Yoshua 18:1-28
18 Kupwa kitango kyonso kya bene Isalela kyaungwila ku Shilo,+ bashimika’ko ne pema wa kubungakena’ko,+ mwanda ntanda yanekenibwe ku meso abo.+
2 Ino kwadi kukishele bisaka bisamba-bibidi bya bene Isalela byadi kebyapelwe bupyani.
3 Ebiya Yoshua wanena bene Isalela amba: “Le i kitatyi’ka kyomukaleka kulejaleja mwende mukakwate ntanda yemupele Yehova Leza wa bakulutuba benu?+
4 Mpei bana-balume basatu mu kisaka ne kisaka nebatume, bafwaninwe kwenda bakajokoloke ntanda ne kushika mikalo yayo mungya bupyani bwabo. Kupwa bafwaninwe kujokela kondi.
5 Bafwaninwe kwiabila’yo mu bipindi bisamba-bibidi.+ Yuda ukashala mu yandi ntanda dya kunshi,+ njibo ya Yosefa nayo ikashala mu yabo ntanda dya kungala.+
6 Ino banwe, shikai mikalo ya ntanda mu bipindi bisamba-bibidi mwibiletei kuno kondi, nami nsa kwimutēla bubale+ kuno ku meso a Yehova Leza wetu.
7 Inoko bene Levi kebadipo na kipindi mu bukata mwenu,+ mwanda butobo bwa Yehova bo bupyani bwabo;+ kadi Ngade ne Lubeni ne kipindi kya kisaka kya Manase+ bapyene kala bupyani bwabo bukila bwa Yodano bwa kutunduka, bupyani bwebapele Mosesa mwingidi wa Yehova.”
8 Bana-balume belongolola kwenda, penepa Yoshua wasoñanya boba badi ba kwenda kukashika mikalo ya ntanda’mba: “Endai mukapite mu ntanda yonso mushike mikalo yayo kupwa mujokele kondi, nami nsa kwimutēla bubale kuno ku Shilo+ ku meso a Yehova.”
9 Ebiya bana-balume baenda bapita mu ntanda yonso, bashika ne mikalo yayo mungya bibundi mu bipindi bisamba-bibidi, beilemba mu dibuku. Kupwa bajokela kudi Yoshua ku nkambi mu Shilo.
10 Penepa Yoshua webatēla bubale mu Shilo ku meso a Yehova.+ Kwine’kwa Yoshua waabanya ntanda kudi bene Isalela mungya bipindi byabo.+
11 Ebiya bubale bwaponena kisaka kya Benjemani mungya mafu abo, kadi ntanda ya bubale bwabo yadi pa bukata bwa bantu ba Yuda+ ne bantu ba Yosefa.+
12 Ku mutamba wa kungala, mukalo wabo washilwidile ku Yodano, kadi mukalo wakandile dya ku matēlo a Yediko+ kungala, ebiya wakanda ku lūlu dya kushika, walungulukila dya mu ntanda mutuputupu ya Bete-Avena.+
13 Mukalo watambile kwine’kwa waendelela kufika ne ku Luzi, ku matēlo a Luzi a kunshi, ko kunena’mba Betele;+ mukalo watūkila dya ku Atalote-Adale+ pa lūlu ludi kunshi kwa Bete-Holone wa Kunshi.+
14 Kadi mukalo waketelwe dya ku mutamba wa kushika, waenda ujokoloka dya kunshi tamba ku lūlu lwitadidile na Bete-Holone kunshi; wakafula ku Kidiata-Bāla, ko kunena’mba Kidiata-Yeadimi,+ kibundi kya Yuda. Uno o mutamba wa kushika.
15 Mutamba wa kunshi wadi ushilwila dya kufulakufula kwa Kidiata-Yeadimi, kadi mukalo walungulukīle dya kushika; watambila dya ku nsulo ya mema a Nefatoa.+
16 Mukalo watūkīle kufulakufula kwa lūlu lwitadidile na Musanza wa Mwanā Hinome,+ ludi mu Musanza* wa Lefaime+ dya kungala, kadi watūkīle ku Musanza wa Hinome, ku matēlo a bene Yebushi+ kunshi, kupwa watūkila ku Ene-Longele.+
17 Ebiya waketwa kungala walunguluka dya ku Ene-Shemeshe wakatambila ku Ngedilote udi kampalampala na mukuna wa Adumimi,+ kupwa watūkila ku dibwe+ dya Bohane+ mwanā Lubeni.
18 Kadi waenda dya ku matēlo a kungala kampalampala na Alaba kupwa watūkila ku Alaba.
19 Penepa mukalo waendele dya ku matēlo a Bete-Hokela+ a kungala, kadi mukalo wakafula mu kitonto kya Dijiba dya Mwepo*+ kya kungala, ku mfulo ya kunshi ya Yodano. Uno o wadi mukalo wa kunshi.
20 Yodano o wadi mukalo wao ku mutamba wa kutunduka. Buno bo bwadi bupyani bwa lutundu lwa Benjemani mungya mafu abo, mwendele mikalo yabo ku mitamba yonso.
21 Kadi bibundi bya kisaka kya Benjemani mungya mafu abo i bino: Yediko, Bete-Hokela, Emeke-Kezize,
22 Bete-Alaba,+ Zemalaimi, Betele,+
23 Avime, Pala, Ofela,
24 Kefala-Amoni, Ofini, ne Ngeba+—bibundi 12 ne bīkalo byabyo.
25 Ngibeone,+ Lama, Belote,
26 Mizipe, Kefila, Mōza,
27 Lekema, Ilepele, Talala,
28 Zelaha,+ Ha-Elefe, Yebushi, ko kunena’mba Yelusalema,+ Ngibea,+ ne Kidiata—bibundi 14 ne bīkalo byabyo.
Buno bo bwadi bupyani bwa lutundu lwa Benjemani mungya mafu abo.
