Zekadia 7:1-14
7 Kadi mu mwaka wa buná wa Mulopwe Dadiusa, kinenwa kya Yehova kyaiya kudi Zekadia+ mu difuku dya buná dya kweji wa kitema, ko kunena’mba, kweji wa Kishileve.*
2 Bantu ba Betele batuma Shalezele ne Lekeme-Meleke ne bantu bandi bakazenze Yehova ebatōkelwe mutyima,*
3 bakasapwile babitobo ba ku njibo* ya Yehova wa bibumbo ne bapolofeto amba: “Le ndile mu kweji wa butano+ ne kuleka kudya byakudya, na monalongela myaka mivule?”
4 Kinenwa kya Yehova wa bibumbo kyaiya monka kondi amba:
5 “Sapwila bantu bonso ba ntanda ne babitobo amba, ‘Pomwashikilwe na nzala ne kuyoyokota mu kweji wa butano ne mu kweji wa busamba-bubidi+ mu myaka 70,+ le bine mwashikilwe na nzala pa mwanda wami?
6 Kadi pomwadi mudya ne kutoma, mwene mwadi mudya mwanda wa banwe bene ne kutoma mwanda wa banwe bene?
7 Mwene mwadi mufwaninwe kukōkela binenwa byasapwile Yehova kupityila ku bapolofeto ba pa kala,+ padi pekele bantu mu ndoe mu Yelusalema ne mu bibundi bimujokolokele, ne padi pekele bantu mu Nengeba ne Shefela?’”
8 Kinenwa kya Yehova kyaiya monka kudi Zekadia amba:
9 “Yehova wa bibumbo wanena namino amba, ‘Tyibai mambo na boloke bwa bine,+ kadi mwilongelei bintu na buswe bwa ndamatyidile+ ne na lusa.
10 Kemwakidimbai mukaji wa kishala nansha mwana wampikwa shandi,*+ nansha mweni+ nansha mulanda;+ kadi kemwakekutyilai nkuku mibi mu mityima yenu.’+
11 Ino badi bapela kuta’ko mutyima,+ kadi bavundamine na kibengo,+ bajika matwi abo amba baleke kwivwana.+
12 Baalamwine mutyima wabo pamo bwa dyama*+ kadi kebakōkelepo kijila* ne binenwa byatumine Yehova wa bibumbo na mushipiditu wandi kupityila kudi bapolofeto ba pa kala.+ Ebiya kufītwa mutyima kukatampe kwatamba kudi Yehova wa bibumbo.”+
13 “‘Monka mokebaivwaninepo ponaityile,*+ nami nkyebevwenepo pobaityile,”+ i Yehova wa bibumbo unena.
14 ‘Kadi nebapalakenye na luvula lwa kimpumpu ku mizo yonso yokebadipo bayukile,+ ntanda yashala masala kunyuma kwabo, pampikwa muntu nansha umo upityila’mo nansha ujokela’mo;+ mwanda baalamwine ntanda milumbuluke ke kintu kya nzuba.’”
Kunshi kwa Dyani
^ Tala Mbwejo B15.
^ Nansha’mba “bakanekenye mpala yandi.”
^ Nansha’mba “tempelo.”
^ Nansha’mba “mwanā nshiye.”
^ Bibwanika padi i, “dibwe dyūmu,” pamo bwa dibwe dya emedi.
^ Nansha’mba “bulombodi.”
^ Kishima pa kishima i, “pawaityile.”
