Batumoni ba Yehova batele banababo mu lwitabijo mutyima bininge. (1 Petelo 2:17) Bavule mu bukata mwetu beivwananga na mwiivwaninanga Tannis, kaka umo wa mu Kenya. Unena’mba, “nsenswe kuyuka bintu bitana batutu ne baka ba ntanda yonso.” Le Tannis ne Batumoni bakwabo midiyo ne midiyo bayukanga namani bintu bilongeka? Tamba mu 2013, tulombolanga bilongeka mu kakipindi Mapya kadi pa site yetu ya jw.org.

 Mu Mapya mudi myanda ikulupilwa īsambila pa Batumoni ba Yehova, kimfwa kulupulwa kwa Bible, mwingilo wa kukwasha baponenwa na bimpengele, mingilo ya lūbako, ne binkumenkume bikwabo bikatampe. Betulombolanga’mo myanda ya batutu ne bakaka bakutyilwe pa mwanda wa lwitabijo lwabo. Kadi mu Mapya mudi myanda mimweke ikankamika itala kampanye ka busapudi ne Kivulukilo. Le i bāni bakimbanga bino bishinte bidi mu mapya, ne biteakanibwanga namani?

 Mapya ateakanibwanga na Bilo Itala Myanda Ipita mu Bantu. Ino bilo idi ku kité kya ntanda, kadi yendejibwanga na Komite wa Bakwatakani wa Kitango Kyendeji. Mu ino bilo mwingilanga batutu ne bakaka 100—kadi bavule mobadi i bengidi ba kwilanga bengidila kwabo, kimfwa balembi, bakimbi ba myanda, basendwe bapunga bintu bimonwa na meso, ne balamuni. Bamo besambanga pa kyaba kya bulongolodi na ba lupusa, badimu ne na ba ku bisanji. Batutu bengila mu ino bilo bakwashibwanga na Mabilo 80 Atala Myanda Ilongeka mu Bantu adi mu misambo ya ntanda yonso.

 Pa kuteakanya mapya, bino ya ku kité ingidilanga pamo na mabilo adi mu misambo.Shi batutu abajingulula’mba i mwanda muyampe kwisambila’po, bakimbanga kuyuka mowikadile ne kukongakanya myanda ikulupilwa. Muno mubwanya kubadilwa kwipangula bantu ne kwisamba na bashayuka. Shi abapu kuyuka myanda yonso, balemba kishinte kya mu mapya, kwikineñenya, kwikibandaula, kwikyelekeja na mafoto, kupwa batuma’kyo ku Komite wa Bakwatakani mwanda wa ekitabije.

 Le banabetu mu lwitabijo beivwananga namani pa ano Mapya? Cheryl kaka umo wa mu Filipine, unena’mba, “nsenswe kushilula difuku na kutanga mapya esambila pa bulongolodi bwa Yehova ne pa bantu bandi.”

 Batangi bavule balombolanga kwishila kwishidile Mapya adi pa jw.org na mapya makwabo a ku bisanji. Tatiana wa mu Kazakstan, unena’mba: “Mfwijanga’ko pa kubwanya kombwanya kukulupila mapya adi pa jw.org. I akulupilwa kadi abine.” Kaka wa mu Meksike witwa bu Alma unena’mba: “Shi twiadingakanye na mapya avutakanya ñeni a ku bisanji, Mapya etu akankamika’po kashā.”

 Mapya i akulupilwa kadi akomeja lwitabijo. Bernard wa mu Kenya, unena’mba: “Mapya i mankwashe mone batutu ne bakaka ba ntanda yonso bu kyami kisaka, pampikwa kubanga kobashikete. Mbwanya kutela majina abo ne ngikadilo yobadi’mo mu milombelo yami.” Kaka umo witwa bu Bybron, nandi wa mu Kenya, unena’mba: “Nsangalanga nyeke shi namone kishinte kīsambila pa kulupulwa kwa Bible mu ndimi mishileshile! Bino bishinte bimvulujanga’mba Yehova kadipo na mboloji.”

 Enka ne myanda ya panopano ya banabetu bobapangapanga ibwanya kwitukankamika. Jackline, wa mu Kenya unena’mba, “kulangulukila pa bukankamane bwabo, kukomejanga lwitabijo lwami. Nkimbanga nyeke kuyuka bintu bibakwashanga bōminine. Monanga’mba tubintu’tu ‘tutyetye,’ kimfwa kulombela, kutanga Bible, ne kwimba, tudi na kamweno pa kukomeja batutu ne bakaka.”

 Beatriz kaka umo wa mu Kosta Rika usangelanga myanda mipya īsambila pa bimpengele bya kipangila. Unena’mba: “Mapya ankwashanga mone muswelo uvuija bulongolodi bwetu bisakibwa bya banabetu bukidibukidi, mu muswelo muyampe kadi na buswe. Kino kinkulupijanga’mba i bulongolodi bwa Yehova.”

 Bine, tufwijanga’ko bininge pa kutambula mapya a panopano atala banabetu ba ntanda yonso! Kebibwanikapo kwikala na ano mapya pakubulwa byabuntu byenu bya mwingilo wa ntanda yonso, bivule bine bitūlwa mu donate.pr418.com. Mwafwai’ko ne byabuntu byenu bya na mutyima tō.