KESHAI’NKA KUKESHA!

Divita dya mu Ikrene Kedileta Kipupo kya Nzala Ntanda Yonso

VUMIJA MU

Mu mafuku 19 Kweji 5, 2022, ba lupusa bakatampe 75 basapwidile Kitango kya Madingi kya Mizo Kitala Mutyima-Ntenke amba “byakudya byadi bisakene kala ntanda yonso pa mwanda wa kipupo kya Corona ne kushinta kwa mwikadilo wa kūlu, pano bibasakena’ko bininge ntanda yonso pa mwanda wa divita dya mu Ikrene. Kudi kyaka kya kwikale kipupo kya nzala mu bifuko bimo.” Kitatyi kityetye pa kupita’po, julunale imo (The Economist) yanenene amba “pa mwanda wa divita, ino ntanda idi kala na makambakano mavule isa kwikadila’ko na bamufwa-zala.” Bible wālaile amba bino bimpengele bya nzala bikekala’ko mu kino kyetu kitatyi, ino kadi witupa ne bukwashi bwa mwa kulwila nabyo.

Bible wālaile bipupo bya nzala

Yesu wālaile bupolofeto bwa amba: “Muzo ukatamba muzo mukwabo ne bulopwe nabo bulopwe bukwabo, kadi kukekala bimpengele bya nzala.”—Mateo 24:7.
Mukanda wa Kusokwelwa ulombola bantu baná ba kyelekejo batentamine pa tubalwe. Umo pobadi welekeja divita. Kupwa ulondwa na mukwabo welekeja kipupo kya nzala, kitatyi kikakoma bininge kusokola byakudya ne kyobikakanda bei. “Ami amba ntale, namona kabalwe kafīta fututu. Yewa wādi utentamine’po wādi ukwete kipimo mu dikasa dyandi. Naivwana ne diwi . . . dinena’mba: ‘Kilo umo wa ñano ku lufuto lwa pa difuku dimo, makilo asatu a ōloje ku lufuto lwa pa difuku dimo!’”—Kusokwelwa 6:5, 6, Dibuku Dijila.

Buno bupolofeto butala pa bimpengele bya nzala, bufikidilanga pano mu kitatyi kitelwa na Bible bu “mafuku a mfulo.” (2 Temote 3:1) Pa kuyukila’ko bivule pa “mafuku a mfulo” ne pa bantu baná batentamine pa tubalwe ba mu Kusokwelwa, tala video inena’mba Tamba mu 1914, Ntanda I Mishinte ne kutanga kishinte “Ba pa Tubalwe Baná—Le I Bāni?”

Muswelo ubwanya kukwasha Bible

Mu Bible mudi madingi a kamweno abwanya kwitukwasha tulwe na makambakano, kubadila’mo ne kukanda kwa lupoto lwa byakudya enka ne bimpengele bya nzala. Kimfwa, tala kishinte kinena’mba “Mwa Kwiendejeja na Lupeto Lutyetye mu Būmi.”
Kadi Bible witupa lukulupilo lwa amba bintu bisa kushinta. I mulaye amba mu mafuku āya’ko “kukekalanga miseke mivule pa ntanda,” kadi muntu yense ukekala na byakudya bivule. (Ñimbo ya Mitōto 72:16) Pa kuyukila’ko bivule pa lukulupilo lwitupa Bible lwa būmi bwa kumeso ne kine kyotubwanya kukulupidila’mba i lwa bine, tanga kishinte “Lukulupilo lwa Bine lwa Būmi Bulumbuluke bwa ku Meso.”