Bantu tununu tutwa na tutwa byobabatyijibwanga mwaka ne mwaka, pano tusakilwa mobo mavule a kutōtela’mo. O mwanda Bilo Itala Mwingilo wa Lūbako ntanda yonso, yakwete’ko mpangiko ya kūbaka nansha kulongolola bifuko bya kutōtela’mo 2 700 ne kupita mu mwaka mwa mingilo wa 2020. a

 Ino bya bulanda, kipupo kya COVID-19 kyapalakenye ino mpangiko. Pa kusaka kukinga batutu ne bakaka ne kulēmeka misoñanya ya balupusa, Komite wa Balembi wa Kitango Kyendeji waimikile mingilo mivule ya lūbako kujokoloka ntanda yonso. Inoko, mu mwaka wa mingilo wa 2020, bifuko bya kutōtela’mo 1 700 byaubakilwe ne kulongololwa kumeso kwa kipupo. Ne kadi, mingilo ya kūbaka ku misambo 100 yapwile. Tutalei muswelo wamwenine’mo banabetu ku mingilo ibidi ya lūbako yapwile.

 Musambo wa Kamerune. Betele mibajinji yadi mu Douala, yadi mityetye bininge kadi yadi ilomba mingilo mikatampe pa kwiilongolola. Komite Ulupula Mabuku walangulukile pa kwiilongolola, ino wamona’mba lupeto lwa kulupula pa kwingila uno mwingilo lwadi luvule bininge kutabuka, mwanda mobo adi ke mafwe bininge. Kadi balangulukila ne pa mulangwe wa kupota lubanza lupya nansha kupota mobo ne kwialongolola, ino milangwe nayo bapela’yo.

 Kitatyi’tu kityetye pa kupita’po, batutu baivwana’mba kungala kwa Douala, buludiki i bukwate’ko mpangiko ya kulonga dishinda kubwipi na Njibo yetu imo ya Bitango. Dino dishinda dyadi dya kukwasha pa kufika biyampe ku lubanza lwa Njibo ya Bitango ne kutwela biyampe pa rezo. Bino byo bine byadi bisakilwa musambo. Ebiya Kitango Kyendeji kyaitabija bōbake Betele mipya pa lubanza lwa Njibo ya Bitango.

 Batumoni baingile uno mwingilo pamo na masoshete, kadi kino kyebakweshe bakūle kitatyi ne kelea’ko lupeto. Bine, mwingilo wapwile kwashala ne madolala midiyo ibidi ne kupita, kintu kyoketwadipo tulangila! Kisaka kya Betele kyavilukīle mu ano mobo mapya kumeso’tu kwa COVID-19 kushilula.

 Pano banabetu ba ku Betele ya Kamerune badi na būmi buyampe kadi bengidila mu bifuko biyampe; bamwene Betele mipya bu kyabuntu kibapele Yehova. Ba mulume ne mukaji bamo banenene amba, “tusakanga kwingila bininge mwanda wa kulombola’mba tusangedile kino kyabuntu.”

 Bilo ya Bwalamuni bwa Tojolabal mu Meksike. Mu bula bwa myaka mivule, kisumpi kya bwalamuni bwa Tojolabal kyadi kingidila ku musambo wa Amedika wa pa Bukata, udi kubwipi na kibundi kya Meksike. Inoko ludimi lwa Tojolabal lwisambwanga mu Altamirano ne mu Las Margaritas, ku kintu kya makilometele 1 000! O mwanda balamuni badi bakomenwa kuyuka mutamina ludimi. Kadi musambo wadi ukomenwa kusokola kubwipi, batutu ne bakaka babwenye bisakibwa ba kwalamuna ne kukwatwa mawi mu ludimi lwa Tojolabal.

 Pa kino, Komite wa Balembi wa Kitango Kyendeji wakwete butyibi bwa kuvilwila kisumpi kya bwalamuni ku kifuko kobesamba Tojolabal. Pa kwibavilula, musambo wakwete butyibi bwa kupota njibo ne kwiilongolola. Kwiipota ne kwiilongolola kwalombele lupeto lutyetye kupita’ko kūbaka nansha kuluwa mabilo.

 Mwalamuni umo ulombola byabuyabuya byamwenine’mo amba: “Mu myaka dikumi yonaingile bu mwalamuni ku musambo, nadi nkyatene kubwipi kisaka nansha kimo kīsamba lwami ludimi. Pano bilo yetu ya bwalamuni idi mu kifuko kine kyobesamba’mo Tojolabal. Netananga difuku ne difuku na bantu besamba Tojolabal. Kino kibankwasha numbulule muneneno wami ne mwingilo wami.”

 Mu mwaka wa mingilo wa 2021, i kukwatwe mpangiko ya kūbaka mabilo a bwalamuni 75 ne mobo a kufundila’mo Bible shi bibwanika. Tusa kwendelela kwingila mingilo mwanda wa kūbaka misambo, kubadila’mo ne mwingilo mupya wa ku kité kya ntanda ku Ramapo, mu New York; ne kuvilula musambo wa Arjantine ne wa Itadi. Kadi tusakilwa Mobo a Bulopwe mapya 1 000; bifuko bya kutōtela’mo 6 000 ne kupita kebidipo biyampe, bisakilwa kupingakanibwa; ne Mobo a Bulopwe 4 000 nao asakilwa kulongololwa.

 Le lupeto lwa kūbaka nalo ne kulongolola mobo lwatambile kwepi? Tutu Lázaro González, wa mu Komite wa Musambo wa Amerika wa pa Bukata, walondolwele kino kipangujo paadi wisambila pa mwingilo wa kūbaka Bilo ya Bwalamuni bwa Tojolabal. Wanenene amba, “Mu mwaba wa wetu musambo, tudi na misokwe mityetye. O mwanda pakubulwa bukwashi bwa kisaka kyonso kya banabetu, ketwadipo ba kubwanya kūbakila banabetu mu lwitabijo mabilo a bwalamuni. Lupeto lwaletele banabetu ba ntanda yonso, lwetukweshe tufwenye balamuna kubwipi na bantu besamba lwabo ludimi. Tufwija’ko bya binebine kisaka kya banabetu ba ntanda yonso pa bukwashi bwabo.” Bine, ino mingilo ya lūbako ingilwanga kupityila ku byabuntu bya mwingilo wa ntanda yonso, bivule bine bitūlwanga pa Entelenete mu donate.pr418.com.