Mwaka ne mwaka, bengidi ba kitatyi kyonso ba pa bula kujokoloka ntanda yonso, betwanga kukafunda ku Masomo a Ngileade a Bwifundi bwa Bible a Watchtower, afundilwanga ku Kitako kya Bufundiji kidi mu Patterson, New York. a Ku ano masomo, bana ba masomo bafundanga’ko mwa kwingidila mingilo biyampe mu bulongolodi bwa Yehova. Buno bufundiji bwibakwashanga pa kukomeja ne kuningija bipwilo ne misambo kujokoloka ntanda yonso.

 Bine Ngileade i masomo afundanga’ko banabetu ba ntanda yonso. Kimfwa, ku kalasa ka 147 kalongelwe mu 2019, kwadi bana ba masomo 56 batambile ku matanda 29. Bana ba masomo bakafundile ku Ngileade badi bengila mwingilo wa kitatyi kyonso wa pa bula, kimfwa banabetu ba mu kisaka kya Betele, batadi ba bipindi, bamishonele, ne bapania ba pa bula.

 Bashilulanga kuteakanya masomo kitatyi kilampe kumeso kwa kufunda musunsa mubajinji mu kalasa. Kimfwa, Bilo ya ku Kité kya Ntanda Yonso Itala Ñendo ipotelanga boba betyilwe ku masomo mabiyé. Ku kalasa ka 147 ka Masomo a Ngileade, bafutyīle mwanā masomo ense wa mu ntanda ya bweni kintu kya madolala 1 075 pa kwenda ku Patterson ne kujoka. Bana ba masomo ba pa bisanga bya Solomon bakende amviyo misunsa iná pa kwenda ku Patterson, kupwa misunsa isatu pa kujokela kwabo. Mu ino ñendo yonso balongele makilometele 35 400! Pa kwibafutyila ku amviyo byalombele kufutyila mwanā masomo ne mwanā masomo madolala 2 300. Pa kutyepeja’ko lupeto lwa kulupula, Bilo ya ku Kité Itala Ñendo yaingidije mpangiko ya ku olodinatele mwanda wa kukwatyila kyaba ku amviyo ku bei itadika’ko. Nansha shi abakwatyila kyaba ku amviyo, ino mpangiko yendelelanga kukimba mabiyé a bei mityetye bininge mu bula bwa mayenga bavule, enka ne myeji. Kadi Bilo ya ku Kité Itala Ñendo poipotanga mabiyé, ingidijanga ne mabiyé ne makilometele ebapelwe bu byabuntu mwanda wa kuleya lupeto.

 Bana ba masomo bavule basakilwanga maviza a kutwela nao mu États-Unis. Pa kino, Bilo ya ku Kité kya Ntanda Yonso Itala Bijila ibakwashanga pa kusokola mavisa a bu mwanā masomo. Pa kusokola viza ne mikanda, bilomba kintu kya madolala 510 ku mwanā masomo ne mwanā masomo.

 Le tumwenanga namani mu masomo afundijibwa bana ba masomo? Hendra Gunawan i mukulumpe mu kipwilo kya Azia wa Kunshi ne Kutunduka. Udi mu kino kipwilo na ba mulume ne mukaji bakafundile ku Ngileade. Unena’mba: “Dibajinji, mu kyetu kipwilo kemwadipo bapania ba lonso. Ino pafikile bano ba mulume ne mukaji, bupyasakane bwabo ne mushipiditu wabo wa kwituma byasambukīle bakwabo, nabo bashilula kwingila bupania. Mwenda mafuku, kaka umo mu kyetu kipwilo nandi waenda ku Masomo a Basapudi ba Bulopwe!”

 Sergio Panjaitan wingilanga ku Betele ya Azia wa Kunshi ne Kutunduka pamo na banabetu bakafundile ku Ngileade. Unena’mba: “Kondi, masomo obafundijibwe ke dyesepo’tu dyobaeselwe’nka abo, ino kadi i dyese kotudi. Bafundile bintu bivule! Ino pa kyaba kya kukimba kwimwekeja bu i bapite bakwabo, betulombolanga byobakafundile. Kino kitulengejanga batwe bonso twikankamike ku mushipiditu.”

 Le lupeto lulupulwanga ku ano masomo lwalujibwanga namani? I na byabuntu bya mwingilo wa ntanda yonso, bivule bitūlwanga mu miswelo palapala idi mu donate.pr418.com. Mwafwa’koi ne byabuntu byenu, bine bikwasha ku masomo afunda’ko banabetu ba ntanda yonso.