Bantu bavule pano pa ntanda betela’mba balondanga Yesu Kidishitu i bekuje mu politike’nka ne myulu i kutokenya. Bamo batumbijanga bibidiji ne bwine-leza bwabo na kukwatakanya kandida kampanda nansha kisumpi kabidye kya politike. Ye bantu ba politike nabo bengidija ngikadilo ya bantu mwanda wa kunekenya ba mu bipwilo bebalonde. Tumonanga divule bendeji ba bipwilo balwila bitenta mu politike. Kadi mu matanda amo, “bwine Kidishitu” bubasela ne kitenta kya pa bula kya bu kipwilo kya Leta, nansha kya muzo.

 Le ulanga’po namani? Balondi ba Yesu Kidishitu bafwaninwe kwikuja mu politike? Tala’tu mwādi mwikadile Yesu umone bya kulondolola. Wānenene amba: “Nemushila kimfwa, amba monka monemulongela, nenu longelai monka.” (Yoano 13:15) Le Yesu wāshile kimfwa’ka mu myanda ya politike?

 Aa. Yesu kēkujijepo mu myanda ya politike.

 Yesu kākimbilepo kitenta kya mu politike. Wāpelele kwikala na lupusa lwa kwendeja imbikalo ya bantu pāmulombwele Satana Dyabola “malopwe onso a ntanda.” (Mateo 4:8-10) a Kitatyi kimo, bantu pa kumona’mba Yesu ubwanya kwikala mwendeji muyampe, bālonga bukomo bwa kumutonwena mu myanda ya politike. Bible unena’mba: “Yesu, pa kuyuka’mba kebasa kwiya kumukwata mwanda wa kumubikika bu mulopwe, wetolwela monka ku lūlu kwa bunka bwandi.” (Yoano 6:15) Yesu kāitabijepo kulonga bisaka bantu. Ino, wāpelele kwikuja mu politike.

 Yesu kākwatakenyepo mutamba kampanda wa politike. Kimfwa, mu mafuku ādi Yesu pano pa ntanda, Bayuda kebādipo basenswe kusonka musonko ku umbikalo wa bene Loma, bādi bamona’byo bu kasusu kampikwa kwendela’mo. Pobātompele kutweja Yesu mu myanda yabo, Yesu wāpelele kwikuja mu lupotopoto lwabo lwa bya politike lwa kusaka kuyuka shi i byendele’mo’ni nansha kebyendele’mopo. Wēbasapwidile amba: “Futai bintu bya Kesala kudi Kesala, ino bintu bya Leza nabyo kudi Leza.” (Mako 12:13-17) Wēshadile lwandi pampikwa kwikuja mu politike, ino wālombola’mba bafwaninwe kufuta misonko yādi ilombwa na ba lupusa ba bantu bene Loma, bene bādi bu bantunguluji ba Kesala. Kadi enka mu binenwa byandi, wālombola’mba kukōkela ba lupusa ba ino ntanda kudi na mikalo. Muntu kādipo ufwaninwe kupa Leta bintu bifwaninwe kupebwa Leza, kubadila’mo ne kwipāna ne butōtyi.—Mateo 4:10; 22:37, 38.

 Yesu wādi utumbija umbikalo wa mūlu, ke Bulopwe bwa Leza kadi. (Luka 4:43) Wāpelele kwikuja mu politike mwanda wādi uyukile amba i Bulopwe bwa Leza kete bo bukafikidija byobya bisaka Leza pano pa ntanda, ke imbikalopo ya bantu, aa. (Mateo 6:10) Wādi uyukile amba Bulopwe bwa Leza kebukengilapo mu malopwe a bantu aa, ino bukeapingakena.—Danyele 2:44.

 Aa. Balondi ba Yesu bākōkele musoñanya wandi wa’mba: ‘Kemudipo ba ino ntanda.’ (Yoano 15:19) Bālondele kimfwa kyandi ne kushala besansanye na myanda ya politike ya ino ntanda. (Yoano 17:16; 18:36) Pa kyaba kya kwikuja mu myanda ya politike, abo bāingile mwingilo waēbasoñenye—mwingilo wa kusapula ne kufundija myanda ya Bulopwe bwa Leza.—Mateo 28:18-20; Bilongwa 10:42.

 Bene Kidishitu ba mu myaka katwa kabajinji bātūdile kikōkeji kudi Leza kumeso ebiya būmi bwabo ke bulonda, koku kasha bayukile amba bafwaninwe kukōkela ba lupusa badi pano pa ntanda. (Bilongwa 5:29; 1 Petelo 2:13, 17) Bādi bakōkela bijila ne kufuta musonko. (Bene Loma 13:1, 7) Bādi benda ku bisambo bya kwibakinga ne kumwena mu mingilo yadi itūdilwe’ko na Leta, koku kasha belamine kwampikwa kwikuja mu myanda ya politike.—Bilongwa 25:10, 11; Bene Fidipai 1:7.

 Bible ulombola patōkelela’mba Yesu ne balondi bandi kebēkujijepo mu politike. O mwanda mwine, Batumoni ba Yehova ntanda yonso, byobadi bene Kidishitu, kebekujangapo nansha dimo mu politike. Bengilanga pamo’nka bwa bene Kidishitu ba mu myaka katwa kabajinji, mwingilo wāsoñenye Yesu—mwingilo wa kusapula “ino myanda miyampe ya Bulopwe.”—Mateo 24:14.