KESHAI’NKA KUKESHA!

Befundi ba Sianse I Banyenge Nsá Itala Mfulo ya Ntanda—Le Bible Unena’po Namani?

VUMIJA MU

Mu mafuku 24 Kweji 1, 2023, befundi ba sianse banenene amba Nsá Itala Mfulo ya Ntanda a keidi kubwipi na minwi, bine byelekeja’mba mfulo ya ino ntanda ibafwena.

“‘Nsá Itala Mfulo ya Ntanda’ ifunkila pa kyaka kya muzo wa muntu kwionakanya ao mwine. Mu Dya Bubidi, befundi ba sianse bafwenyenye musunsa wabo mubajinji ino nsá kubwipi na minwi, pa mwanda wa divita dya mu Ikrene, kyaka kya divita dya mabombe a nyukilia, ne pa mwanda wa mukabilo mubi wa kūlu wa ntanda.”—AFP International Text Wire.
“Befundi ba sianse balombwele mu Dya Bubidi amba, kubashala masekonde 90 ‘Nsá Itala Mfulo ya Ntanda’ ifike mu minwi—ko kunena’mba panopano ponka ntanda isa konakanibwa fututu.”—ABC News.
“Kisumpi kya befundi ba sianse kyadyumwine amba, pesambwa pano muzo wa muntu udi mu kyaka kikatampe kya kwijimankanya ao mwine.”—The Guardian.

Le muzo wa muntu ne ntanda bisa kujimankana fututu panopano ponka? Lelo tufwaninwe kukwatwa moyo pa bitutengēle kumeso? Le Bible unena’po namani?

Bitutengēle kumeso

Kukwatañana na Bible, “ntanda ikele’ko nyeke” kadi kukekala bantu “bakekalanga’po nyeke.” (Musapudi 1:4; Ñimbo ya Mitōto 37:29) Nanshi bantu kebakonakanyapo ntanda nansha kulengeja bikale bikomo kushikata’po.

Inoko, Bible wisambilanga pa mfulo. Kimfwa, unena’mba “ino ntanda ipitanga.”—1 Yoano 2:17.

Pa kuyuka byobya bisaka kunena Bible paesambila pa mfulo ya ntanda, tanga kishinte “La fin du monde est-elle proche ? Qu’est-ce que l’apocalypse ?”
Pa kuyuka byobya binena Bible pa kitatyi kikalongeka binkumenkume bya ino ntanda, tanga kishinte “Le Ntanda Ikafula Kitatyi’ka?”

Mwa kwikadila nyeke na mumweno muyampe

Bible ubwanya kwitukwasha twikale na mumweno muyampe nansha byokudi makambakano dyalelo mu ino ntanda. Muswelo’ka?

Bible witupanga madingi a kamweno. (2 Temote 3:16, 17) Kimfwa, tanga kishinte “Mwa Kulekela Kuzumbija Mutyima” umone mubwaninya kukukwasha Bible wikale na mumweno muyampe nansha byokudi makambakano mavule mu būmi.
Bible witupanga lukulupilo lwa bine lwa būmi bwa kumeso. (Bene Loma 15:4) Ushintulula bine byotubwanya kutengela dyalelo ne mu mafuku āya kumeso, bine biketukwasha twikale na kikulupiji nansha shi kubalongeka binkumenkume’ka mu ino ntanda.

Pa kumwena bininge mu byobya binena Bible, tukwita na nsangaji utompe etu masomo a kufundijibwa Bible ku bitupu dyalelo.

a “Nsá Itala Mfulo ya Ntanda i mitūlwe’ko mwanda wa kudyumuna bantu pa mwanda utala muswelo otwenda tonakanya ntanda yetu na byabusendwe bya kyaka byotupunga batwe bene. I muneneno wa kyelekejo wituvuluja byotufwaninwe kulonga shi tusaka kwendelela kwikala pano pa ntanda.”—Bulletin des scientifiques atomistes.