Yoshua 10:1-43
10 Mulopwe wa Yelusalema Adoni-Zedeke pa kwivwana’tu amba Yoshua wakwata Ai, wamonakanya fututu, walonga Ai ne mulopwe wandi+ enka na mwaalongēle Yediko ne mulopwe wandi,+ ne amba bekadi ba Ngibeone abapwana kipwano na Isalela+ ne kushikata mu bukata mwabo,
2 watuyuka bininge,+ mwanda Ngibeone kyadi kibundi kikatampe pamo bwa bibundi bya bulopwe. Kyadi kikatampe kupita Ai,+ kadi bana-balume bakyo bonso badi bantu ba divita.
3 Ebiya Adoni-Zedeke mulopwe wa Yelusalema watuma uno musapu kudi Hohame mulopwe wa Hebelona,+ kudi Pilame mulopwe wa Yalemute, kudi Yafia mulopwe wa Lakishi, ne kudi Debile mulopwe wa Engelone amba:+
4 “Iyai munkwashe’ko, tukatambe Ngibeone bulwi, mwanda wapwana na Yoshua ne na bene Isalela.”+
5 Ponkapo balopwe batano ba bene Amole+—mulopwe wa Yelusalema, mulopwe wa Hebelona, mulopwe wa Yalemute, mulopwe wa Lakishi, ne mulopwe wa Engelone—bekongela pamo ne basola babo, baenda batūdila Ngibeone nkambi mwanda wa kulwa nandi bulwi.
6 Penepa bana-balume ba Ngibeone batuma musapu kudi Yoshua ku nkambi ku Ngilengale+ amba: “Kokyela* bapika bobe.+ Iya bukidi! Witukūle ne kwitukwasha! Balopwe bonso ba bene Amole ba mu ntanda ya ngulu abekongela pamo kwitutamba bulwi.”
7 Ponkapo Yoshua watamba ku Ngilengale wakanda pamo ne bana-balume bonso ba divita ne ba bulwi bakomokomo.+
8 Penepa Yehova wanena Yoshua amba: “Kokibakwatwa moyo,+ mwanda nakupe’bo mu makasa obe.+ Kekudipo nansha umo mu bukata mwabo ukabwanya kukukomena.”+
9 Yoshua waiya kwibatamba bulwi mu kitulumukila pa kupwa kwenda bufuku bonso butuntulu kutamba ku Ngilengale.
10 Yehova webela mu kavutakanya ku meso a Isalela,+ bebatapa ku Ngibeone, ke kutapa i kukunya, bebalonda mu dishinda dikanda ku Bete-Holone, kadi bebepaya kufika ne ku Azeka ne ku Makeda.
11 Pobadi banyema ku meso a Isalela abo pa mpulumuko ya Bete-Holone, Yehova webanokejeja mabwe a mvula makatampe mu makumbi kufika ne ku Azeka, penepa bakuba. Na bubine, bafwile ku mabwe badi bavule kupita bafwile ku kipete kya bene Isalela.
12 I pa kine kitatyi’kya, mu difuku dyanekenye Yehova bene Amole ku meso a bene Isalela, Yoshua pawanenene Yehova ku meso a Isalela amba:
“Dyuba, imana+ pa Ngibeone,+Ne kweji, pa Musanza* wa Aiyalone!”
13 Ebiya dyuba dyaimana ne kweji nandi kajininepo kufika ne kitatyi kyalubwile muzo kinongo pa balwana nabo. Mwene kino i kilembwe mu mukanda wa Yashala?+ Dyuba dyaimene mu bukata bwa makumbi kadi kedyaponenepo bukidi kintu kya difuku dituntulu.
14 Kekwadipo difuku nansha dimo na dino, kumeso kwadyo nansha kupwa kwadyo, dyatejeje Yehova diwi dya muntu,+ mwanda Yehova wadi ulwila Isalela.+
15 Kupwa Yoshua pamo ne Isalela ense bajokela ku nkambi ku Ngilengale.+
16 Mu kine kitatyi’kya balopwe batano banyema, bakefya mu mutá udi ku Makeda.+
17 Penepa basapwila Yoshua amba: “Balopwe batano abatanwa bafyeme mu mutá ku Makeda.”+
18 Ebiya Yoshua wanena’mba: “Kunkulumwinai mabwe makatampe ku kibelo kya mutá kadi tongai bana-balume ba kukebalama.
19 Ino banwe bashala kemufwaninwepo kwimana. Londai balwana nenu, mwibepayei pomwibalonda kunyuma.+ Kemukibalekai batwele mu bibundi byabo, mwanda Yehova Leza wenu webapāna mu maboko enu.”
20 Yoshua ne bene Isalela pa kupwa kwibatapa bininge, kufika ne byobebakubije kutalula’mo enka bamo bapandile pa kupwa kunyema ne kutwela mu bibundi bikomejibwe,
21 bantu bonso bajokela senene kudi Yoshua ku nkambi ku Makeda. I kutupu nansha umo wasomwenwe kunenena* bene Isalela bibi.
22 Kupwa Yoshua wanena’mba: “Shitulai kibelo kya mutá muntambijije’mo balopwe batano’ba.”
23 Ebiya bamulupwila mu mutá bano balopwe batano: mulopwe wa Yelusalema, mulopwe wa Hebelona, mulopwe wa Yalemute, mulopwe wa Lakishi, ne mulopwe wa Engelone.+
24 Kitatyi kyobaletēle Yoshua bano balopwe batano, penepa waita bana-balume bonso ba Isalela wanena ne bakatampe ba bana-balume ba bulwi baendele nandi pamo amba: “Fwenai. Nyantai maulu enu mwikoshi mwa bano balopwe.” Penepa bafwena bebatyimpa maulu mwikoshi.+
25 Kupwa Yoshua webanena’mba: “Kemukikwatwai moyo nansha kutuyuka kwine.+ Kankamanai kadi mwikomejei, mwanda bino byo bisa kulonga Yehova ku balwana nenu bonso bomulwa nabo.”+
26 Ebiya Yoshua webakupila ne kwibepaya webepaya, kupwa webayeyeka ku mityi itano, webashiya bayela ku mityi kufika ne ku kyolwa.
27 Pa kupona kwa dyuba Yoshua wasoñanya bantu bebatūkije ku mityi+ bebele mu mutá mobadi bafyeme’mwa. Kupwa bajika mabwe makatampe ku kibelo kya mutá, ano mabwe akidi’ko ne dyalelo dino’di.
28 Yoshua wakwata Makeda+ mu dine difuku’dya, wamukubija na kipete. Waonakanya fututu mulopwe wandi ne bantu bonso* badi’mo, kashilepo muntu nansha umo mūmi.+ Walonga mulopwe wa Makeda+ enka na mwaalongēle mulopwe wa Yediko.
29 Kupwa Yoshua pamo ne Isalela ense batamba ku Makeda baenda ku Dibena, balwa Dibena+ bulwi.
30 Kadi Yehova wamupāna ne mulopwe wandi+ mu makasa a Isalela, bamonakanya ne kwipaya na kipete bantu bonso* badi’mo, kebashilepo muntu nansha umo mūmi. Ebiya balonga mulopwe wakyo enka na mobalongēle mulopwe wa Yediko.+
31 Kupwa Yoshua pamo ne Isalela ense batamba ku Dibena baenda ku Lakishi,+ batūla nkambi konka bamulwa bulwi.
32 Yehova wapāna Lakishi mu makasa a Isalela, bamukwata mu difuku dya bubidi. Bamonakanya ne kwipaya na kipete+ bantu bonso* badi’mo, enka na mobalongēle Dibena.
33 Penepa Holama mulopwe wa Ngezele+ wakanda kukakwasha Lakishi, ino Yoshua wamwipaya aye ne bantu bandi kufika’nka ne byokekwashelepo muntu nansha umo wapandile.
34 Kupwa Yoshua pamo ne Isalela ense batamba ku Lakishi baenda ku Engelone,+ batūla nkambi konka balwa nandi bulwi.
35 Bamukwata mu dyodya difuku ne kumukubija na kipete. Baonakanya fututu bantu bonso* badi’mo mu dyodya difuku, enka na mobalongēle Lakishi.+
36 Kupwa Yoshua pamo ne Isalela ense batamba ku Engelone bakanda ku Hebelona+ balwa nandi bulwi.
37 Penepo bamukwata bamukubija na kipete, pamo ne mulopwe wandi, ne bibundi byandi ne bantu bonso* badi’mo, kebashilepo muntu nansha umo mūmi. Enka na mwaalongēle Engelone, wamonakenye fututu ne bantu bonso* badi’mo.
38 Ku mfulo Yoshua pamo ne Isalela ense baalamukila ku Debile+ balwa nandi.
39 Wamukwata pamo ne mulopwe wandi, ne bibundi byandi byonso, webikubija na kipete, waonakanya fututu+ bantu bonso* badi’mo, kashilepo muntu nansha umo mūmi.+ Walonga Debile ne mulopwe wandi enka na mwaalongēle Hebelona ne Dibena ne mulopwe wandi.
40 Yoshua wanekenya ntanda yonso ya ntanda ya ngulu, Nengeba, Shefela,+ ne matēlo, ne balopwe babo bonso, kashilepo muntu nansha umo mūmi; waonakanya fututu+ bintu byonso byadi bifoma, monka mwasoñaninye’kyo Yehova Leza wa Isalela.+
41 Yoshua webanekenya tamba ku Kadesha-Balenea+ kutūla ne ku Ngaza+ ne ntanda yonso ya Ngoshena+ kufika’nka ne ku Ngibeone.+
42 Yoshua wakwata bano balopwe bonso ne ntanda yabo, bonso mu kitatyi kimo, mwanda Yehova Leza wa Isalela ye wadi ulwila Isalela.+
43 Penepa Yoshua wajokela ku nkambi ku Ngilengale+ pamo ne Isalela ense.
Kunshi kwa Dyani
^ Kishima pa kishima i, “kokitūkija maboko obe.”
^ Nansha’mba “Dilungu dya Musanza.”
^ Kishima pa kishima i, “kusongola ludimi lwandi.”
^ Nansha’mba “myuya yonso.”
^ Nansha’mba “myuya yonso.”
^ Nansha’mba “myuya yonso.”
^ Nansha’mba “myuya yonso.”
^ Nansha’mba “myuya yonso.”
^ Nansha’mba “myuya yonso.”
^ Nansha’mba “myuya yonso.”
