Kweji ne kweji, twabilanga kutala mampangiko ne mavideo akankamika alupulwa mu Televijo ya JW. Inoko, banabetu bavule mu Afrika kebabwanyapo kutala ano mampangiko pa Entelenete. Mwanda waka?

 Bantu bavule mu Afrika kebadipo na Entelenete. Kadi kokwa koidi, divule dine ilēmanga kadi bafutyilanga’yo lupeto luvule. Kimfwa, mutadi umo wa kipindi wa mu Madagaskar waendele difuku dimo ku cyber café mwanda wa kukatentula mpangiko ya Televijo ya JW. Wafuta madolala 16, lupeto luvule kutabuka lusokolanga bantu bamo ku yenga! a

 Nansha byokudi ano makambakano, pano bene Afrika midiyo ne midiyo batalanga Televijo ya JW pampikwa kwingidija Entelenete. Namani?

 Tamba mu 2017, bantu bashikete mu Afrika wa Kunshi kwa dilungu dya Sahara batalanga Televijo ya JW kupityila ku shene ya televijo ya satelite. Ino shene itadijibwanga ku bitupu, mansá 24 pa difuku, mafuku 7 ku yenga, kadi mu ndimi 16.

 Pa kubwanya kino, Batumoni ba Yehova bashinyinye kontala na bantu ba ku mwingilo utala myanda ipita ku matelevijo mwanda wa kupityija televijo yetu pa satelite. Mu satelite ingidijibwa mudi kintu kya matanda 35 a Afrika wa Kunshi kwa dilungu dya Sahara. Tufutanga madolala 12 000 ne kupita kweji ne kweji. Kadi tufutanga kitatyi ne kitatyi lupeto lukwabo mwanda wa kutadija binkumenkume ku mashene makwabo. Kulonga namino kukwashanga bantu tununu na tununu balonde mpangiko ya bitango nansha mpangiko ya pa bula ya kupempulwa kwa misambo.

 Bantu bavule, enka ne boba ke Batumonipo, batalanga ku abo mobo shene ya JW ya satelite ku televijo. Inoko, banabetu bavule kebadipo na muswelo wa kupota bingidilwa bisakibwa pa kutala ino shene ya satelite. Pa kwibakwasha, twatūdile bingidilwa bya kutwela nabyo pa satelite ku Mobo a Bulopwe 3 670 ne kupita, mwanda wa batutu ne bakaka batadile’ko Televijo ya JW. Bino bingidilwa, ne kwibituma, bilombanga kintu kya madolala 70 shi ku Njibo ya Bulopwe kudi kala televijo nansha kingidilwa kya kutadija nakyo (projecteur). Shi kebidi’kopo, bingidilwa bibwanya kulomba madolala 530.

 Batutu ne bakaka bafwijanga’ko bininge pa ino shene. Mukulumpe umo wa mu Kamerune unena’mba: “Bidi pamo bwa māna aboya kyetu kisaka mu bukata bwa dilungu.” Odebode, tutu umo wa mu Nijeria unena’mba: “Tutalanga ino shene mu kisaka misunsa isatu ku yenga. Bami bana bakungilanga bino bitatyi. Baunenene ne kunena tutwele mu shene ya JW ne mu bitatyi bikwabo.” Rose, wa mu Nijeria unena’mba: “Pa kyaba kya kulonda kitatyi kyonso mapya ku mashene makwabo, nsangelanga kutala shene ya JW ya satelite. Kyaba kyonso kyonadi nonda mapya, nadi nkijepo kuloba pa byonadi mona, tansho yaunkanda. Inoko Televijo ya JW ayo ikankamika bininge kadi miyampe! I shene yonsenswe bininge. Bine, i dyese dikatampe ditwesele Yehova.”

 Mutadi umo wa kipindi wa mu Mozambike walembele amba mu kyandi kipindi, i batūle bingidilwa bya kutadila’ko shene ya satelite mu Mobo a Bulopwe. Batutu ne bakaka ba mu bipwilo bafikanga nsá umo nansha ne kupita kumeso kwa kushilula kupwila mwanda wa kutadila Televijo ya JW pa satelite.

 Ku kitango kya matanda kya mu 2019 kyalongelwe mu Johannesburg, mu Afrika wa Kunshi, baingidije ino shene mwanda wa kupityija mīsambo mikatampe mu bifuko bikwabo kitema, kubadila’mo ne yanenenwe na tutu wa mu Kitango Kyendeji. Sphumelele, wingilanga ku Bilo Itala Myanda ya Televijo ya JW ku musambo wa Afrika wa Kunshi, unena’mba: “Dibajinji, twadi tupityija mīsambo kupityila ku Entelenete. Ino kino kyadi kilomba Entelenete miyampe ne kufuta lupeto luvule. Shene ya JW ya satelite ayo yalombele lupeto lutadika’ko kadi i miyampe.”

 Mwafwai’ko pa byabuntu bya mwingilo wa ntanda yonso byomutūla na buntu, batutu ne bakaka bavule mu Afrika babwanya kutala Televijo ya JW kupityila ku satelite. Tufwijanga’ko bininge pa byabuntu byomutūla mu miswelo palapala mu donate.pr418.com..