Zekadia 5:1-11
5 Kadi natala monka, namona muvungo utumbuka.
2 Wangipangula’mba: “Le ubamone bika?”
Nami nalondolola’mba: “Namone muvungo utumbuka, udi na maboko* 20 mu bula ne maboko 10 mu bunkimbwa.”
3 Ebiya waunena’mba: “Ano’a o mafingo atamba pa ntanda yonso, mwanda muntu ense wiba,+ monka mokilembelwe mutamba wao umo, kapelwepo mfuto; kadi muntu ense utyipa mutyipo,+ monka mokilembelwe mutamba wao mukwabo, kapelwepo mfuto.
4 ‘Neatume,’ i Yehova wa bibumbo unena, ‘akatwela mu njibo ya ngivi ne mu njibo ya yewa utyipa bya bubela mu dijina dyami; kadi akekala nyeke munda mwa njibo’ya, akeisōka ne mityi yayo ne mabwe ayo.’”
5 Penepo mwikeulu wadi wisamba nami wafwena kaunena’mba: “Nakwisāshila, tala, umone kisa kutamba.”
6 Ebiya naipangula’mba: “Le i kika?”
Nandi walondolola’mba: “Kino’ki i kintu kya efa* kitamba.” Wabweja’ko amba: “Uno’u o mumwekelo wabo mu ntanda yonso.”
7 Kadi namona’mba mpūto mibumbakane ya fweta yadi mipūtulwe, kwadi mwana-mukaji wadi ushikete mu kintu’kya.
8 Penepo wanena’mba: “Uno’u i Bubi.” Ebiya wamujokejeja mu kintu kya efa, kupwa waela bulēmi bwa fweta ku milomo yakyo.
9 Penepo natala, namona bana-bakaji babidi bāya bafwena, kadi badi balelemba mu luvula. Badi na mapapa pamo bwa mapapa a kakumbi. Batekwina kintu’kya pa bukata bwa ntanda ne mūlu.
10 Penepo naipangula mwikeulu wadi wisamba nami amba: “Le kintu kya efa’kya bendanga nakyo kwepi?”
11 Nandi walondolola’mba: “Ku ntanda ya Shinadi*+ kukamūbakila njibo; shi ibalongololwa, ukatūlwa’mo mu kifuko kyandi kifwaninwe.”
Kunshi kwa Dyani
^ Kuboko kumo i masantimetele 44,5. Tala Mbwejo B14.
^ Kishima pa kishima i, “efa,” pano kifunkila pa kintu nansha kilala kyadi kingidijibwa mwanda wa kupima efa umo. Efa umo i malitele 22 (makwatyi 20 a byūmu). Tala Mbwejo B14.
^ Ko kunena’mba, Babiloni.
