Twivwananga divule mu mapya myanda ya binenwa bya mushikwa, kwiipaya pa mwanda wa mushikwa, kwīlwa kwa tubila, ne mavita.

•   “Pa malezo a mīsambo pabayula bininge binenwa bya mushikwa, pa mwanda wa kwīlwa kwa Isalela na Gaza ne bantu bakankamika milangwe ya bya lūma ne mushikwa.”—The New York Times, 15 Kweji 11, 2023.

•   “Tamba mu mafuku 7 Kweji 10, binenwa bya mushikwa ne kwiipaya pa mwanda wa mushikwa bibavudila’ko bininge.”—Dennis Francis, mwimaniji wa Kubungakana Kukatampe kwa Kitango kya Bumo bwa Mizo, 3 Kweji 11, 2023.

 Binenwa bya mushikwa, lūma, ne mavita kebishilwilepo dyalelo. Bible utela bantu ba pa kala “[bātungilañene] binenwa byabo bileta lufu pamo bwa miketo” ne bālwile mavita ne kulonga bintu bya bukalabale. (Ñimbo ya Mitōto 64:3; 120:7; 140:1) Inoko Bible ushintulula’mba mushikwa otumona dyalelo ulombola kintu kampanda kya mvubu.

 Bible ulombola bubinga bubidi bwikadile’ko mushikwa dyalelo.

1.  1. Wālaile’mba kitatyi kimo “buswe bwa bangi bene bukatalala.” (Mateo 24:12) Pa kyaba kya kwisanswa, bantu bavule badi ba kwikala na ngikadila ya mushikwa.—2 Temote 3:1-5.

2.  2. Mushikwa udi’ko dyalelo ulombolanga lupusa lufyame kadi lubi lwa Satana Dyabola. Bible unena’mba “ntanda yonsololo idi mu lupusa lwa yewa mubi.”—1 Yoano 5:19; Kusokwelwa 12:9, 12.

 Inoko kadi, Bible ulombola’mba panopano ponka Leza usa kutalula’ko bine bilengeja kwikale mushikwa. Kadi usa kutalula’ko makambakano onso alupukile ku mushikwa. Bible i mulaye amba:

•   Leza “ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”—Kusokwelwa 21:4.