Zekadia 6:1-15
6 Penepo natala monka, namona makalo aná atamba pa bukata bwa ngulu ibidi, kadi ngulu’ya yadi ya mukuba.
2 Dikalo dibajinji dyadi na tubalwe tutyila, dikalo dya bubidi nadyo na tubalwe tufīta.+
3 Dikalo dya busatu dyadi na tubalwe tutōka, dikalo dya buná nadyo na tubalwe twa matonyematonye ne makeme afīta.+
4 Naipangula mwikeulu wadi wisamba nami amba: “A mfumwami, le bino i bika?”
5 Mwikeulu waunondolola’mba: “Ino i mishipiditu iná+ ya mūlu yenda pa kupwa kwimana ku meso a Mfumu wa ntanda yonso.+
6 Dyodya* didi na tubalwe tufīta dyendanga ku ntanda ya kungala;+ tutōka ato twendanga kupita ne ku dijiba; kadi totwa twa matonyematonye twendanga ku ntanda ya kunshi.
7 Kadi twa makeme afīta twadi na kipyupyu kya kwenda kukanangakana pa ntanda.” Kupwa wanena’mba: “Endai, nangakanai pa ntanda.” Nato twashilula kunangakana pa ntanda.
8 Penepo wangela lubila kanena’mba: “Tala, tubalwe twenda ku ntanda ya kungala, tubalengeja mushipiditu wa Yehova ukōkolokwe mu ntanda ya kungala.”
9 Kinenwa kya Yehova kyaiya monka kondi amba:
10 “Kayate kudi Heledai, Tobiya, ne Yedaia byobya byobaselele ku misungi; kadi mu dyodya difuku, ukenda ku njibo ya Yoshia mwanā Zefenia pamo ne boba batambile ku Babiloni.
11 Ukayata ndalama ne olo, ulonge kilukwa,* uvwike’kyo Yoshua+ mwanā Yehozadake, kitobo mukatampe ku mutwe.
12 Musapwile’mba,“‘Yehova wa bibumbo wanena namino amba: “Uno’u i muntu wa dijina dya bu Mutombo.+ Ukamena pa kifuko kyandi, kadi ukōbaka tempelo ya Yehova.+
13 Aye ye ukōbaka tempelo ya Yehova, kadi aye ye ukekala mukatakata. Ukashikata pa lupona lwandi ne kubikala, kadi ukekala ne bu kitobo pa lupona lwandi,+ kukekala kwiivwanika kwa ndoe pa bukata bwa bino bibidi.*
14 Kadi kilukwa* kikekala bu kivulukilo* kudi Helema, Tobiya, Yedaia+ ne Hene mwanā Zefenia mu tempelo ya Yehova.
15 Boba badi kulampe bakāya ne kukwasha ku lūbako lwa tempelo ya Yehova.” Kadi mukayuka’mba Yehova wa bibumbo wantumine komudi. Kadi kikalongeka—shi kemukomenwepo kwivwana diwi dya Yehova Leza wenu.’”
Kunshi kwa Dyani
^ Ko kunena’mba, dikalo.
^ Nansha’mba “kilukwa kikatampe.”
^ Ko kunena’mba, pa bukata bwa mwingilo wandi wa bu mulopwe ne wa bu kitobo.
^ Nansha’mba “kilukwa kikatampe.”
^ Nansha’mba “kivulujo.”
