KIPANGUJO 2
I Muswelo’ka Obwanya Kuyuka Leza?
“Uno mukanda wa Bijila keufwaninwepo kutaluka mu kyakanwa kyobe, ufwaninwe kwiutanga na diwi ditūke dyuba ne bufuku mwanda wa kulama senene byonso bilembelwe’mo; nabya ukanekenya dishinda dyobe ne kadi ukalonga bintu na tunangu.”
“Baendelela kutanga mukanda na diwi ditunduke, Bijila bya Leza wa bine, bashintulula’o biyampe ne kulombola buluji bwao; penepo bakwasha bantu bevwanije byadi bitangwa.”
“Wa nsangaji i yewa kanangilapo mwendele madingi a babi . . . , ino aye uloelelwe bijila bya Yehova, kadi utañanga bijila bya Leza na diwi ditūke dyuba ne bufuku. . . . Kadi bintu byonso byalonga bikendeka.”
“Fidipa wanyemena’ko kaenda widikunkuja, wamwivwana utanga na diwi ditunduke mukanda wa Isaya, mupolofeto, wamwipangula’mba: ‘Le bine uyukile byotanga’byo?’ Nandi walondolola’mba: ‘Lelo binebine ndyuka’byo namani shi kekudipo muntu wa kunombola?’”
“Ngikadila yandi yampikwa kumweka i mimweke patōka tamba ku kupangwa kwa ino ntanda, mwanda i mimwekelele mu bintu byalongele, enka ne bukomo bwa nyeke ne Buleza bwandi, o mwanda kebadipo mwa kwikañenya.”
“Langa bininge bino bintu; wielelele monka, amba bantu bonso bamone patōkelela kwendelela koendelela.”
“Twitei mityima batwe bene na bene mwanda wa kwikankamikila ku buswe ne ku mingilo milumbuluke, ne kuleka’byo kwibungila pamo kwetu mpika.”
“Shi momudi’mo mudi umo ubudilwe tunangu, nankyo alombe’to nyeke kudi Leza, mwanda aye upanga bonso na mutyima tō pampikwa kutopeka, nato tukamupebwa.”
