengele binenwa byenu;Nadi nteja milangwe yenu+Pomwadi mukimba bya kunena.+
12 Nadi nemulonda biyampe,Inoko i kutupu nansha umo pomudi’po ubwenye kuponeja Yoba*Nansha kulondolola ku binenwa byandi.
13 O mwanda kemwakinenai amba, ‘Tubatana tunangu;I Leza wamuponeja, ke muntupo.’
14 Ke amipo waadi unena,O mwanda nkisapo kumulondolola na binenwa byenu.
15 Abatuyuka, kebakidipo na kya kulondolola;Kebashelepo na kya kunena.
16 Nadi ntengele, ino abaleka’byo kwisamba;Kebemene’tu ponka, ne kulondolola monka mpika.
17 O mwanda ami nami nsa kulondolola;Ami nami nsa kunena byondyukile,
18 Mwanda ngidi na bingi bya kunena;Mushipiditu udi munda mwami uningilanga.
19 Munda mwami mudi pamo bwa vinyu keidipo na pa kutambila luvula,Pamo bwa milondo ya biseba mipya ikimba kusabika.+
20 Leka nesambe ngivwane’ko biyampe!
Nsa kumumununa milomo yami nondolole.
21 Nkikekalapo na mboloji ku muntu nansha umo;+Nansha kufukula* muntu,
22 Mwanda ami nkiyukilepo kufukulañana;Shi nadi ndyukile’byo, longa Mulongi wami ke mungipaye bukidi bonka.
Kunshi kwa Dyani
^ Nansha’mba “mwanda wadi moloke mu meso a aye mwine.”
^ Nansha’mba “muya wandi.”
^ Kishima pa kishima i, “mutyetye mu mafuku.”
^ Kishima pa kishima i, “Mafuku.”
^ Nansha’mba “Ke mafukupo mangi kete.”
^ Nansha’mba “kutopeka Yoba.”
^ Nansha’mba “kupāna kitenta kya bulēme kudi.”
