Kitango kya Bumo bwa Mizo kyanenene amba:

•   Kushilwila mu mafuku 7 Kweji 10 kutūla ku mafuku 23 Kweji 10, 2023, kwīlwa kwa Isalela na Gaza kubaipaya bantu 6 400 ne musubu ne kulopola bantu 15 200, kadi bavule mobadi i basivile. Ne kadi bantu tununu tutwa na tutwa i banyeme.

•   Kufika mu mafuku 24 Kweji 9, 2023, divita dya Rusi na Ikrene dyaipaile basivile 9 701 ne kulopola bantu 17 748 mu Ikrene.

 Le Bible upāna lukulupilo’ka ku boba basusuka pa mwanda wa mavita?

 Bible i mulaye amba Leza usa kufudija “mavita konsokonso pano pa ntanda.” (Ñimbo ya Mitōto 46:9) Usa kwingidija buludiki bwa momwa mūlu, nansha’mba bulopwe, mwanda wa kupingakena maludiki onso a bantu. (Danyele 2:44) Bulopwe bwa Leza busa kuleta busengi ku muzo wa muntu.

 Tala bisa kulonga Yesu Kidishitu, Mulopwe wa Bulopwe bwa Leza:

•   “Ukakūlanga mulanda wabija bukwashi, ne mupēlulwe ne yewa ense wampikwa mukwashi. Ukevwaninanga lusa mupēlulwe ne mulanda, kadi būmi bwa balanda ukebupandijanga. Ukebakūlanga ku malwa ne ku lūma.”—Ñimbo ya Mitōto 72:12-14.

 Leza usa kwingidija Bulopwe bwandi mwanda wa kutalula’ko makambakano onso alupukile ku mavita ne ku kwīlwa.

•   “Ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”—Kusokwelwa 21:4.

 Panopano ponka, Bulopwe bwa Leza busa kuleta kushinta kukatampe pano pa ntanda. Bible wālaile “mavita ne myanda ya mavita” byotumona dyalelo. (Mateo 24:6) Ino myanda ne mikwabo ilombola’mba tudi mu “mafuku a mfulo” a buludiki bwa bantu.—2 Temote 3:1.