Divita dya mu Ikrene ne mwikadila mubi wa kūlu byendanga bityepeja bininge byakudya ntanda yonso. Bino byo bifikīle nakampata matanda malanda, mwine mobikomene bininge kusokola byakudya.

•   “Kubulwa kumvwañana, kushinta kwa mwikadila wa kūlu, kukanda kwa bei ya mudilo wa nshinga ne bikwabokwabo byo bilengeje bikale bikomo kulupula bidibwa bivule nansha kwikala nabyo.”—António Guterres, mulembi wa Bumo bwa Mizo, 17 Kweji 7, 2023.

•   “Bashayuka banenene amba kupela kupelele Rusi kupoteja bidibwa mu matanda makwabo kusa kulengeja ngikadilo ya kusakana kwa bidibwa ibipile’ko bininge ntanda yonso, ne kadi bidibwa bisa kukanda bei bininge mu matanda malanda, nakampata mu Afrika wa Kungala ne pa Bukata bwa Kutunduka.”—Atalayar.com, 23 Kweji 7, 2023.

 Wifunde binena Bible pa bitala kusakana kwa bidibwa ne mafuku a kumeso.

•   Yesu wānenene amba: “Muzo ukatamba muzo mukwabo ne bulopwe nabo bulopwe bukwabo, kadi kukekala bimpengele bya nzala.”—Mateo 24:7.

•   Mukanda wa mu Bible wa Kusokwelwa wisambila pa batentamine pa tubalwe baná ba kyelekejo. Umo wa mu bano batentamine pa tubalwe welekeja divita. Palonda mukwabo welekeja bimpengele bya nzala, ko kunena’mba kitatyi kya kutyepa kwa bidibwa ne kadi bipotwa na bei mikande. Tutanga’mo amba, “Namwene, na’mba ntale! kabalwe kafīta fututu, kadi yewa wadi utentamine’po wadi na kipimo kya bulēmi mu dikasa dyandi. Penepo naivwana pamo bwa diwi . . . amba: ‘Litele umo wa ñano ku ndenadi imo, malitele asatu a mebele a buluba nao ku ndenadi imo.’”—Kusokwelwa 6:5, 6.

 Buno bupolofeto bwa mu Bible butala kusakana kwa byakudya bula kufikidila mu ano etu mafuku, kitatyi kine kitela Bible bu “mafuku a mfulo.” (2 Temote 3:1) Shi usaka kuyukila’ko bivule bitala “mafuku a mfulo” ne bitala batentamine pa tubalwe baná ba mu Kusokwelwa, tala video inena’mba Tamba mu 1914 Ntanda I Mishinte kadi tanga kishinte kinena’mba “Ba pa Tubalwe Baná—Le I Bani?”

•   Mu Bible mudi madingi a kamweno mu būmi abwanya kwitukwasha tulwe na makambakano meshileshile, mwine mubadilwa ne kukanda kwa bei ya bidibwa nansha ke bimpengele bya nzala bine. Tala bimfwa bimobimo mu kishinte kinena’mba “Mwa Kwiendejeja na Lupeto Lutyetye mu Būmi.”

•   Kadi Bible witupa lukulupilo lwa amba bintu bisa kulumbuluka. I mulaye kitatyi kikekala’ko “miseke mivule pa ntanda,” kadi muntu ense ukekala na byakudya bivule. (Ñimbo ya Mitōto 72:16) Shi usaka kuyukila’ko bivule bitala luno lukulupilo lwa mafuku a kumeso ne kine kyobwanya kwilukulupidila, tanga kishinte kinena’mba “Lukulupilo lwa Bine lwa Būmi Bulumbuluke bwa Kumeso.”