Mu bula bwa Kweji 7, 2022, i base bantu bisansa mutyima ntanda yonso:

•   “Pobaashile Shinzo Abe, muntu wa politike mutumbe wa mu Jampani [waingile ne bu mpingakani umbajinji] byasense bantu bininge, kadi ntanda yonso bantu kebaitabijepo lufu lwandi, mwanda mu ino ntanda kemuvudilepo bya bupolapola kadi mudi bijila bitūla’ko mikalo ya mwa kwingidijija mata.”—10 Kweji 7, 2022, The Japan Times.

•   “Bantu bashele na kyaso kikatampe mu Danemarke, pobaashile bantu basatu mu nsoko ya Copenhagen kudi mukelenge umo.”—4 Kweji 7, 2022, Reuters.

•   “Afrika wa Kunshi: Mu Soweto, kibundi mwadi mushikata’nka bantu bafīta, bantu bamo badi mu njibo ya kitomeno iyukene ne bu bala basobwele’mo mata, kwafwa bantu 15”—10 Kweji 7, 2022, The Guardian.

•   • “Mu États-Unis kwaashilwe bantu 220 ne kupita mu mafuku 4 Kweji 7, nansha byodyadi difuku kedyedangapo bantu ku kaji, kadi dyaponene ku mfulo kwa yenga.”—5 Kweji 7, 2022, CBS News

 Le tubwanya kukulupila’mba bya lūma’bi bisa kupwa? Bible unena’po namani?

 Bible utela ano mafuku otudi’mo bu “mafuku a mfulo,” kitatyi kilonga bantu bintu na bukalabale, na kansontomokela, kadi i bañonaona. (2 Temote 3:1, 3) Bilongwa bya uno muswelo bikwatyijanga bantu moyo. (Luka 21:11) Inoko, Bible i mulaye kitatyi kisa kupwa bya lūma, bantu “bakekala mu kifuko kya ndoe kya nyeke, mu bīkalo bya mutyima-ntenke ne mu bifuko bya kukōkolokwa bya ku matwi talala.” (Isaya 32:18) Le bya lūma bisa kupwa namani?

 Leza usa kutalula’ko bankuma-bibi ne konakanya bya bulwi byonso.

•   “Ino babi, abo bakatyibwanga’ko pa ntanda.”—Nkindi 2:22.

•   “Wafudija mavita konsokonso pano pa ntanda. Utyumunanga buta bwa miketo ne kuvingakanya mukobe; usōkanga makalo a basola mu mudilo.”—Ñimbo ya Mitōto 46:9.

 Pa kutalula’ko bya lūma, Leza usa kufundija bantu mwa kwikadila mu ndoe.

•   “Kebakasanshijapo nansha dimo nansha konakanya mu lūlu lwami lonso lujila, mwanda ntanda ikayula buyuki bwa Yehova bya binebine pamo bwa mema apūta dijiba.”—Isaya 11:9.

•   Enka ne dyalelo, Leza ufundijanga bantu ntanda yonso bejibe ku bya lūma ne ku kwingidija bya bulwi, bafule “bipete byabo ke nkasu ne mikobe yabo ke bipete bya kukukula nabyo.”—Mika 4:3.

 Shi usaka kuyukila’ko bivule pa mulao wa mu Bible utala ntanda mwampikwa moyo, tanga kishinte “Affranchis de la peur : est-ce possible ?”

 Shi usaka kuyuka mukatalwilwa’ko lonso bya lūma, tanga kishinte “Enfin la paix sur la terre !”