Bafwatakanya’mba bantu midiyala itano ne kupita batalanga futu ya Kikombe kya Ntanda Yonso kya FIFA ikaibwa tamba mu mafuku 20 Kweji 11 kutūla ku mafuku 18 Kweji 12, 2022. Bantu bavule bamwene amba binkumenkume bya makayo pamo bwa kino bibwanya kulunga umbumo boba batala, enka ne kukwasha bantu mu miswelo mikwabo.

•   “Makayo adi na bukomo bwa kushinta ntanda. Adi na bukomo bwa kwalamuna milangwe ya bantu. Adi na bukomo bwa kulunga bantu umbumo kupita bintu bikwabo.”—Nelson Mandela, prezida wa kala wa mu Afrika wa Kunshi.

•   “Futu . . . ipanga bantu bonso lukulupilo, ibalunga umbumo na kwibapa nsangaji, kwibalunga mu malango, mu buswe, enka ne mu kwishila kwabo kwine.”—Gianni Infantino, prezida wa FIFA. a

 Le na bubine futu ya Kikombe kya Ntanda Yonso nansha makayo makwabo o-onso abwanya kufikidija byonso byanenwa’bi? Le ndoe ne bumo bikekala’ko bine?

 Futu ya Kikombe kya Ntanda Yonso ya uno mwaka keidipo’tu enka bu futu bitupu. Mu ano makayo mudi ne lupata lutala būmi bwa bantu ne myanda ya politike, kubadila’mo enka ne myanda itala byepelo bya bantu, kwisañuna, ne kwishila kwishidile bantu mu myanda ya misokwe.

 Shako, bavule bamwene makayo a ntanda yonso pamo bwa ano a futu bu mukenga usangaja wa kwipwija mukose. Inoko, nansha bantu byobasaka binkumenkume pamo bwa kino bilungile bantu umbumo, abyo kebiletangapo nyeke bumo. Divule dine, ano makayo atwejanga mu bantu ngikadila ya kwimwekeja, ya kwilalulula pamo ne bilongwa bitela Bible bu bya kuyukila’po kitatyi kītwa bu “mafuku a mfulo.”—2 Temote 3:1-5.

 Bible witupa lukulupilo lwa bumo bwa bine ntanda yonso. I mulaye amba bantu bonso bakekala umbumo pobakaludikwa na umbikalo wa mūlu utelwa bu “Bulopwe bwa Leza.”—Luka 4:43; Mateo 6:10.

 Yesu Kidishitu, Mulopwe wa buno Bulopwe ukalonga byonso amba kwikale ndoe ntanda yonso. Bible unena’mba:

•   “Moloke ukamonanga biyampe, kadi ndoe ikavula.”—Ñimbo ya Mitōto 72:7.

•   “Ukakūlanga mulanda wabija bukwashi . . . Ukebakūlanga ku malwa ne ku lūma.”—Ñimbo ya Mitōto 72:12, 14.

 Panenwa pano, bufundiji bwa Yesu ke buluge kala midiyo ne midiyo ya bantu ba mu matanda 239. Bano bantu i befunde kutalula mushikwa. Pa kuyukila’ko bivule, tanga bishinte bidi na mutwe wa mwanda unena’mba, “Le Mushikwa Ukapwa Namani?.”