“Nadi ntengēle’dyo mu bula bwa myaka 19!” Le uno mwanetu mu lwitabijo wadi utengēle bika? I Bwalamuni bwa Ntanda Mipya bwa Bisonekwa bya Kingidiki bya Bwine Kidishitu mu lwabo ludimi lwa Bengali. Bantu bavule banenene uno muswelo patambile Bwalamuni bwa Ntanda Mipya mu lwabo ludimi. Ino le kodi mwiipangule bine bilombwa pa kwalamuna ne kulupula ano Mabible?

 Dibajinji, batoñanga kisumpi kya kwalamuna na buludiki bwa Komite wa Balembi wa Kitango Kyendeji. Le kisumpi kya balamuni kiloñanga bitatyi binga pa kwalamuna Bible? Nicholas Ahladis, tutu wingilanga mu Mwingilo wa Bwalamuni ku Warwick, New Yord, ushintulula’mba: “Kudi bintu bivule bya kutala, kimfwa kuyuka bungi bwa balamuni badi’ko mwanda wa kwingila uno mwingilo, mwine mwikadile ludimi, muswelo wivwana batangi mwādi mwikadile būmi mu bitatyi byālembelwe Bible, ne mwishidile ludimi mu bifuko bishileshile. Bilombanga kisumpi kya bwalamuni kintu kya mwaka umo kutūla ku isatu pa kwalamuna’tu Bisonekwa bya Kingidiki bya Bwine Kidishitu, ne myaka iná nansha ne kupita pa kwalamuna Bible yense mutuntulu. Bilombanga’nka ne kitatyi kilampe bininge mu ndimi ya batumama.”

 Pa kwalamuna Bible bilomba bintu bivule kupita’ko’tu kwikala na kisumpi kya bwalamuni. Kibumbo kya batangi ba panja ba būmi bwishileshile—ne kyaba kimo ba mu matanda palapala—ba kubandaula byalamwinwe, ne kwingila pampikwa kwilea. Mwingilo obengila ukwashanga balamuni balupule Bible wa bine, upēla kwivwana, kadi munene munenenwanga. Ne kadi, monka mwanenene’kyo mufundiji umo wa balamuni ba Bible mu Afrika wa Kunshi, “balamuni bamwene amba badi na kiselwa kikatampe ku meso a Yehova ne a batangi ba Kinenwa kyandi.”

 Shi bwalamuni bubapu, Mabible afwaninwe kutampwa ne komekwa. Pa kino, bitampilo bingidijanga “bintu” dikumi: papye, bwino, bya kulonga nabyo kibalu, bya kulamika nabyo, bya kunekenya nabyo kibalu, mani a ndalama, bya kudyangula nabyo, tubāla, bya kukwatyija bibalu, ne bya kupapila nabyo mwanda wa kulamika Bible pamo. Mu 2019, twalupwile madolala Midiyo 20 ne kupita mwanda’tu wa bino bintu bya kukwasha pa kulupula Bible. Banabetu baingile ku bitampilo, baingile mansá 300 000 ne kupita mu uno mwaka mwanda wa kulupula ne kutuma Mabible.

 Mwanda waka tupityijanga bitatyi bivule ne kulupula lupeto luvule pangala pa ino mingilo? Joel Blue wa ku Mwingilo wa Ntanda Yonso wa Kutampa Mabuku unena’mba, “Bible i dibuku dya kamweno bininge dyotulupulanga. O mwanda tukimbanga mumwekelo wadyo utumbije Leza otutōta ne musapu otusapula.”

 Kutentekela pa Bible wa Bwalamuni bwa Ntanda Mipya otulupulanga, tulupulanga ne Mabible a batangi badi na bisakibwa bya pa bula. Kimfwa, Bwalamuni bwa Ntanda Mipya bwa bilembwa bya bampofu budi mu ndimi dikumi. Pa kulonga Bible wa bilembwa bya bampofu mutuntulu bilomba nsá mwānda, kadi mavolime mavule matulwe pamo abwanya kudya kyaba kya mametele 2 ne musubu. Kadi tulupulanga ne bwalamuni bwa Bible bwa pa bula bwa bantu badi mu bifungo mobetabija’nka mabuku a bibalu binekena.

 Bible wa Bwalamuni bwa Ntanda Mipya ukwashanga bantu bamutanga mu būmi. Kimfwa tala byadi bilongeka mu kipwilo kya Kiluba kya mu kibundi kya Tombe, kidi mu Kongo. Kibundi kya Tombe kidi ku makilomete 1 700 ne kupita na kibikelo, shi wenda mu dishinda dya mutanta-nshi. Batumoni badi’ko badi’tu na Bible umo kete kadi wa Kiluba kya kala. Pa kuteakanya bipindi bya ku kupwila, banabetu badi besambulwila uno Bible, wadi na yeu ke yeu. Ino tamba mu Kweji 8, 2018 muntu yense mu kipwilo waikele na Bwalamuni bwa Ntanda Mipya mu Kiluba, Bible mutuntulu kadi wa muneneno wisambwa dyalelo.

 Kaka umo wisamba Kine Alemanye wanenene pangala pa Bwalamuni bwa Ntanda Mipya bujadikwe bwa mu lwabo ludimi amba: “Nkikinenangapo amba mfwaninwe kutanga Bible. Ino neipangulanga’mba, ‘I kitatyi’ka kyombwanya kutanga bininge?’” Mukutwa umo walembele amba: “Baumpele Bible wa Bwalamuni bwa Ntanda Mipya, kadi washinta būmi bwami. Nadi kashā nkyaivwanije Kinenwa kya Leza namonekivwanina ponatanga buno bwalamuni. Nsaka kuyukila’ko bivule pa Batumoni ba Yehova ne pa mwa kwikadila Kamoni.”

 Batangi bonso ba Bwalamuni bwa Ntanda Mipya bafwijanga’ko pa byabuntu biletwa mwanda wa kukwasha ku kulupulwa kwabo. Bino byabuntu bya mwingilo wa ntanda yonso biletwanga mu miswelo ilombwelwe mu donate.pr418.com. Mwafwai’ko ne buntu bwenu.