Mu Kweji 3, 2020, paelele Bulongolodi bwa Ntanda Yonso Butala Myanda ya Bukomo bwa Ngitu musapu wa kupona kwa kipupo kya COVID-19, bantu bavule kebadipo balanga’mba bīshi bya kino kipupo byadi bya kukambakanya ntanda yonso mwaka umo pa kupita’po. Bantu midiyo ne midiyo, kubadila’mo ne Batumoni ba Yehova, basusukanga ku ngitu, mu ñeni ne kubulwa lupeto pa mwanda wa kipupo. Le Batumoni ba Yehova baletele bukwashi namani mu kino kitatyi kya kipupo?

 Na buludiki bwa Komite wa Bakwatakani wa Kitango Kyendeji kya Batumoni ba Yehova, kwalongelwe Makomite 950 ne kupita a Kukwasha Baponenwe na Bimpengele kujokoloka ntanda yonso mwanda wa kukwasha mu kitatyi kya kipupo kya COVID-19. Kyaba kimo banenene bipwilo bya mu kibundi bikwashe’ko, kyaba kikwabo nakyo, Batumoni batambwile bukwashi bwa Leta. Kadi Makomite a Kukwasha Baponenwe na Bimpengele ateakenye’ko bukwashi bukatampe.

 Kimfwa, tulangulukilei pa byalongekele mu Paraguay. Julunale imo yalombwele amba, pa mwanda wa lupeto lwakomene pangala pa kipupo, “bantu bavule ba mu Paraguay kebadipo na bya kudya bivule mu mobo abo.” Ino batutu ba mu Paraguay badi mu ino komite badi kala ke bashilule kwabanya bivwe mwadi bintu bya kukwasha mu mayenga abidi—byakudya bibwane, bingidilwa bya kukundula nabyo, bya bukundwe, ne bintu bya kulama bukundwe ku kisaka kyonso kya bantu baná. Mu kivwe ne kivwe mwadi bintu bibwanya kupotwa na kintu kya madolala 30.

 Le bano bantu badi babanya bya bukwashi bekingile namani ku bīshi bya COVID-19 abo ne bantu bakwabo? Badi bavwele ku myulu bintu bya kwikinga ne kwimana beshidile kyaba na bantu bakwabo. Kadi babandaulanga shi masosiete ebapa bya kudya bya kwabanya adi na bifuko bikundule senene ne kuta mutyima ku kwikinga senene. Ko kunena’mba, batalanga shi bonso batenga ku byabuntu bavwele bya kwikinga, myotoka yabo mikundule kadi kutūtwe lawa ipaya bishi, ne kutūta lawa ipaya bīshi mu kifuko kyobatūdile’mo bintu. Ku mfulo boba bāya kuleta bivwe bya byabuntu bemananga kulampe na banabetu batambula’byo.

 Mu Kweji 1, 2021, Komite wa Bakwatakani waitabije kulupula madolala midiyo 25 ne kupita mwanda wa kukwasha mu kipupo kya COVID-19. Misambo ne Makomite Akwasha Baponenwe na Bimpengele, bengidijanga senene luno lupeto lwa byabuntu ne kulonga bukomo bwa kupota bintu bisakibwa ku bei mityetye. Kimfwa mu Shili, batutu badi bateakanya mwingilo wa bukwashi badi basaka kupota makilo 750 a nkunde. Inoko bei ya nkunde yelundile’ko pabidi mu kweji’tu umo! Ino mansá abidi pa kupwa kwitabija kupota nkunde ku bei mikande, muntu wadi upotoloja webalombola’mba mpotyi mukwabo wanena’mba kakipotepo nkunde. Ino pa kyaba kya kushinta bei mikande yobeivwanikile, uno wadi upoteja nkunde wanena batutu bamupote ne nkunde yobapelele kudi mpotyi mukwabo ku lupoto lwa mu kweji mupite!

 Ino batutu pa kwenda ku kasela nkunde, uno muntu wadi upotoloja nkunde kapele kwibapa’yo, webanena’mba kemwabangapo byakudya na mwabilanga’byo malongolodi makwabo. Pa kupwa kulombela mundamunda, tutu umo walombola uno muntu amba kipwilo ne kipwilo kyalongele kala bukomo bwa kuyuka bene basakilwa bukwashi. Kadi batutu bashintulula’mba pa mwanda wa kwishila kwa bibidiji bya bene ba kutambula bukwashi, mu kivwe ne kivwe mukelwa’nka bintu bikakwasha kisaka kikatambula’kyo. Ku mfulo bakulupija uno muntu amba, byabuntu byonso bya lupeto ne mingilo ingila Batumoni ba Yehova i bya kwilanga. Watulumuka. Uno muntu wadi upotoloja nkunde waitabija kutyepeja bei ne kunena’mba usa kutentekela’po kyabuntu kyandi kya makilo 400 a nkunde shi abaiya kupota monka.

 Lusu, mukaji wa kishala mununu wa mu Liberia, udi mu kisaka na bantu batano. Pobadi badya byakudya bya lubanga ne kubandaula kisonekwa kya difuku lubanga, munkana Lusu wa myaka isamba-ibidi wajingulula’mba kebakidipo na byakudya bivule mu njibo. Waipangula’mba, “le tusa kudya bika?” Lusu wamukulupija’mba ke mulombe kala bukwashi ne amba ukulupile amba Yehova usa kwibakwasha. Ku kyolwa, bakulumpe ba pa kipwilo baita Lusu akasele byakudya bya bukwashi. Unena’mba: “Wami munkana wanenene amba pano nayuka’mba Yehova ubwanya kwivwana milombelo ne kwiilondolola mwanda walondolola milombelo yobe.”

 Lolo umo wa mu République démocratique du Congo ushikatanga kubwipi na kisaka kya Batumoni. Paamwene banabetu mu lwitabijo bakapa kino kisaka byakudya, wanenene amba, “shi kipupo kibapu, tusa kwikala Batumoni ba Yehova mwanda mu kino kitatyi, batele banababo mutyima.” Wandi mulume wamwipangula’mba, “usa kwikala Kamoni wa Yehova pa mwanda’tu wa kafuko ka mutyele?” Walondolola’mba, “Aa, ino i mwanda kupebwa mutyele i kilomboji kya buswe bwa binebine.”

 Batumoni ba Yehova babwanyanga kuvuija bukidibukidi bisakibwa bya banababo mu kino kitatyi kya kipupo pa mwanda wa byabuntu byotūla na buswe. Wafwa’ko pa mwanda wa byabuntu byotūla mu miswelo ilombwelwe mu donate.pr418.com.