Dyalelo ntanda yonso, kudi bantu ba bitwi kintu kya midiyo 70, kadi bavule besambanga na kwingidija ndimi ya batumama 200 ne musubu. Kya bulanda, monka mulombwela’kyo bimfwa bilonga’ko, bantu ba bitwi balongelwanga divule bintu pampikwa kanye:

•   “Ntanda yonso, byepelo bya bantu ba bitwi ne ba kapu-kutwi kebilēmekwangapo divule.”—Bulongolodi bwa Matanda bwa ba Bitwi (États-Unis).

•   “Bantu ba bitwi badi mu matanda akyanza kushidimuka, babadilwa mu bantu balanda bininge pano pa ntanda, kadi i bikomo kobadi kufunda masomo mayampe, kusokola kaji, ne kuyuka myanda.”—Bulongolodi bwa Ntanda Yonso bwa ba Bitwi.

 Le Yehova umonanga namani bantu ba bitwi? Lelo Bible unena bika pa ba bitwi? Ne Batumoni ba Yehova bebakwashanga namani dyalelo?

Mumwenanga Yehova ba Bitwi

 Bible ulombola’mba Yehova a Leza ukwatakanyanga ba bitwi. Usakanga balongelwe bintu na kanye ne kumwena mu bufundiji bwandi.

 Kisonekwa: “Kufwaninwepo kufinga wa kitwi.”—Bene Levi 19:14.

 Kisonekwa: “Leza kadipo na mboloji.”—Bilongwa 10:34.

 Kisonekwa: “Yesu . . . washilula kupita . . . , ne kusapula myanda miyampe ya Bulopwe.”—Mateo 9:35.

 Kisonekwa: Yesu wājikwile enka ne “ba matwi majike kebevwana ne batumama nabo kebanena.”—Mako 7:37.

 Kisonekwa: “Matwi a ba bitwi nao akajikulwa.”—Isaya 35:5.

 Mobishintulwila: Yehova i mulaye amba ba bitwi bakevwana.—Isaya 29:18.

Batumoni ba Yehova Mobakwashishanga ba Bitwi Dyalelo

 Batumoni ba Yehova basapwilanga ba bitwi musapu wa Leza wa lukulupilo ntanda yonso. Le i bika byotuloñanga mwanda wa kwibasapwila? Tulupulanga Mabible ne mavideo a kwifunda nao Bible mu ndimi ya batumama 100 ne musubu. Kadi tufundijanga bantu Bible ne kuteakanya’ko kupwila kwa bwine Kidishitu mu ludimi lwa batumama. Tuloñanga bino byonso ku bitupu ku muntu yense usaka Leza amukwashe. Mwanda waka? Mwanda Yesu wētusoñenye amba: “Mubatambula ku bitupu, nenu pānai ku bitupu.”—Mateo 10:8.

 Ubwanya kumona bino bingidilwa pa Entelenete nansha na kutentula’byo mu kingidilwa kyobe kya busendwe na kulonga bino bilonda’ko:

 JW.ORG. Finya pa kayukeno ka ludimi kadi kūlu kwa paje yense wa site mwanda wa kutana mavideo nansha Bible mu ludimi kampanda lwa batumama.

 Aplikasion ya JW Library Sign Language. Tūla ino aplikasion ku bitupu mu kingidilwa kyobe kya busendwe, nabya ukabwanya kutentula mavideo a mu ludimi lwa batumama nansha kwiatadila pa Entelenete.

Le I Bingidilwa’ka Byotwingidijanga Mwanda wa Kufundija Nabyo Bible?

 Bible mu ludimi lwa batumama. Bible wa Bisonekwa Bijila Bwalamuni bwa Ntanda Mipya mu Ludimi lwa Batumama lwa mu Amerika ye walupwilwe dibajinji mutuntulu mu ludimi lwa batumama. Pano, Bible wa Bwalamuni bwa Ntanda Mipya mutuntulu nansha kipindi udi’ko mu ndimi mivule ya batumama, mine yendanga ībweja’ko bininge mwaka ne mwaka. (Pa kumona mulongo wa ndimi nansha kutala Bible pa Entelenete, tala kapango kanena’mba “ Bible wa Bwalamuni bwa Ntanda Mipya mu Ludimi lwa Batumama.”)

•   Tala video inena’mba, La Traduction du monde nouveau de la Bible en langue des signes mwanda wa kumona kaji kengilwanga pa kulupula Bible mu ludimi lwa batumama.

•   Pa kumwena bininge mu butangi bwa Bible, tūla mu kingidilwa kyobe kya busendwe aplikasion ya JW Library Sign Language. Ino aplikasion ikukwasha utonge mavese mu Bible wa mu ludimi lwa batumama.

•   Ba Dmytro ne Vita i bambutwile ba kitwi, inoko babo bana bevwananga. Tala muswelo umwenine kisaka kyabo mu kutala difuku ne difuku Bible wa mu ludimi lwa batumama.

 Mavideo a kufundija nao Bible. Batumoni ba Yehova i balupule mavideo a mu ludimi lwa batumama akwasha bantu bevwane ne kwingidija madingi a mu Bible a kamweno atala . . .

•   Busongi ne Kisaka

•   Bankasampe ne Bansongwa

•   Bana

 Kwifunda Bible na muntu ne muntu. Wifunde musapu wa mu Bible mu ludimi lwa batumama mungya bukomo bobe na bukwashi bwa muntu kampanda ukufundija. Lomba mupityilanga buno bwifundi bwa Bible bwa ku bitupu.

 Jeson Senajonon ushikatanga mu Filipine. Tala kwifunda Bible mokwamukwashishe asambe kipwano kityite na Yehova.

 Mario Antúnez wadi pashitele wa kipwilo mu Honduras. Tala mwaasokwedile malondololo ku bipangujo byaadi wiipangula pa Bible, pāshintulula’byo mu nsekununi yandi inena’mba “Nādi na Bipangujo Bivule Kupita’ko Malondololo.”

 Kupwila ne binkumenkume. Tudi na bipwilo ne bisumpi bya ludimi lwa batumama ntanda yonso, mwine mwibunga ba bitwi yenga ne yenga mwanda wa kwifunda ne kutōta. Kadi tuteakanyanga binkumenkume bikatampe mu ludimi lwa batumama mwanda wa kuleta’ko bufundiji bwa mu Bible mwaka ne mwaka. Ku kupwila kwetu ne ku bitango, tuteakanyangapo bushintuludi bwa na madingidijo a mu bingidilwa bya busendwe pa mwanda wa ba bitwi ne bampofu. Kadi tulupulanga ku bitupu mabuku a bilembwa bya bampofu.

•   Tala kipwilo kya kubwipi na kwenu.

•   Tala mulongelwanga bitango byetu bya pa mwaka.

•   Tanwa ku Kivulukilo kya lufu lwa Yesu, kinkumenkume kyetu kya mvubu mpata mu mwaka.

 José Luis Ayala ushikatanga mu Meksike. Wabutwilwe na kitwi, kupwa waikala mpofu. Tala mobamukwashishe ekale mufundiji muyampe wa Bible.