Kitango kya Bumo bwa Mizo Kīsambila pa Kukaba kwa Ntanda kītwa bu COP27, kyapwile mu Dya Yenga, 20 Kweji 11, 2022. Nansha mizo byoyaumvwañene kuleta lupeto lwa kukwasha matanda asusulwa bininge na uno mwanda, inoko bavule bene i bamone amba kuleta luno lupeto kekusapo kupwija mwanda mwine.

•   António Guterres, Mulembi wa Bumo bwa Mizo, wanenene’mba: “Nasangela buno butyibi bwa kulea’ko lupeto lwa kukwasha nalo matanda asusulwa bininge na kukaba kwa ntanda. Inoko i kimweke patoka’mba kekupwilepo . . . Umbuo wetu ukidi pa katele-bulenda.”

•   “Ntanda yetu ikidi’nka mu kyaka kya kuponenwa na kino kizumba kya kukaba kwa ntanda.” —Mo mwanenene Mary Robinson, prezida wa kala wa ntanda ya Irlande mu mafuku 20 Kweji 11, 2022, kadi waingile ne bu Ntunguluji Mukatampe wa Bumo bwa Mizo Butala Byepelo bya Bantu.

 Bankasampe bo bene baselele mityima kūlu pa musa kwikadila umbuo wetu wa ntanda kumeso’ku. Ino le mizo ikabwanya kwingidila pamo ne kufikidija byoilaile pa mwanda utala kukaba kwa ntanda? Le Bible unena’po namani?

 Bible ulombola’mba nansha shi bantu abalonga bukomo namani, kebakafikila’popo. Tala buno bubinga bubidi:

•   “Kyokya kikondame kekibwanyapo kōlolwa.”—Musapudi 1:15.

   Ko kunena’mba: Maludiki adi na mikalo mwanda bantu kebāpangilwepo na bukomo bwa kwiludika abo bene. (Yelemia 10:23) Nansha shi mizo ibebungila pamo kadi nansha shi ibalonga bukomo bwayo namani, keikabwanyapo kupwija uno mwanda wa kukaba kwa ntanda.

•   “Mwanda bantu bakekala ba kwisanswa abo bene, ba kusanswa lupeto, . . . bapela kumvwañana ko-konso.”—2 Temote 3:2, 3.

   Ko kunena’mba: Bible wālaile amba bantu ba mu ano etu mafuku bakekala ba kwisakila ne ba kubulwa mutyima wa kwingidila pamo mwanda wa kamweno ka bakwabo.

 Kulongoloka kwa umbuo wetu kekwimaninepo pa byobya bilaya maludiki a bantu. Leza i mutonge kala Mulopwe mukomo, ke Yesu Kidishitu kadi. Bible unena padi uno mulopwe amba:

•   “Bubikavu bukekala pa kipuji kyandi. Ukenikwa bu Mudingidi Utendelwa, Leza Mukomokomo, Tata wa Nyeke, Mfumu wa Ndoe.”—Isaya 9:6, kunshi kwa dyani.

 Yesu ye Mulopwe wa Bulopwe bwa Leza, nansha’mba umbikalo wa mūlu. (Mateo 6:10) Udi na bukomo, tunangu, ne mutyima wa kukwasha umbuo wetu ne bene padi’po. (Ñimbo ya Mitōto 72:12, 16) Uno umbikalo wa mūlu pousa kushilula kwendeja, usa kufundula’ko boba bonso “bonakanya ntanda” ne kulongolola umbuo wetu.—Kusokwelwa 11:18; Isaya 35:1, 7.

 Shi usaka kuyukila’ko bivule pa musa kupwila ano makambakano a kukaba kwa ntanda, tala kishinte kinena’mba “Les changements climatiques et notre avenir : qu’en dit la Bible?”