Kudi mavideo aná otwingidijanga mu busapudi. Le video ne video idi na kitungo’ka?

• Video Mwanda Waka Twifunde Bible?—Milampe Idi na kitungo kya kulengeja muntu asangele Bible nansha shi udi na nkulupilo’ka. Ikamukankamika akimbe malondololo mu Bible ku bipangujo bya mvubu mikatampe mu būmi ne kumukwasha amone’mba ubwanya kutana malondololo kokwa kwashikete. Kadi ilombolanga mwa kulombela kifundwa kya Bible.

• Video (mīpi) Mwanda Waka Twifunde Bible? I miifwane na milampe, inoko ino video mīpi idi na munite umo ne kipindi. Ibwanya kwikala miyampe bininge mu mwaba muvudilwe bantu bya kulonga.

• Video I Bika Biloñwanga mu Kifundwa kya Bible? Idi na kitungo kya kulangula kusangela mu kifundwa kya Bible kya ku bitupu ne kulondolola ku bipangujo bimobimo bivudile kwiipangulwa, kubandila’mo ne mwa kulombela kifundwa kya Bible.

• Video Wako, Wako ku Kifundwa Kyobe kya Bible i milupulwe mwanda wa kutadija’yo botwifunda nabo Bible. Nansha ino video byoidi pa paje wa bubidi pa dibuku Ikala Mūmi Nyeke! ino ubwanya kulombola’yo ne muntu omwifunda nandi mu boloshile Ikala Mūmi Nyeke!, ino video isambilanga pa myanda ya mu dibuku ne pa bibwanya kulonga mwifundi kitatyi kyotwifunda nandi.

Nansha video ne video byoidi na kitungo palapala, ubwanya kwingidija’o na kutadija muntu video imo pa ano, nansha kutumina’yo muntu shi abe mwine ubajingulula’mba i biyampe kulonga uno muswelo. Basapudi i bakankamikwe kwiibidija ano mavideo mwanda wa kwiengidija senene mu mwingilo wa busapudi.