Yoshua 22:1-34
22 Ebiya Yoshua waityija bene Lubeni, bene Ngade, ne kipindi kya kisaka kya Manase
2 webanena’mba: “Mubalonga byonso byemusoñenye Mosesa+ mwingidi wa Yehova, kadi mubakōkela diwi dyami mu byonso byonemusoñenye.+
3 Kemwelelepo banabenu mu kino kitatyi kyonso kufika ne dyalelo;+ kadi mubalama byobemusoñenye mu mbila ya Yehova Leza wenu.+
4 Pano Yehova Leza wenu wape banabenu kukōkolokwa monka mwawebalaile’kyo.+ Shi ke pano mubwanya kujokela ku mapema enu mu ntanda yemupēle Mosesa mwingidi wa Yehova amba ke yenu bobwa bukila* bwa Yodano.+
5 Ino banwe londai senene mbila ne Bijila byemupēle+ Mosesa mwingidi wa Yehova, na kusanswa Yehova Leza wenu,+ na kunangila mu mashinda andi onso,+ na kulama mbila yandi,+ na kumulamata,+ ne na kumwingidila+ na mutyima wenu onso ne na muya* wenu onso.”+
6 Kupwa Yoshua webesela, webanena bende, nabo baenda ku mapema abo.
7 Kadi Mosesa wapele kipindi kya kisaka kya Manase bupyani mu Bashane,+ ino Yoshua wapa kipindi kikwabo kya kisaka ntanda ku mutamba wa kushika wa Yodano,+ pamo ne banababo. Ino pebanenene Yoshua bende ku mapema abo, webesele
8 webanena’mba: “Jokelai ku mapema enu na bya bupeta bivule, ne bimunanwa bivule mpata, ne na ndalama ne olo, mukuba ne byuma, ne bivwalwa bivule bininge.+ Selai kipindi kyenu kya bitūtwa+ bya balwana nenu, mukeabile’byo na banabenu.”
9 Kupwa papo bene Lubeni, bene Ngade ne kipindi kya kisaka kya Manase bashiya bene Isalela bakwabo, kutamba ku Shilo mu ntanda ya Kenani, bajokela ku ntanda ya Ngileade,+ ntanda yobapelwe, mwine mobashikete mungya musoñanya webapele Yehova kupityila kudi Mosesa.+
10 Pobafikile mu ntanda ya Yodano mu Kenani, bene Lubeni, bene Ngade, ne kipindi kya kisaka kya Manase baubaka kwine’kwa kisōkelo dya ku Yodano, kisōkelo kikatampe, kitulumukwa.
11 Mwenda mafuku bene Isalela bakwabo baivwana kino+ kebanena’mba: “Talai! Bene Lubeni, bene Ngade ne kipindi kya kisaka kya Manase, abaubaka kisōkelo ku mukalo wa Kenani mu ntanda ya Yodano, ku mutamba wa bene Isalela.”
12 Bene Isalela pa kwivwana kino, kitango kyonso kya bene Isalela kyebungila ku Shilo+ mwanda wa kukebatamba divita.
13 Penepa bene Isalela batuma Finease+ mwanā Eleaza kitobo kudi bene Lubeni, bene Ngade, ne kipindi kya kisaka kya Manase mu ntanda ya Ngileade,
14 waenda pamo ne bamfumu dikumi, mfumu umo ku njibo ne njibo ya bashandya bisaka byonso bya Isalela, umo ne umo wadi mutwe wa njibo ya bashabo mu bukata mwa tununu twa* Isalela.+
15 Pobafikile kudi bene Lubeni, kudi bene Ngade, ne ku kipindi kya kisaka kya Manase mu ntanda ya Ngileade, bebanena’mba:
16 “Bino byo byanena kitango kyonso kya Yehova amba: ‘I kika kyomwalongela kino kilongwa kya kubulwa kikōkeji+ kudi Leza wa Isalela? Dyalelo’di mubaleka kulonda Yehova mubaubaka banwe bene kisōkelo ne kutombokela Yehova.+
17 Le kilubo kya Peole kekitubwenepo? Ketwesubwile’ko kufika ne dyalelo, nansha kipupo byokyaponene kitango kya Yehova.+
18 Dyalelo kemusake kuleka kulonda Yehova! Shi dyalelo mutombokele Yehova, nabya kesha ukafītyilwa kitango kyonso kya Isalela mutyima.+
19 Ino shi ntanda yomwapelwe yo ya disubi, nankyo abukilai ku ntanda ya Yehova+ mine idi’mo kipema+ kya Yehova ne kushikata mu bukata mwetu, ino kemwakatombokelai Yehova, kadi kemwakitwikadijai bantomboki na kūbaka banwe bene kisōkelo kingi kishile na kisōkelo kya Yehova Leza wetu.+
20 Palongele Akana+ mwanā Zela kilongwa kya kubulwa kikōkeji mu myanda ya bintu byadi binenwe konakanibwa fututu, mwene bafītyīlwe kitango kyonso kya Isalela mutyima?+ Kadi kafwilepo bunka bwandi ku kilubo kyandi.’”+
21 Ebiya bene Lubeni, bene Ngade, ne kipindi kya kisaka kya Manase balondolola mitwe ya tununu twa* Isalela amba:+
22 “Leza wa baleza, Yehova!* Leza wa baleza, Yehova!+ Aye uyukile, ne Isalela nandi usa kuyuka. Shi twatombokele ne kuleka kukōkela Yehova, nabya kemwakitupandijai dyalelo’di.
23 Shi twaubakile kisōkelo batwe bene mwanda’tu wa kuleka kulonda Yehova ketulambula’po byamulambu bisōkwe, byamulambu bya miseke, ne bitapwa bya kipwano, nabya Yehova etulandule mambo.+
24 Ino kudi kintu kingi kyetulongeje namino, mwanda twanenene amba, ‘Mwenda mafuku benu bana bakanena betu bana’mba: “Le banwe ne Yehova Leza wa Isalela padi kipwano’ka?
25 Yehova i mutūle Yodano bu mukalañano pa bukata bwa batwe ne banwe bene Lubeni, ne bene Ngade. Kemudipo na kipindi nansha kimo mudi Yehova.” Kadi benu bana bakakankaja betu bana kutōta* Yehova.’
26 “O mwanda twanenene amba, ‘Leka’tu bine tulonge’po kintu, tūbake kisōkelo, inoko ke kya byamulambupo bisōkwe nansha kya bitapwa,
27 ino kikale bu kamoni pa bukata bwa batwe+ ne banwe ne ntundu* yetu ikāya’ko amba tukengidila Yehova mingilo yetu ku meso andi pamo ne byamulambu byetu bisōkwe, ne bitapwa byetu bya kipwano,+ kutyina’mba benu bana bakanena betu bana mwenda mafuku amba: “Kemudipo na kipindi nansha kimo mudi Yehova.”’
28 O mwanda twanenene amba, ‘Shi baketunene namino batwe ne ntundu* yetu mwenda mafuku, nabya netu tukanena’mba: “Tala kimfwa kya kisōkelo kya Yehova kyaubakile bakulutuba betu, ke kya byamulambupo bisōkwe nansha bitapwa, ino i kya kwikala bu kamoni pa bukata bwa batwe ne banwe.”’
29 Ketubwanyapo nansha dimo kutombokela Yehova ne kuleka dyalelo’di kulonda Yehova+ ketūbaka’ko kisōkelo kya byamulambu bisōkwe, byamulambu bya miseke, ne bitapwa, kishile na kisōkelo kya Yehova Leza wetu kidi kumeso kwa kipema kyandi!”+
30 Kitobo Finease, ne bamfumu ba kitango, ne mitwe ya tununu twa* Isalela badi nandi pa kwivwana binenwa byanenene ba ku lutundu lwa Lubeni, lwa Ngade, ne lwa Manase, basangala.+
31 Penepa Finease mwanā Eleaza kitobo wanena lutundu lwa Lubeni, lwa Ngade, ne lwa Manase amba: “Dyalelo tubayuka’mba Yehova udi mu bukata mwetu mwanda kemulongelepo kino kilongwa kya kubulwa kikōkeji kudi Yehova. Pano mubapandija bene Isalela mu kuboko kwa Yehova.”
32 Kupwa Finease mwanā Eleaza kitobo ne bamfumu bashiya bene Lubeni ne bene Ngade mu ntanda ya Ngileade baenda ku ntanda ya Kenani, bakasapwila’mo bene Isalela bakwabo ino myanda.
33 Kadi bene Isalela basangala pa kwivwana ino myanda. Penepa bene Isalela batendela Leza, kebanenenepo monka kukalwa divita na bene Lubeni, ne bene Ngade mwanda wa kukonakanya ntanda yobadi bashikete’mo.
34 Ebiya bene Lubeni ne bene Ngade bainika kisōkelo’kya* dijina, mwanda “i kamoni pa bukata bwetu amba Yehova i Leza wa bine.”
Kunshi kwa Dyani
^ Ko kunena’mba, mutamba wa kutunduka.
^ Tala Nshintulwilo ya Bishima.
^ Nansha’mba “bisaka bya.”
^ Nansha’mba “bisaka bya.”
^ Nansha’mba “Wa Buleza, Leza, Yehova.”
^ Kishima pa kishima i, “kwakamwa.”
^ Kishima pa kishima i, “nkongo.”
^ Kishima pa kishima i, “nkongo.”
^ Nansha’mba “bisaka bya.”
^ Mungya nshintulwilo iletelwe, mobimwekela kisōkelo kyainikilwe bu Kamoni.
