Yoba 9:1-35
9 Yoba walondolola kanena’mba:
2 “Bine ndyukile amba e nankyo.
Ino le muntu wa kufwa ubwanya kubinga namani shi usamba na Leza?+
3 Shi muntu usaka kwipatanya Nandi,*+Yao muntu kabwanyapo kulondolola ku kipangujo nansha kimo mu bipangujo Byandi kanunu.
4 Aye i wa tunangu mu mutyima kadi mukomokomo mu bukomo.+
Le i ani ubwanya kumukomena ne kulopolwa mpika?+
5 Utundululanga* ngulu pampikwa muntu kuyuka;Wiifulamunanga mu bulobo bwandi.
6 Utenkanyanga ntanda pa kifuko kyayo,Amba bikomo byayo bizakale.+
7 Usoñanyanga dyuba dileke kumunikaKadi utūlanga kiyukeno pa kitōkeji kya ñenyenye;+
8 Ubālanga madiulu aye mwine,+Kadi unyantanga pa mantanki makatampe a dijiba.+
9 Walongele kibumbo kya ñenyenye kya Ashe,* ne kya Keshile,* ne kya Kima,*+Ne bibumbo bya ñenyenye ya dikumbi dya kunshi;*
10 Uloñanga bintu bikatakata kadi kebisokolwapo,+Bintu bya kutendelwa kebibadika.+
11 Upitanga kubwipi nami, ino nkibwanyapo kumumona;Umpitanga, ino ami kumujingulula mpika.
12 Shi wasompola kintu, le i ani ubwanya kumukomena?
I ani ubwanya kumunena’mba, ‘Le uloñanga bika?’+
13 Leza kakakankajapo bulobo bwandi;+Enka ne boba bakwashanga Lehaba*+ bakevukwila kwadi.
14 Le ami shi mulondolole papo ke pepiMwene mfwaninwe kutonga bishima senene mwa kwipatenya nandi!
15 Nansha shi nadi na bubinga, nkyadipo wa kumulondolola.+
Nadi’tu wa kulomba lusa kudi mutyibi* wami.
16 Shi namwite, lelo ukangitaba?
Nkitabijepo amba ukevwana diwi dyami,
17 Mwanda waumvingakanya na kimpumpuKadi wavudija bilonda byami kwampikwa mwanda.+
18 Kandekelepo mfome’ko bidi;Undyujanga’nka kundyuja bintu bilula.
19 Shi i mwanda utala bukomo, aye i mukomo.+
Shi i mwanda utala boloke, unena’mba: ‘Le i ani ubwanya kungita neshintulwile?’*
20 Shi nadi na bubinga, kyakanwa kyami kyadi kya kumponeja;Nansha shi ndame bululame,* aye ukamponeja’tu.*
21 Nansha shi ndame bululame,* nkīkulupilepo ami mwine;*Napele* buno bwami būmi’bu.
22 Byonso bidi’nka muswelo umo. O mwanda nanena’mba,‘Aye onakanyanga wampikwa mambo* ne mubi mwine muswelo umo.’
23 Shi dilobe dya mu kitulumukila dibaleta lufu bukidibukidi,Ukazawila kutyumukwa mutyima kwa muntu wampikwa mambo.
24 Ntanda i mipebwe yewa mubi;+Upūtanga meso* a batyibi bayo.
Shi ke ayepo, penepo i ani?
25 Pano mafuku ami enda lubilo kupita ne yewa unyema lubilo;+Anyema lubilo pampikwa kumona biyampe.
26 Apita lubilo pamo bwa mato a mabungu,Pamo bwa mikebo itūkila pa kikwatwa kyayo.
27 Shi nene amba, ‘Nkelwa mitompwe yami,Nkashinta mumwekelo wa mpala ngikale na nsangaji,’
28 Nadi wa kwikala’nka na moyo mwanda wa masusu ami onso,+Kadi ndyukile amba, kwadipo wa kumona ami bu wampikwa mambo.
29 Nadi wa kumonwa bu muponejibwe.*
Penepo le i kika kyonongela bukomo bwa bituputupu?+
30 Shi naoye mu mema a mashika mekwate asunguluka,Ne kutōkeja makasa ami na kifula,+
31 Nankyo ukantokenya mu kīna,Amba ne bivwalwa byami bine binshikwe.
32 Mwanda aye ke muntupo pamo bwa ami onondolola,Amba tutwele nandi mu kidye.+
33 Kekudipo muntu wa kutyiba mambo* pa bukata bwetu,Ubwanya kwikala ke mutyibi wetu.*
34 Shi walekele kunkupila*Ne kuntuyula na moyo wandi mpika,+
35 Nabya nadi wa kwisamba nandi pampikwa moyo,Mwanda kekidipo mondi kwisamba kwa kubulwa moyo.
Kunshi kwa Dyani
^ Nansha’mba “kumutwala ku kidye.”
^ Nansha’mba “Utalulanga.”
^ Pakwabo i Nkubulo (Uluse Mukatampe).
^ Kishima pa kishima i, “byumba bya munda bya kunshi.”
^ Pakwabo i Kidimina.
^ Pakwabo i Kabwa na Nyema.
^ Pakwabo i kipangwa kikatampe kya lui.
^ Bibwanika padi i, “wami wa kwimuka nandi mu kidye.”
^ Kishima pa kishima i, “kungityija?”
^ Nansha’mba “Nansha shi ne wampikwa mambo.”
^ Kishima pa kishima i, “mukondame.”
^ Nansha’mba “Nansha shi ne wampikwa mambo.”
^ Nansha’mba “Nkiyukilepo muya wami.”
^ Nansha’mba “Nafutulula.”
^ Nansha’mba “boba balama bululame.”
^ Kishima pa kishima i, “mapala.”
^ Kishima pa kishima i, “mubi.”
^ Nansha’mba “nsenga.”
^ Kishima pa kishima i, “kwitutenteka kuboko batwe bonso bubidi.”
^ Kishima pa kishima i, “watalwile lusonde lwandi pondi.”
