Ntanda yonso, malobe a kyonakanya abasusula bantu bavule byamwiko. Tala ano malapolo:

•   “Mafuku matyetye kunyuma, mwipata mwa ntanda ya Shine mwanokele mvula mungi bininge wadi kamwekele kashā ke padi kintu kya myaka 140. Tamba Dya Mposo kufika Dya Busatu, ma milimetele 744,8 a mema alobeje ntanda.”—AP News, mafuku 2 Kweji 8, 2023.

•   “Difuku dilonda’po, Dya Buná, kimpumpu kītwa bu Khanun kyaiya na mvula mukomokomo ne kivula kikomo kunshi kwa ntanda ya Japon, kyaipaya kintu kya bantu babidi. . . . Uno mvula wamwangile kintu kya mamilimetele 600 a mema mu ntanda ya ngulu ya Taiwan.”—Deutsche Welle, mafuku 3 Kweji 8, 2023.

•   “Dilobe dya mu Dya Mposo ne Dya Yenga [mu Nouvelle-Écosse] nadyo dyaletelwe na mvula mukomokomo wadi kamwekele kashā ku mbadi ya Atlantike mu Kanada mu bula bwa myaka 50 ipityile’i.”—BBC News, mafuku 24 Kweji 7, 2023.

 Le Bible unena bika pa bino bimpengele?

 Bible ulombola’mba tudi mu kitatyi kitelwa bu “mafuku a mfulo.” (2 Temote 3:1) Yesu wānenene bupolofeto amba mu ano etu mafuku, tukamona “binkumbulu bilenga moyo,” nansha’mba bimyanda bizakaja. (Luka 21:11) Kushinta kwa bitatyi nako kulengejanga bino binkumenkume bilenga moyo, bikomo kumona kumeso kwa kitatyi, kadi bya kyaba ne kyaba.

 Bible witusapwila’mba binkumenkume bilenga moyo bivule bilongeka ano mafuku pa ntanda bitupanga bubinga bwa kwikadila na lukulupilo. Mwanda waka? Yesu wālaile’mba: “Shi mubamone bino bintu bilongeka, yukai amba Bulopwe bwa Leza kebudi pabwipi.”—Luka 21:31; Mateo 24:3.

 Binkumenkume byotumona bilongeka bilombola’mba panopano ponka, Bulopwe bwa Leza bukatādila lonso bintu bya kipangila mubadilwa ne mvula ne mema.—Yoba 36:27, 28; Ñimbo ya Mitōto 107:29.

 Pa kuyukila’ko bivule pa muswelo ukalongolola Bulopwe bwa Leza ngikadilo ya ntanda, tala kishinte“Le I Ani Ukakūla Ntanda?”