Mavideo a ku bitango bya ntanda ateñanga mityima yetu ne kwitukwasha twivwanije senene bufundiji bwa mu Bisonekwa. Ku kitango kya ntanda kya 2020 kinena’mba “Sangalai Mafuku Onso”! kudi mavideo 114, kubadila’mo ne mīsambo 43 inenene batutu ba mu Kitango Kyendeji ne bakwashi babo. Le uyukile bukomo bulongwa ne lupeto lujimina pa kulupula ano mavideo?

 Batutu kubwipi 900 ba ntanda yonso, bapēne kitatyi ne bwino bwabo mwanda wa kukwasha ku kulonga ino mpangiko. Baingile uno mwingilo mu kintu kya mansá tununu 100 mu myaka ibidi mituntulu. Mu ano mansá mubadilwa ne mansá 70 000 aingilwe pa kulupula drame ya mu Bible ya minite 76 inena’mba, Nehemia: “Nsangaji ya Yehova I Kifuko Kyenu Kikomejibwe.”

 Na bubine, byalombele lupeto luvule pa kuvuija bisakibwa bya bano banabetu ba mutyima wa kwipāna, pa kwibakwasha na bya busendwe, bingidilwa, ne mobo obadi basakilwa pa kuvuya uno mwingilo.

 tu Jared Gossman, wingilanga ku Mingilo ya Mawi ne Mavideo unena’mba: “Komite wa Bufundiji wa Kitango Kyendeji usakanga bininge mu mavideo etu mumweke bibidiji ne bifuko bya koku ne koku. Mu uno muswelo, mavideo etu akamwekeja patōka’mba twi bana na bana ntanda yonso. Pa kufikila pa kino kitungo, bisumpi 24 bya mu matanda 11 bingidilanga pamo mu uno mwingilo. Pa kukwasha banabetu ba koku ne koku bengidile pamo senene, byalombele lupeto luvule, kutandika bintu ne kwibikwatakanya senene.”

 Pa kulonga etu mavideo mavule, twadi tusakilwa bingidilwa ne bipungwa bya pa bula. Kimfwa, bipungwa bya mu drame inena’mba Nehemia: “Nsangaji ya Yehovah I Kifuko Kyenu Kikomejibwe” byaubakilwe mu stidio ya Mount Ebo kubwipi na Patterson, New York, mu États-unis. Pa kwingidija senene byabuntu bipēnwe, ne pa kumwekeja filime ilombola bintu bya bine bya pa kala, batutu baubakile na bipungwa bipēla bya kumwekeja mumbu iifwene na ya Yelusalema wa kala. Kipungwa ne kipungwa kyadi kilongwe na mityi, na mametele asamba mu bwimwa, kadi kipente mu muswelo okimweka bu dibwe. Ino “mumbu,” yadi ibwanya kutekunwa mwanda wa kwiingidija mu kya kumwena’ko kikwabo, kintu kyatyepeje’ko buvule bwa bipungwa byadi bisakibwa. Nansha nankyo, pa kulonga bintu bya kubweja mu drame’tu kete, byalombele kulupula madolala 100 000. a

 Kuyuka ino myanda kwitulengeja tufwije’ko bininge pa mpangiko ya kitango kya ntanda kya uno mwaka. Tukulupile amba bukomo bwalongelwe pa kuteakanya kino kitango bukalengeja bantu ba ntanda yonso batendele Yehova. Mwafwai’ko pa byabuntu bya mwingilo wa ntanda Yonso byomutūla na buntu pa Entelenete mu donate.pr418.com ne mu miswelo mikwabo.