Pano pashilula mwaka wa 2023, batwe bonso tusakanga witupityile biyampe pamo ne bisaka. Mwanda waka twikale na lukulupilo?

 Bible usapula myanda miyampe ya amba makambakano otulwa nao pano i a lupito kadi akapwa. Na bubine, Bible wālembelwe “mwanda wa kwitufundija, amba pa . . . kusengwa na Bisonekwa twikale na lukulupilo.”—Bene Loma 15:4.

•   Shi usaka kuyukila’ko bivule pa milao ya mu Bible, tanga kishinte “Lukulupilo lwa Bine lwa Būmi bwa Kumeso.”

 Lukulupilo lwa mu Bible ludi pamo bwa “ñanga wa būmi bwetu.” (Bahebelu 6:19, kunshi kwa dyani) Luno lukulupilo lubwanya kwitukwasha twimanije. Lubwanya kwitukwasha tulwe na makambakano a dyalelo, twikale na mumweno muyampe, ne kutana nsangaji ya endaenda. Kimfwa:

•   Tala lukulupilo lwa mu Bible molwakwashishe muntu umo wadi ulwa na kutamba mu bupika bwa mālwa. Tala video Nkyakidipo Nsangedile Būmi Bwami.

•   Tala muswelo lukulupilo lwa mu Bible olubwanya kwitukwasha kitatyi kyotufwilwa muntu otusenswe. Tala video Bukwashi ku Bafwidilwe.

 Bantu bavule bekalanga bakulupile kulongeke bintu biyampe, ino kadi balangalanga shi byobakulupile’bya bisa kufikidila. Milao ya mu Bible ayo i mishīle. Mwanda waka? Mwanda milao ya mu Bible ayo itambanga kudi Yehova Leza, a mwine “kabwanyapo kubepa.” (Tetusa 1:2) Enka Yehova kete ye udi na bukomo bwa kufikidija milao yandi yonso; ubwanya kulonga “kintu kyonso kyasaka kulonga.”—Ñimbo ya Mitōto 135:5, 6.

 Tukwita na nsangaji wimwene lukulupilo lwa bine lwa mu Bible. Kikulupiji kyobe mu luno lukulupilo kikatama shi ‘ubandaula senene Bisonekwa.’ (Bilongwa 17:11) Wilukimbe abe mwine na kutompa kwifunda Bible na muntu mukwabo, kadi ku bitupu. Tukusakila ushilule mwaka wa 2023 na milangwe ya lukulupilo!