KESHAI’NKA KUKESHA!
Bya Lūma mu Politike—Le Bible Unena’po Namani?
Myanda mivule ya bya lūma ilongeka mu politike ilengejanga bantu basele mityima kūlu.
Mu kitatyi kya mavote a mu 2023 kutūla ku 2 024 mu Meksike, kwaipailwe bakandida 39, kadi kwalongelwe ne bilongwa bikwabo bivule bya bukalabale.
Mu Bulaya, mwadi myanda mivule ya bya lūma yakolomwenwe na bendeji ba politike, kadi mu mafuku 15 Kweji 5, 2024, baswile ne kwipaya’mo premier ministre wa mu Slovaki.
Mu mafuku 13 Kweji 7, 2024 ntanda ya États-Unis keyadipo biyampe, mwanda baswile kwipaya’mo mulopwe wa kala witwa bu Donald Trump.
Mwanda waka kudi myanda ya bya lūma mivule nenki mu politike? Le kudi kitatyi kyobikapwanga? Le Bible unena’po namani?
Nkalañani idi mu myanda ya politike yālailwe tamba kala
Bible wālaile amba, mu kino kyetu kitatyi kitelwa bu “mafuku a mfulo,” bantu badi ba kwikala na ngikadila ikolomona bya lūma ne kubulwa kumvwañana.
“Mu mafuku a mfulo kukekalanga bitatyi bya makambakano bikomo ne mwa kulongela. Mwanda bantu bakekala . . . bampikwa kufwija’ko, ba kubulwa lulamato, . . . bapela kumvwañana ko-konso, . . . ba bukalabale bwa malwa, . . . ba kwaba bakwabo, ba mitwe myūmu, bayule mitatulo.”—2 Temote 3:1-4.
Kadi Bible wālaile amba, tuvutakanya tulongeka, pamo bwa kutombokela buludiki ne tuvutakanya twa basivile, bikavula mu ano etu mafuku. (Luka 21:9, kunshi kwa dyani) Ino nansha nankyo, bya lūma ne kwilalulula kebikendelelapo’nka namino.
Mfulo ya bya lūma bidi mu myanda ya politike
Bible unena’mba Leza ukatalula’ko maludiki onso a bantu, ne kutūla’ko buludiki bwandi bwa mūlu.
“Leza wa mūlu ukemika bulopwe . . . bukavingakanya ne kufudija ano malopwe [makwabo] onso, kadi abo kete bukemananga nyeke.”—Danyele 2:44.
Bulopwe bwa Leza bukekadija bantu mu bumo ne kuleta ndoe pa ntanda yonso.
Yesu Kidishitu, Mulopwe wa Bulopwe bwa Leza i mutelwe bu “Mfumu wa Ndoe,” kadi ukalonga bukomo amba ndoe ‘keikekalapo na mfulo.’—Isaya 9:6, 7.
Enka ne dyalelo, boba baludikwa na buno Bulopwe befundanga mwa kwikadila mu ndoe. O mwanda mwine Bible unena’mba: “Bakafula bipete byabo ke nkasu ne mikobe yabo ke bipete bya kukukula nabyo. Muzo keukatululapo kipete pa muzo mukwabo, kadi kebakefundepo monka divita.”—Isaya 2:3, 4.
Pa kuyukila’ko bivule, tanga kishinte kinena’mba “Le Bulopwe bwa Leza Bukalonga Bika?” kadi tala video inena’mba Le Bulopwe bwa Leza I Bika?
Tala'po Bidi ne Bino:
KITEBA KYA MULAMI
Le Bulopwe bwa Leza Bukalonga Bika?
Yesu wādi uyukile amba Bulopwe bwa Leza Kete ye buludiki bumo bukapwa makambakano pano pa ntanda. Le i bintu’ka ke bilonge kala buno Bulopwe biningija kikulupiji kyetu?
KESHAI’NKA KUKESHA!
Kujimija Kikulupiji mu Bendeji ba Politike—Le Bible Unena’po Namani?
Bible witukankamika tutadije na bantu botukulupila ne kwitulombola kintu kimo kete kiketukwasha twikale na būmi buyampe mu mafuku āya kumeso.
KESHAI’NKA KUKESHA!
Mwanda Waka Politike I Mikalañanye Bantu Bininge?—Le Bible Unena’po Namani?
Ntanda yonso kudi kwilalulula pa mwanda wa politike. Bible ulombola mwine ukapwa makambakano—amba i muludiki ukakutyila bantu bonso mu bumo.
KITEBA KYA MULAMI
I Ani Utongelwe na Leza bu Mwendeji?
MYANDA MIKWABO
Lukulupilo lwa Bine lwa Būmi Bulumbuluke bwa Kumeso
Le milao idi mu Bible i mishile namani na milao ya bantu ne bintu byobabadikila kunena?
