KESHAI’NKA KUKESHA!

Mwaka wa 2022: I wa Kavutakanya—Le Bible Unena’po Namani?

VUMIJA MU

Mu mwaka wa 2022, ku bisanji besambanga’ko enka bya mavita, makambakano a kubulwa kwa lupeto, ne koneka kwa bintu bya kipangila. Bible kete ye ulombola buluji bwine bulongekela bino bimyanda.

Buluji bwinebwine bwa bimyanda bya mu 2022

Bimyanda bya mu mwaka upityile’u bituntwila ku bubinga bwa amba tudi mu kitatyi kitela Bible bu “mafuku a mfulo.” (2 Temote 3:1) Kino kitatyi kyashilwile mu mwaka wa 1914. Tala bino bimyanda bilongeka mobikwatañenine na byālaile Bible pa ano mafuku otudi’mo:

“Mavita.”—Mateo 24:6.

“2022 I Mwaka Wajoka Mavita Alenga Moyo mu Bulaya.” a

Tala kishinte “Rusi Watambe Ikrene Bulwi.”

“Bimpengele bya nzala.”—Mateo 24:7.

“2022: I Mwaka wa Nzala Keyamwekele Kashā.” b

Tala kishinte “Divita dya mu Ikrene Kedileta Kipupo kya Nzala Ntanda Yonso.”

“Bipupo bya misongo.”—Luka 21:11.

“Misongo ya bulebe pa kujoka, mbalanga itamba ku bampuya nayo yashilula, COVID-19 nayo papo kashā yendelela. Bino i bilombole patōka mubaile kwambuka kwa misongo, ne muswelo oisusula muzo wa muntu.” c

Tala kishinte “Bantu Midiyo 6 I Bafwe ku Kipupo kya Covid.”

“Binkumbulu bilenga moyo.”—Luka 21:11.

“Kyanga kikomokomo, mulanga, mudilo usōka ntanda, ne malobe. Bushipo bwa mu 2022 bukavulukwa pa mwanda utala koneka wa bintu bya kipangila konakenye bintu, kwipaile bantu tununu tutwa na tutwa ne kuvilulavilula bantu bavule ntanda yonso.” d

Tala kishinte “Kwikala’ko kwa Kyanga Kikomo Ntanda Yonso.”

“Tuvutakanya [nansha’mba, “tuvulubi; butomboki,” kunshi kwa dyani].”—Luka 21:9.

“Bulobo pa mwanda wa kubulwa lupeto, ne kukanda kwa bei ya bintu i bwake bininge kadi bulengeje bantu batombokele maludiki mu ludingo lwa pangala bininge mu mwaka wa 2022.” e

Tala kishinte “Bintu Bibakanda Bei Ntanda Yonso.”

Le mu mwaka wiya’ko namo mukalongeka bika?

Nabubine, i kutupu muntu uyukile bisa kulongeka mu 2023. Ino kyotuyukile i amba panopano ponka, Bulopwe bwa Leza, nansha’mba buludiki bwa mūlu, busa kupwija myanda ya ino ntanda. (Danyele 2:44) Buno buludiki busa kutalula’ko kine kileta masusu mu bantu, kadi busakulengeja kiswa-mutyima kya Leza kilongeke pano pa ntanda.—Mateo 6:9, 10.

Twimulomba mulonde madingi a Yesu Kidishitu, kadi “keshai’nka kukesha,” mumone muswelo bimyanda bya ntanda obifikidija bupolofeto bwa mu Bible. (Mako 13:37) Tukulomba witulembele shi usaka kuyukila‘ko bikwabo pa muswelo ubwanya kwimukwasha Bible pano ne pa mwabwaninya kwimupa lukulupilo lwa būmi buyampe bwa kumeso, abe ne ba mu kyobe kisaka.

a AP News, “2022 I Mwaka Wajoka Mavita Alenga Moyo mu Bulaya,” binenwa bya Jill Lawless, Mafuku 8 Kweji 12, 2022.

b Programme Alimentaire Mondial, “Byakudya Bibasakana Ntanda Yonso.”

c JAMA Health Forum, “Kwikala mu Kitatyi kya Bipupo bya Misongo—Kushilwila ku COVID-19 kutūla ku Mbalanga itamba ku Bampuya, Bulebe, ne Mbá X,” na Lawrence Gostin, mafuku 22 Kweji 9, 2022.

d Earth.Org, “I Bika Bilengeje Kwikale Kyanga Kikomokomo mu Bushipo bwa 2022?” binenwa bya Martina Igini, mafuku 24 Kweji 10, 2022.

e Carnegie Endowment for International Peace, “Bulobo pa Mwanda wa Makambakano a Kubulwa Lupeto Bubaleta Butomboki Ntanda Yonso mu 2022,” binenwa bya Thomas Carothers ne Benjamin Feldman, mafuku 8 Kweji 12, 2022.