Mu mafuku 24 Kweji 5, 2022, kwalongekele mwanda wa bulanda mu Uvalde, kibundi kityetye kya mu Texas, mu États-Unis. Dipepala The New York Times dinena’mba, “Muntu uvwele byabulwi waipaile bana ba masomo 19 ne badimu babidi . . . ku masomo a pilimele etwa bu Robb.”

 Kya bulanda, myanda ya uno muswelo ivudile kulongeka. Lapolo ya USA Today ilombola’mba enka mu ntanda ya États-Unis kete, “mwaelelwe mata 249 mu masomo palapala mu mwaka wapityile’u​—kino kibalwa i kitabuke bibalwa bya myaka kunyuma tamba mu 1970.”

 Mwanda waka bintu bibi bya uno muswelo bilongeka? I muswelo’ka otubwanya kulwa na bilongwa bibi bya uno muswelo? Le kudi bubinga bwa kukulupidila amba bya lūma bikapwa? Bible uleta malondololo ku bino bipangujo.

•    Bible utela ano mafuku etu bu “mafuku a mfulo,” mwine muyudile bantu “bampikwa kisanso kya bumuntu” kadi “ba bukalabale bwa malwa.” Bino binenwa bilombola’mba bantu bakalonga bintu na bukalabale ne kusanswa bya lūma mu mafuku a mfulo. Bano bantu “bakabipila’ko kutabuka.” (2 Temote 3:1-5, 13) Yukila’ko bivule na kutanga kishinte kinena’mba, “La Bible a-t- elle prédit la mentalité et la conduite des gens de notre époque?”

 Bantu bavule beipangulanga’mba, ‘Mwanda waka Leza kakankajangapo bintu bibi pamo bwa kwela mata mu masomo bileke kulongeka?’ Yuka malondololo aleta Bible na kutanga kishinte kinena’mba, “Bintu Bibi Bifikilanga Bantu Bayampe—Mwanda Waka?”

•    “Byonso byālembelwe pa kala byālembelwe mwanda wa kwitufundija, amba . . . pa kusengwa na Bisonekwa twikale na lukulupilo.”​—Bene Loma 15:4.

 Misoñanya idi mu Bible ibwanya kwitukwasha tulwe na ngikadilo ya bukalabale iyudile mu ino ntanda. Pa kuyukila’ko bivule tala dipepala Langukai! dinena’mba “La violence cessera-t-elle un jour?”

 Pa kuyuka mubwaninya bambutwile kukwasha babo bana balwe na malapolo alenga moyo, tanga kishinte kinena’mba, “Enfants et actualités troublantes.”

•    “Ukebakūlanga ku malwa ne ku lūma.”​—Ñimbo ya Mitōto 72:14.

•    “Bakafula bipete byabo ke nkasu ne mikobe yabo ke bipete bya kukukula nabyo. Muzo keukatululapo kipete pa muzo mukwabo, kadi kebakefundepo monka divita.”​—Mika 4:3.

 Leza ukalonga bintu kebibwanyapo kulonga bantu. Bulopwe bwa Leza, ko kunena’mba umbikalo wandi wa momwa mūlu, bukonakanya byabulwi byonso ne kufudija bya lūma bya miswelo yonso. Yukila’ko bivule pa bikalonga Bulopwe bwa Leza, na kutanga kishinte kinena’mba, “Mu Bulopwe bwa Leza ‘Ndoe Ikavula.’”