“Bantu baloñanga bintu bivule bine bisa kuleta bimpengele panopano. Bibundi bivule bisa kulobela. Kusa kwikala kyanga kipitepite ke kyaikele’ko kashā, bivula bilenga moyo, ne kusakana kwa mema. Mudiyo umo wa misaka ya banyema ne mityi usa kukuba . Ke mifwatakanyopo nansha kupityija’byo kipimo. Mo mwitulombwela befundi ba sianse amba, byo bikalupuka’ko shi maludiki keashintyilepo muswelo oengidija bukomo bwao.”—Binenwa bya António Guterres, mulembi mukata wa Bumo bwa Mizo, bya mu lapolo ya Intergovernmental Panel on Climate Change mu mafuku 4 Kweji 4, 2022.

 “Befundi ba sianse badyumuna’mba mu myaka iya’ko, maparke 423 a mu États-Unis, asa konwa na kushinta kwa bitatyi mwanda ano maparke atwilwanga na kyanga. Bintu bibi bisa kulongeka bidi pamo bwa bimpengele byotutañanga mu Bible: mudilo, dilobe, mashika mekwate, kuyula kwa kalunga ka mema ne kyanga kipitepite.”— “Flooding Chaos in Yellowstone, a Sign of Crises to Come,” bya mu The New York Times mu mafuku 15 Kweji 6, 2022.

 Le ino ntanda yonekele nenki ikalongoloka? Shi i amo, le i ani ukalongolola’yo? Tala binena’po Bible.

 Bible unena’mba, Leza ukonakanya “boba bonakanya ntanda.” (Kusokwelwa 11:18) Uno vese wa mu Bible witufundija bintu bisatu:

1.  1. Bintu bilonga bantu bikonanga ntanda mu muswelo kampanda.

2.  2. Bantu kebakendelelapo kona ntanda.

3.  3. Leza ye ukalongolola ntanda, ke bantupo.

 Bible unena’mba, ‘ntanda idi’ko nyeke.’ (Musapudi 1:4) Ikekalwa nyeke.

•   “Boloke bakapyananga ntanda, kadi bakekalanga’po nyeke.”—Ñimbo ya Mitōto 37:29.

 Ntanda ikalongololwa ne pa mfulo.

•   “Mu ntanda mutuputupu ne ntanda myūmu tē bikasepelela, kadi dilungu mudi zolē dikasangala ne kutōya maluba pamo bwa safelona.”—Isaya 35:1.