Yesu wāsapwidile bandi bana ba bwanga’mba: “Mukekala bami batumoni . . . ne kulakula kwine kwa ntanda.” (Bil. 1:8) Dyalelo, Batumoni ba Yehova bavuijanga uno mwingilo na bukankamane. Inoko kudi bipindi bimo bya ntanda, nakampata byobya bikatampe muyudile bantu bavule, kemwasapwilwe bukamoni ne pa mfulo. Kadi mu matanda amo namo, mudi’tu Batumoni batyetye. (Mat. 9:37, 38) Le tuloñanga namani mwanda wa kusapwila bantu bavule?

 Pa kwitukwasha tulonde musoñanya wa Yesu, Komite wa Mingilo wa ku Kitango Kyendeji kya Batumoni ba Yehova utumanga bamishonele ku bifuko bisakilwa basapudi kujokoloka ntanda yonso. Kepaijije, batumine bamishonele 3 090 kujokoloka ntanda yonso. a Bavule bafundijibwe ku masomo a Bible, kimfwa ku Masomo a Basapudi ba Bulopwe. Bamishonele betabijanga na mutyima tō kutamba mu yabo ntanda ne kuvilukila mu ntanda ya bweni. Byobadi batame ku mushipiditu, bafundijibwe, kadi na bwino, bano bamishonele ba kikōkeji bakwashanga mu kusambakanya myanda miyampe, ne kushila bana ba bwanga bapya kimfwa.

 Ku musambo ne musambo, Bilo ya Mingilo ipelwe mwingilo wa mwaba (banabetu batala mwingilo) ingidilanga pamo na komite wa musambo mwanda wa kuvuija bisakibwa bya bamishonele, kimfwa kwibasokwela njibo itadika’ko, kwibondapija, ne kwibapa kadyeya ka kwaluja lupeto lobalupula. Mu mwaka wa mingilo wa 2020, Batumoni ba Yehova balupwile kintu kya madolala midiyo 27 mwanda wa kuvuija bisakibwa bya bamishonele. Pa mwanda wa buno bukwashi, bamishonele babwanya kuta mutyima bininge ku mwingilo ne kwingidija’mo bukomo bwabo, enka ne kukomeja bipwilo byobatuminwe’ko.

 Le bamishonele bakwashanga namani ku mwingilo wa busapudi? Frank Madsen, wingilanga mu Komite wa Musambo wa Malawi unena’mba: “Na bukankamane ne bwino bwabo, bamishonele bakwashanga bipwilo bishilula kusambakanya musapu mu myaba mikomo, kimfwa kusapula ku bifuko bilaminwe bininge ne mu myaba ya ndimi myeni. Bukomo bobalonga bwa kwifunda ludimi ne bibidiji, bulengejanga bakwabo balonde kimfwa kyabo, kadi bakwashanga bankasampe bekale na mumweno muyampe pa mwingilo wa kitatyi kyonso. Bine, tufwijanga’ko Yehova pa bano bamishonele.”

 Tutu mukwabo wa mu Komite wa Musambo wa mu ntanda mikwabo unena’mba: “Bamishonele i bimfwa bimweke bilombola’mba bantu ba Yehova badi mu bumo ntanda yonso. Enka ne boba kebadipo Batumoni babwanya kumona’mba bibidiji kebitukalañenyepo, ino amba bufundiji bwa Bible i bwitukwashe twikale bana na bana badi mu bumo.”

 Le bamishonele bakwashanga namani basapudi ba kobatuminwe? Paulo, wa mu Timor-Leste, ufwijanga’ko pa bamishonele batuminwe mu kyabo kipwilo. Unena’mba: “Kuno kwetu kudi kyanga bininge. Ino nansha bamishonele byobatambile ku kifuko kya mashika, kino kyanga kekibalengejangapo baleke kusapula. Batanwanga nyeke lubanga ku kupwila kwa kwenda mu busapudi. Nebamonanga nyeke balonga kujokela’mo mu dyuba mu mitwe pokudi kyanga bininge, ne ku kyolwa. Ke bakwashe bantu bavule bayuke bubine, kubadila’mo ne ami. Mu būmi bwabo bengidilanga Yehova na bupyasakane ne buzanzamuke, kadi kino kikankamikanga kipwilo nakyo kimwingidile ne pa mfulo.”

 Ketti, pania wa lonso mu Malawi, usekununa mobakwashishe kyandi kisaka kudi ba mulume ne mukaji bamishonele amba: “Pobatumine ba mulume ne mukaji bamishonele mu kyetu kipwilo, nadi Kamoni bunka bwami mu kyetu kisaka. Ino bano ba mulume ne mukaji bankweshe bininge, kadi balamete kyetu kisaka bininge. Kimfwa kyabo kiyampe kyakweshe bami bana bamone amba kwingidila Yehova kuletanga būmi bwa nsangaji. Pa mwanda wa ngikadila miyampe ya bamishonele, bami bana basatu bana-bakaji i bapania ba lonso kadi wami mulume washilwile kutanwa ku kupwila.”

 Lelo lupeto lupebwanga bamishonele lwalujibwanga namani? I kupityila ku byabuntu bya ntanda yonso, bivule bine biletwanga mu miswelo ilombwelwe mu donate.pr418.com. Bine, bino byabuntu bidi na mvubu mikatampe.