Yoshua 8:1-35
8 Kupwa Yehova wanena Yoshua amba: “Kokikwatwa moyo nansha kutuyuka kwine mpika.+ Sela bana-balume bonso ba bulwi mukande ku Ai. Tala, napāna mulopwe wa Ai, ne bantu bandi, ne kibundi kyandi, ne ntanda yandi+ mine mu makasa obe.
2 Longa Ai ne mulopwe wandi monka mowalongele Yediko ne mulopwe wandi,+ inoko mubwanya kusela bitūtwa byandi ne bimunanwa byandi ke byenu. Jikilai kunyuma kwa kibundi.”
3 Ebiya Yoshua ne bana-balume bonso ba bulwi bakanda ku Ai. Yoshua watonga ba bulwi bakomokomo 30 000 webatuma bufuku.
4 Webapa uno musoñanya’mba: “Talai, mufwaninwe kujikila kunyuma kwa kibundi. Kemwakyendai kulampe mpata na kibundi, kadi mwilongololei banwe bonso.
5 Ami ne bantu bonso badi nami tusa kufwena ku kibundi, shi abaiya kwitutamba na mobalongēle dibajinji,+ tusa kwibanyema.
6 Shi kebetupanga, tusa kwibapalwila kulampe na kibundi, mwanda basa kunena’mba, ‘Abetunyema na mobetunyemene dibajinji.’+ Netu tusa kwibanyema.
7 Penepa mufwaninwe kutamba pomufyeme mukakwate kibundi; Yehova Leza wenu usa kwimupa’kyo mu makasa enu.
8 Shi mubakwata’tu kibundi, mufwaninwe kwikisōka mudilo.+ Longelai mungya kinenwa kya Yehova. Talai, nemupe misoñanya yenu.”
9 Ebiya Yoshua webatuma, nabo baenda ku kifuko’kya kukebajikila; baimana pa bukata bwa Betele ne Ai, dya kushika kwa Ai, papo Yoshua walāla bufuku’bwa na bantu.
10 Kupwa Yoshua wabūka lubanga futwi wakongakanya* bibumbo bya basola, aye ne bakulumpe ba Isalela baenda nabo ku Ai.
11 Bana-balume bonso ba bulwi+ badi nandi bakanda bafika kumeso kwa kibundi. Batūla nkambi kungala kwa Ai, ino musanza wadi pa bukata bwabo ne Ai.
12 Mu kine kitatyi’kya, wayata bana-balume kintu kya 5 000 webanena bafyame+ pa bukata bwa Betele+ ne Ai, dya kushika kwa kibundi.
13 Ebiya bantu batūla nkambi mikatampe dya kungala kwa kibundi,+ basola ba kunyuma nabo kushika kwa kibundi,+ ino Yoshua waenda bufuku’bwa mu bukata mwa musanza.*
14 Ino mulopwe wa Ai pa kumona’tu kino, aye ne bana-balume ba kibundi batamba lubilo lubanga futwi kukasambakana Isalela mu bulwi pa kifuko kimo kitadidile mu dilungu mudi zolē. Ino kadipo uyukile amba kwadi bantu badi bamufyamine kunyuma kwa kibundi.
15 Bana-balume ba Ai pa kwibatamba bulwi, Yoshua ne Isalela ense banyemena mu dishinda dyenda mu ntanda mutuputupu.+
16 Penepa bantu bonso badi mu kibundi baitwa kwibalonda; ino abo pa kulonda Yoshua badi benda basonsoloka kulampe na kibundi.
17 Kekwashelepo mwana-mulume nansha umo mu Ai ne mu Betele kaendelepo kukapanga Isalela. Bashiya kibundi pululu kebalonda Isalela.
18 Ebiya Yehova wanena Yoshua amba: “Olwela musungu udi mu kuboko kobe dya ku Ai,+ mwanda nsa kumupāna mu makasa obe.”+ Penepa Yoshua waolwela musungu wadi mu kuboko kwandi dya ku kibundi.
19 Kitatyi kyawaolwele kuboko kwandi, bantu badi bafyeme’ba batamba lubilo pa kifuko’pa banyemena mu kibundi bekikwata. Ne kwija kwine mpika basōka kibundi.+
20 Bana-balume ba Ai pa kuvundamuka bamona mwishi wa kibundi ukanda mu makumbi, kebakidipo monka na bukomo bwa kunyema mu dishinda dyo-dyonso. Penepa bantu badi banyemena mu ntanda mutuputupu baalamukila boba badi bebalonda.
21 Yoshua ne Isalela ense pa kumona’mba bantu badi bafyeme’ba abakwata kibundi ne pa kumona mwishi wa kibundi ukanda, baalamuka kebatambe bana-balume ba Ai bulwi.
22 Penepa bantu bakwabo batamba mu kibundi kukebasambakana, ebiya bana-balume ba Ai bajikilwa pa bukata, bene Isalela bamo uno mutamba bakwabo owa mutamba, bebepaya enka ne byokekwashelepo muntu nansha umo wapandile nansha kunyema.+
23 Ino bakwata mulopwe wa Ai+ mūmi bamuleta kudi Yoshua.
24 Isalela pa kupwa kwipaila bekadi bonso ba Ai mu ntanda, mu ntanda mutuputupu mobadi bebalonda, kadi muntu wa mfulo mobadi pa kupwa kwipaibwa na kipete, penepa Isalela ense waalamukila ku Ai wamukupila na kipete.
25 Boba bonso bafwile dyodya difuku, tamba ku mwana-mulume kutūla ne ku mwana-mukaji, badi 12 000, ke bantu bonso ba Ai kadi.
26 Yoshua katūkijepo kuboko kwandi kwaadi olwele nako musungu+ kufika ne byawaonakenye fututu+ bekadi bonso ba Ai.
27 Penepo Isalela wayata bimunanwa ne bitūtwa bya kibundi ke byabo, mungya misoñanya yobapele Yoshua kudi Yehova.+
28 Kupwa Yoshua wasōka Ai wekilonga ke mulwi wa masala a nyeke,+ monka moekadile’ko ne dyalelo.
29 Wayeyeka mulopwe wa Ai ku mutyi kufika ne ku kyolwa, kadi dyuba podyadi kedipone, Yoshua wasoñanya batūkije umbidi wandi mufwe ku mutyi.+ Kupwa bewela ku ntwelelo ya kibelo kya kibundi balundika mulwi mukatampe wa mabwe padi, ukidi’po ne dyalelo.
30 I mu kine kitatyi’kya mwaikele Yoshua kūbakila Yehova Leza wa Isalela kisōkelo ku Lūlu lwa Ebalu,+
31 monka mobasoñaninye’kyo bene Isalela kudi Mosesa mwingidi wa Yehova ne monka mokilembēlwe mu mukanda wa Bijila+ wa Mosesa amba: “Kisōkelo kya mabwe matuntulu ampikwa kwingilwa na kingidilwa kya kyuma nansha kimo.”+ Apo ye pobalambwidīle Yehova byamulambu bisōkwe ne bitapwa bya kipwano.+
32 Ebiya watentwila pa mabwe’pa Bijila+ byalembele Mosesa ku meso a bene Isalela.+
33 Isalela ense, bakulumpe babo, bemaniji ne batyibi babo badi bemene bukila ne bukila bwa Sanduku betadidile na babitobo bene Levi badi baselele sanduku wa kipwano kya Yehova. Beni ba kibundi badi konka pamo ne benē ntanda.+ Kipindi kimo mobadi kyadi kimene kampalampala na Lūlu lwa Ngedizimi, kipindi kikwabo kampalampala na Lūlu lwa Ebalu+ (monka mwasoñaninye’kyo Mosesa mwingidi wa Yehova dibajinji),+ mwanda wa kwesela bantu ba Isalela.
34 Kupwa papo watanga na diwi ditunduke binenwa byonso bya Bijila,+ madyese+ ne mafingo,+ mungya byonso bilembelwe mu mukanda wa Bijila.
35 Kekudipo kinenwa nansha kimo mu byonso byasoñenye Mosesa kekyatangilwepo na Yoshua na diwi ditunduke ku meso a kipwilo kyonso kya Isalela,+ kubadila’mo ne bana-bakaji ne bana ne beni ba kibundi+ badi bashikata* mu bukata mwabo.+
Kunshi kwa Dyani
^ Nansha’mba “wabungakanya.”
^ Nansha’mba “dilungu dya musanza.”
^ Kishima pa kishima i, “bananga.”
